Kana bamilion 5 ya bantu ketala Coupe du monde ya FIFA, yina kebanda na kilumbu ya 20 novembre tii na kilumbu ya 18 décembre 2022. Bantu mingi kena kukanisa ti diambu ya mutindu yina kesuka kaka ve na kusangisa bantu samu na kutala ba match.

•   “Bansaka kele na kilendo ya kusoba yinza. Yalenda pesa bantu bangindu ya kusala diambu mosi, yakele na kilendo ya kusangisa bantu na mutindu mosi yina kokana ve na yankaka.”—Nelson Mandela, prezidan ya ntama ya Afrique du Sud.

•   “Bansaka ya kubula bale kesangisaka bantu samu yakepesaka bau kivuvu, kiese, yakesangisaka bantu na kiese, yakebendaka dikebi, yaketindaka bantu bazola bantu yankaka, mpe yakesalaka ti bantu kukimona ti bakele kaka muntu mosi.”—Gianni Infantino, prezidan ya FIFA. a

 Coupe du monde to bansaka yankaka lenda kokisa mpenza balukanu yango ya mfunu? Kilumbu kele yina bantu kezinga na kiyenge mpe bumosi?

 Mvula yayi, Coupe du monde kevuanda kaka ve bansaka ya mpamba ya kubula bale. Bansaka yango bimisaka bantembe samu na diambu metadila bantu mpe mambu ya politiki yina metadila bayinsua ya bantu, kukabula bankanda, mpe lusuasanu na mambu metadila kimvuama.

 Kasi, bantu yankaka ketadilaka bansaka ya mutindu yina lokola diambu mosi kaka ya kitoko ya kulutisila ntangu. Kasi bansaka ya mutindu yina lenda sangisa ve bantu, atako kusangana kevuandaka nsatu ya bantu. Diambu meluta mpasi, bansaka ya mutindu yina kebimisaka kikadulu ya kukabula bantu, mpe yakemonisaka kilokola yina Biblia mebokidila “Bilumbu ya nsuka.”—2 Timoteo 3:1-5.

 Biblia kele na kivuvu ya kedika samu na bantu ya yinza ya mvimba. Yametuba ti bantu na ntoto ya mvimba kevuanda na bumosi na yinsi ya guvernema ya dizulu yina bakebokidilaka “Kimfumu ya Nzambi.”—Luka 4:43; Matayo 6:10.

 Yesu Klisto, yina kele Mfumu ya Kimfumu ya Nzambi kesala ti kiyenge vuanda na yinza ya mvimba. Biblia metuba:

•   ‘Muntu ya lunungu kemena lokola matiti ya yimpa, mpe kiyenge kekuma mingi.’—Nkunga 72:7.

•   ‘Yandi kevuluza mpupa yina kena kudila samu na kulomba lusadusu . . . Yandi kevuluza bau na bampasi mpe na kinkesi.”—Nkunga 72:12, 14.

 Ata bubu yayi, malongi ya Yesu kena kusangisa bamilion ya bantu yina kezingaka na babuala 239. Bamelonguka kumanga kuyinana ya mitindu nionso. Samu na kuzaba mambu yankaka, tanga masolo kele na Linɔ́ngi ya Mosɛnzɛli yina kele na yintu ya diambu, “Koyinana ekoki kosila?”