တၢ်ဆီဟံၣ်ဆီဃီန့ၣ် မ့ၢ်တၢ်သူၣ်ထီၣ် ဟံၣ်ဖိဃီဖိအသီတဒူၣ်လီၤ. နကအဲၣ်နမိၢ်နပၢ်ဒီး ယူးယီၣ်ပာ်ကဲအဝဲသ့ၣ် ထီဘိသနာ်က့, ခဲအံၤပှၤလၢအရ့ဒိၣ်ကတၢၢ် လၢနဂီၢ်လၢဟီၣ်ခိၣ်ချၢန့ၣ် မ့ၢ်နသးသမူတံၤသကိးလီၤ. ဘၣ်သ့ၣ်သ့ၣ် ကကီခဲဝဲလၢ နဘူးနတံၢ်တနီၤ ကတူၢ်လိာ်ဝဲတၢ်အံၤအဂီၢ်လီၤ. ဘၣ်ဆၣ်ဒီး ဖဲနဂုာ်ကျဲးစၢး မၤဂၢၢ်ကျၢၤထီၣ် နဟံၣ်ဖိဃီဖိလၢ အသီတဒူၣ်အခါန့ၣ် ဒ်သိးနပၢၤဃာ်တၢ်ဃူတၢ်ဖိးဒီး နဘူးနတံၢ်ကန့ၢ်ဒံးအဂီၢ် လံာ်စီဆှံအတၢ်နဲၣ်လိတဖၣ်န့ၣ် မၤစၢၤနၤသ့လီၤ.

လံာ်စီဆှံစံးဝဲ– “ယူးယီၣ် နမိၢ်နပၢ်တက့ၢ်.” (အ့းဖ့းစူး ၆:၂) နသးအနံၣ်မ့ၢ်အိၣ်ထဲလဲၣ်ဂ့ၤဂ့ၤ လိၣ်လၢနကဘၣ် ယူးယီၣ်ပာ်ကဲနမိၢ်နပၢ်လီၤ. သ့ၣ်နီၣ်ထီၣ်လၢ နသးသမူတံၤသကိးစ့ၢ်ကီး အိၣ်ဒီးအမိၢ်အပၢ်အဃိ လိၣ်လၢအဝဲကဘၣ်ဟ့ၣ် တၢ်ဆၢကတီၢ်လၢ အဝဲသ့ၣ်အဂီၢ်လီၤ. “တၢ်အဲၣ်တၢ်ကွံ တသးကါဘၣ်တၢ်ဘၣ်” အဃိ တဘၣ်အိၣ်ဒီးတၢ်သးဘၣ်တံာ်တာ်လၢ နသးသမူတံၤသကိး အတၢ်ရ့လိာ်သးဒီး အမိၢ်အပၢ်န့ၣ်တဂ့ၤ.—၁ ကရံၣ်သူး ၁၃:၄; ကလၤတံ ၅:၂၆.

တၢ်လၢနမၤသ့–

• တဘၣ်ကတိၤလုာ်ကိတၢ် ဒ်သိးဒီး “နဟံၣ်ဖိဃီဖိန့ၣ် ဆိကမိၣ်ဆံးယၤ ထီဘိလီၤ” မ့တမ့ၢ် “ယမၤတၢ်န့ၣ်တဘၣ် နမိၢ်အသး နီတဘျီဘၣ်” န့ၣ်တဂ့ၤ

• ဂုာ်ကျဲးစၢးဒိသူၣ်ဒိသး လၢနသးသမူတံၤသကိးအဂီၢ် ဒီးနၢ်ပၢၢ်စၢၤအတၢ်ထံၣ်န့ၣ်တက့ၢ်

လံာ်စီဆှံစံးဝဲ– “မၤသးဒ်န့ၣ်ဒီး တၢ်လၢပိာ်ခွါအံၤ ကဟးသဒၣ်အမိၢ်အပၢ်, ဒီးကဘျုးအသးဆူ ပိာ်မုၣ်အအိၣ်, ဒီးတၢ်လၢပှၤခံဂၤန့ၣ်ကကဲထီၣ် တၢ်တသွံၣ်ဃီတညၣ်ဃီလီၤ.” (၁ မိၤၡ့ ၂:၂၄) နဆီဟံၣ်ဆီဃီဝံၤသနာ်က့ နမိၢ်နပၢ်တဖၣ်ကဆိကမိၣ်ဝဲလၢ အမူဒါအိၣ်ဒံးလၢနဂီၢ်ဒီး အဝဲသ့ၣ်ကအဲၣ်ဒိး မၤဘၣ်ဃးအသးလၢ နတၢ်ဆီဟံၣ်ဆီဃီအပူၤအါန့ၢ်ဒံး တၢ်လၢအဝဲသ့ၣ်ကြၢးပၣ်ဃုာ်ဝဲန့ၣ်လီၤ.

နၤဒီးနသးသမူတံၤသကိး ကဒုးပၣ်ဃုာ်မိၢ်ပၢ်တဖၣ် တုၤထဲလဲၣ်န့ၣ် သုကဘၣ် ဆၢတဲာ် ဒီးတဲဘၣ်အဝဲသ့ၣ်လၢ တၢ်အဲၣ်တၢ်ကွံအပူၤလီၤ. သုကဘၣ်ကတိၤတၢ်ပျီပျီ ဒီး တဲတၢ်လိၤလိၤလၢ တၢ်ယူးယီၣ်ပာ်ကဲလီၤ. (ကတိၤဒိ ၁၅:၁) တၢ်ဆီၣ်လီၤသး, တၢ်သညူးသပှၢ်, ဒီးတၢ်ဝံသးစူၤန့ၣ် ကမၤစၢၤနၤလၢ နကမၤဂ့ၤထီၣ်နတၢ်ရ့လိာ်သးဒီး နဘူးနတံၢ်တဖၣ်ဒီးသု “ကီၤသုသးသကိးသကိးလၢ တၢ်အဲၣ်တၢ်ကွံအပူၤ” ကန့ၢ်ထီဘိအဂီၢ်လီၤ.—အ့းဖ့းစူး ၄:၂.

တၢ်လၢနၤမၤသ့–

• နသးမ့ၢ်ဘၣ်တံာ်တာ်လၢ နဘူးနတံၢ်မ့တမ့ၢ် နသးသမူတံၤသကိး အဘူးအတံၢ်တဖၣ် အတၢ်ပၣ်ဃုာ်လၢနဟံၣ်ဃီအပူၤန့ၣ် တၢၣ်ပီၣ်သကိးတၢ်ဂ့ၢ်အံၤဒီး နသးသမူတံၤသကိး ဖဲတၢ်ဘှ့ၣ်တၢ်ဘှီၣ် အဆၢကတီၢ်န့ၣ်တက့ၢ်

• နကဘၣ်သုးကျဲၤတၢ်ဂ့ၢ်အံၤ ဒ်လဲၣ်န့ၣ်ဆၢတဲာ်အီၤလၢ တၢ်သးတဖျၢၣ်ဃီတက့ၢ်