Basoda ya Russie mekota na Ukraine samu na kunuanisa bau

KUWA NA

Na kilumbu ya 24 Février 2022, na sunka, basoda ya Russie bandaka kukota na kingolo na Ukraine samu na kunuanisa yinsi yango, atako bantuadisi mingi ya yinza salaka ngolo samu na kupekisa mvita yango. Yinki bupusi yina mvita yango kela na ya una yinza? António Guterres, sekretere ya ntete ya O.N.U, tubaka mua bilumbu tekila mvita yango banda ti: “Beto lenda kanisa ve bampasi yina mvita yango kenatina bantu, yakekatula luvuvamu na Europe mpe na yinza ya mvimba.”

Na kutadila Biblia, yinki mfunu mambu ya mutindu yayi kele na yau?

Yesu Klisto samunaka ti ‘yinsi mosi kenuanisa yinsi yankaka mpe kimfumu mosi kenuanisa kimfumu yankaka.’ (Matayo 24:7) Tanga disolo yina metuba “Elembo ya “mikolo ya nsuka,” to ‘ntango ya suka’ ezali nini?” samu na kuzaba mutindu Biblia memonisa ti bamvita yayi kena kusalama bubu yayi kena kukokisa mambu yina Yesu tubaka banda ntama.
Samu na kutubila bamvita, mukanda ya Kusonga (Nzaikusu) kena kutubila mvita lokola ntuadisi mosi ya mpunda yina mevuanda na zulu ya ‘mpunda ya mbuaki’ mpe yandi kena ‘kukatula kiyenge na ntoto’ (Kusonga 6:4). Tanga disolo yina metuba “Batambwisi-mpunda minei yango bazali banani?” samu na kuzaba mutindu bambikudulu ya Biblia kena kukokisama bubu yayi na yina metadila bamvita.
Mukanda ya Daniele tubilaka kimbeni yina kevuanda kati na ‘ntinu ya Nord’ mpe “ntinu ya Sud.” (Daniele 11:25-45) Tala video yayi metuba “Esakweli moko ezali kokokisama: Danyele mokapo 11” samu na kuzaba mfunu yina beto lenda tuba ti buala ya Russie mpe babuala yina kesanganaka na yandi nde kele ntinu ya Nord. a
Mukanda ya Kusonga ketubilaka diaka “Mvita ya kilumbu ya nene ya Nzambi Nkua-Ngolo Nionso.” (Kusonga 16:14, 16) Kasi yakele ve mvita yina kesangisaka kaka babuala mutindu beto kena kumona yau bubu yayi. Tanga disolo “Etumba ya Armagedone ezali nini?” samu na kuzaba mambu mingi yankaka yina metadila mvita yango yina kesalama na bilumbu kena kuiza.

Samu na yinki nge fueti vuanda na kivuvu samu na bilumbu kekuiza?

Biblia metuba ti Nzambi “kesukisa bamvita na ntoto ya mvimba.” (Nkunga 46:9) Tanga disolo yina metuba “Elikya ya solosolo mpo na mikolo ezali koya” samu na kuzaba mambu ya mbote yina Nzambi melaka.
Yesu longaka banlonguki na yandi basambilaka samu Kimfumu ya Nzambi kuiza. (Matayo 6:9, 10) Kimfumu yango kele luyalu mosi ya dizulu mpe yakekokisa lukanu ya Nzambi samu na ntoto, na kifuani lukanu ya Nzambi ya kutula kiyenge na ntoto ya mvimba. Samu na kuzaba mutindu Kimfumu yango kenatila nge mambote, tala video Bokonzi ya Nzambe ezali nini?

Bambangi ya Yehova kuluta 129 000 kezingaka na buala ya Ukraine. Lokola kaka Bambangi ya babuala nionso, bau diaka bakelandaka kifuani ya Yesu ya kukota ve na mambu ya politiki mpe bakemangaka kunuana mvita. (Yoane 18:36) Na yinza ya mvimba, Bambangi ya Yehova ketatamanaka kulonga ’nsangu ya mbote ya Kimfumu’ mpe kumonisa ti yakele Kimfumu yina kemanisa bampasi ya bantu, ata mpe bamvita. (Matayo 24:14) Beto melomba nge nge solola na beto to nge sonikina beto samu nge zaba mambu mingi na yina metadila nsangu yina kepesaka kivuvu yina kele na Biblia.

a Samu na kuzaba mambu yankaka metadila mbikudulu yango, tanga masolo “‘Mokonzi ya Nordi na tango ya nsuka” mpe “Nani nde ‘Mokonzi ya Nordi’ lelo oyo?”