ပှၤကွဲးကျိာ်ထံတၢ်ကရူၢ် အမျးကယၤ ၆၀ ဘျဲၣ်န့ၣ်​ ကွဲးကျိာ်ထံတၢ်လၢ တၢ်ကွဲးကျိာ်ထံတၢ်အရူ (RTO) န့ၣ်လီၤ. ဘၣ်မနုၤအဃိ တၢ်ရဲၣ်တၢ်ကျဲၤတခါအံၤ အဘျုးအိၣ်ဝဲလဲၣ်. ပှၤကွဲးကျိာ်ထံတၢ်လၢ RTO တဖၣ်အတၢ်မၤ ကလဲၤအသးဘၣ်ဘျီးဘၣ်ဒါအဂီၢ် အဝဲသ့ၣ်​ လိၣ်ဘၣ်တၢ်ပီးတၢ်လီ မနုၤတဖၣ်လဲၣ်. ပှၤကွဲးကျိာ်ထံတၢ်ကရူၢ်အိၣ်အလီၢ်န့ၣ်​ ကဲဘျုးလၢ အဝဲသ့ၣ်​ အတၢ်ကွဲးကျိာ်ထံ အဂီၢ်ဒ်လဲၣ်.

 RTO န့ၣ်​ ပှၤကွဲးကျိာ်ထံတၢ်တဖၣ်​ အိၣ်ဘူးဘၣ်ဒီး ပှၤလၢအတဲ အဝဲသ့ၣ်အကျိာ်တဖၣ်လီၤ. ခဲရ့ၣ်​ လၢအကွဲးကျိာ်ထံတၢ်လၢ လိ ကၠၢမၢၢ် ကျိာ်န့ၣ်​ တဲဝဲလၢ “ဖဲပလဲၤသုးပသးဆူ RTO လၢအအိၣ်လၢ ခွီထဲမီး, ခၠူၤဝါဝါ, မဲးကစံၣ်ကိၣ်​ အခါ ပဝဲပှၤကွဲးကျိာ်ထံတၢ် ကဒဲကဒဲ မ့ၢ်ဂ့ၤ, ဖဲပလဲၤစံၣ်တဲၤတဲလီၤတၢ် အခါမ့ၢ်ဂ့ၤ, ပလဲၤပှ့ၤတၢ်အခါမ့ၢ်ဂ့ၤ ပတဲဘၣ်​ လိ ကၠၢမၢၢ် ကျိာ်ထီဘိလီၤ. ပှၤလၢအကတိၤကျိာ် ဒ်သိးဒီးပှၤတဖၣ်​ အိၣ်ဝးတရံးပှၤလီၤ. ပနၢ်ဟူဘၣ်​ တၢ်ကတိၤဒိလၢ ပတနၢ်ဟူဘၣ်​ ယံာ်တ့ၢ်လံတဖၣ်​ ဒီးပသ့ၣ်ညါဘၣ်လၢ တၢ်ကတိၤတဖၣ်စ့ၢ်ကီး ဆီတလဲဝဲလီၤ.”

 ကၠ့စ် လၢအမၤတၢ်လၢ ဖြါဖြၣ်​ တၢ်ကွဲးကျိာ်ထံတၢ်ကရူၢ်လၢ ကီၢ်ကၣ်နၣ်န့ၣ်​ တဲဝဲလၢ တဘျီတခီၣ်​ ယသ့ၣ်နီၣ်ဘၣ်​ တၢ်ရ့လိာ်သးဒီး ပှၤဘ့ၤသ့လးဖိလၢ ဝဲၤတြၢ်တဖၣ်လီၤ. အဝဲတဲစ့ၢ်ကီးဝဲလၢ “ယမၤတၢ်လၢ RTO န့ၣ်မုာ်ဒိၣ်မး. ယစံၣ်တဲၤတဲလီၤဘၣ်တၢ်လၢ ကျိာ်လၢပှၤလီၢ်ကဝီၤဖိတဖၣ်တဲဝဲ ဒီးယထံၣ်ဘၣ်လၢ အဝဲသ့ၣ်​ တူၢ်လိာ်ဝဲတၢ်သးခုကစီၣ်အဃိ ယသးခုဒိၣ်မး”

 ပဒီပုၢ်ဝဲၢ်တဖၣ်​ ကပာ်လီၤဝဲ RTO လၢတၢ်လီၢ်ဖဲလဲၣ်န့ၣ်​ အဝဲသ့ၣ်​ ဆၢတဲာ်ဝဲဒ်လဲၣ်. “တၢ်ကီတၢ်ခဲတခါလၢ ပထံၣ်ဘၣ်န့ၣ်မ့ၢ်ဝဲ တၢ်လီၢ်တနီၤန့ၣ်​ ထံ, မ့တမ့ၢ် လီမ့ၣ်အူ ဒီး အ့ထၢၣ်နဲး တမၤတၢ်ဂ့ၤဂ့ၤ ဒ်သိးပကဒိးန့ၢ်ဘၣ်​ text files လၢတၢ်ကွဲးကျိာ်ထံတၢ်အဂီၢ်ဘၣ်.” ကၠိစဲး လၢအမၤတၢ်လၢ ဟီၣ်ခိၣ်ဒီဘ့ၣ်​ တၢ်သူၣ်ထီၣ်ဘှီထီၣ်ဝဲၤကျိၤလၢ အအိၣ်လၢ ဝီဝံး, နူယီး, U.S.A. န့ၣ်တဲဝဲလၢ “ပကပာ်လီၤ RTO အလီၢ်ဖဲလဲၣ်န့ၣ်​ ပဆိကမိၣ်ထံ တၢ်လီၢ်အါတီၤ လၢဘၣ်ဃးဒီး ပှၤကတိၤကျိာ်အဝဲန့ၣ်လီၤ.”

 ကျဲအချ့ကတၢၢ် ဒီးအပှ့ၤဘၣ်ကတၢၢ်န့ၣ်မ့ၢ်ဝဲ ပပာ်လီၤဝဲ RTO လၢကဝီၤဘျီၣ်ဒိၣ်, ဘီမုၢ်ဘျီၣ်ဒိၣ်​ မ့တမ့ၢ် ဟံၣ်လၢမံးၡ့ၣ်နရ့ၣ်​ အိၣ်ဝဲတဖၣ်​ ဒ်သိး ပှၤကွဲးကျိာ်ထံတၢ်တဖၣ်​ ကလဲၤမၤတၢ်ဖဲန့ၣ်လီၤ. တၢ်လီၢ်ဒ်သိးအံၤတဖၣ်​ မ့ၢ်တအိၣ်ဘၣ်န့ၣ်​ ဘၣ်သ့ၣ်သ့ၣ်​ ဒီပုၢ်ဝဲၢ်တဖၣ်​ ကဒိးန့ၢ်ဘၣ်အခွဲးလၢ ကပှ့ၤဝဲ တၢ်သူၣ်ထီၣ်​ ဒီးရူအလီၢ် လၢပှၤကွဲးကျိာ်ထံတၢ်တဖၣ်​ ကအိၣ်ဝဲ ဒီးကမၤတၢ်အဂီၢ်လီၤ. မ့ၢ်လိၣ်လၢ ပှၤကဘၣ်ဆီတလဲ ပှၤကွဲးကျိာ်ထံတၢ်အကရူၢ်န့ၣ်​ တၢ်သူၣ်ထီၣ်တဖၣ်အံၤ ပှၤဆါက့ၤအီၤညီ ဒီးစ့တဖၣ်အံၤ ပှၤသူက့ၤအီၤလၢ တၢ်လိၣ်ဘၣ်လၢအရ့ဒိၣ်တဖၣ်အဂီၢ်လီၤ.

 ဖဲ ၂၀၂၀ တၢ်မၤနံၣ်အတီၢ်ပူၤန့ၣ်​ ပသူဝဲစ့ ဒီလၣ်​ ၁၃ ကကွဲၢ် (U.S.) လၢ RTOs တၢ်ဖံးတၢ်မၤအဂီၢ်လီၤ. ပှၤကွဲးကျိာ်ထံတၢ်လၢ RTOs တဖၣ်န့ၣ်​ လိၣ်ဘၣ်ဝဲ ခီၣ်ဖၠူထၢၣ်, စီၣ်ဝဲ လီၤလီၤဆီဆီ (specialized software), တၢ်ပီးတၢ်လီလၢ တၢ်သွီတၢ်ကလုၢ်အဂီၢ်, အ့ထၢၣ်နဲး ဒီးတၢ်လိၣ်ဘၣ်အဂၤတဖၣ်လီၤ. အဒိ ပှၤထီထီၣ်ခီၣ်ဖၠူထၢၣ်တဖျၢၣ်အဂီၢ် တၢ်ပီးတၢ်လီတဖၣ်န့ၣ်​ လီၤလဲဝဲ ဒီလၣ်​ ၇၅၀ (U.S.) လီၤ. လၢခီၣ်ဖၠူထၢၣ်အပူၤ ပှၤဘၣ်ဖၢနုာ် စီၣ်ဝဲ ဒီး Watchtower Translation System လၢပှၤပှ့ၤအီၤတဖၣ်လီၤ. တၢ်သ့ၣ်တဖၣ်အံၤ ကဲထီၣ်တၢ်မၤစၢၤလၢ တၢ်ကွဲးကျိာ်ထံ အတၢ်ရဲၣ်တၢ်ကျဲၤအဂီၢ် ဒီးညီလၢ ပှၤကဃုသ့ၣ်ညါ တၢ်ဂ့ၢ်အဂုာ်အဂၤတဖၣ်လီၤ.

 ပှၤကွဲးကျိာ်ထံတၢ်တဖၣ်​ ဒိးန့ၢ်ဘၣ်စ့ၢ်ကီး တၢ်ပီးတၢ်လီလၢ တၢ်သွီတၢ်ကလုၢ်အဂီၢ် ဒ်သိးအဝဲသ့ၣ်​ သွီတၢ်ကလုၢ်လၢရူပူၤ ကသ့အဂီၢ်လီၤ. ဖဲ COVID-19 တၢ်ဆါကဲထီၣ်အခါ တၢ်ပီးတၢ်လီတဖၣ်အံၤ ကဲဘျုးဒိၣ်မးလီၤ. ပှၤကွဲးကျိာ်ထံတၢ်တဖၣ်​ က့ၤစိာ်ဝဲတၢ်ပီးတၢ်လီတဖၣ်​ လၢအဟံၣ်​ ဒီးသွီနုာ်ဝဲ တၢ်ကလုၢ် ဒီးတၢ်ဂီၤမူလၢ ပှၤကွဲးကျိာ်ထံ ပာ်အီၤဝံၤတဖၣ်လီၤ.

 လီၢ်ကဝီၤပူၤ ဒီပုၢ်ဝဲၢ်မုၣ်ခွါလၢ အမၤစၢၤတၢ်တဖၣ်န့ၣ်​ သမံသမိးဝဲ လံာ်လဲၢ်လၢပှၤကွဲးကျိာ်ထံအီၤတဖၣ်​ ဒီးကွၢ်ထွဲဘှီဂ့ၤထီၣ်က့ၤဝဲ RTO တၢ်လီၢ်တၢ်ကျဲတဖၣ်လီၤ. ဒီပုၢ်ဝဲၢ် ခရံာ်စတ့ လၢအမၤတၢ်လၢ အၤဖြံခါန် RTO လၢအအိၣ်လၢ ဝ့ၢ်ခ့းဖ် လၢကလံၤထံး အၤဖြံၤကၤန့ၣ်​ တဲဝဲလၢ “ပှၤစံၣ်တဲၤတဲလီၤတၢ်ဖိ ဒီးပှၤလဲၤလၢညါအါဂၤန့ၣ်​ အိၣ်ဒီးတၢ်ခွဲးတၢ်ယာ်လၢ ကသူဝဲအတၢ်သ့တၢ်ဘၣ်​ ဒီးမၤစၢၤတၢ်ဖဲအံၤလီၤ.”

 ပှၤမၤစၢၤတၢ်ဖိတဖၣ်​ မၤဝဲမူဒါအံၤမုာ်ဒိၣ်မးလီၤ. ဒီပုၢ်ဝဲၢ်မုၣ်တဂၤလၢ အမၤစၢၤတၢ်လၢ RTO န့ၣ်တဲဝဲလၢ အမၤတၢ်ဖဲအံၤန့ၣ်​ “ဟ့ၣ်အီၤတၢ်သူၣ်ဖှံသးညီ ဒီးတၢ်ဂံၢ်တၢ်ဘါလီၤ.” လီၢ်ကဝီၤ ဒီပုၢ်ဝဲၢ်မုၣ်ခွါတနီၤ မၤစၢၤတၢ်လၢ တၢ်သွီတၢ်ကလုၢ်အဂီၢ်လီၤ. ဒီပုၢ်ဝဲၢ်မုၣ်​ ဝါနၤ လၢအမ့ၢ် ထိၣ်ထိၣ်နၤ အပှၤကွဲးကျိာ်ထံတၢ် လၢအအိၣ်လၢ ဝ့ၢ်ဘၢရၤခရူ(စ်), မဲးကစံၣ်ကိၣ်​ န့ၣ်တဲဝဲလၢ “ခဲအံၤပအိၣ်ဘူးထီၣ်ဒီး ဝ့ၢ်တဖၣ်လၢ ပှၤတဲကျိာ်ဒ်သိးဒီးပှၤ ဒီးညီထီၣ်ဝဲလၢ ဒီပုၢ်ဝဲၢ်မုၣ်ခွါအါဂၤ ကမၤစၢၤတၢ်လၢ တၢ်သွီတၢ်ကလုၢ်လၢ တၢ်ဂီၤမူ ဒီးလံာ်လဲၢ်တဖၣ်အဂီၢ်လီၤ.”

 ဘၣ်ဆၣ်​ RTOs တဖၣ်န့ၣ်​ ကဲဘျုးလၢ တၢ်ကွဲးကျိာ်ထံတၢ် ကဂ့ၤထီၣ်အဂီၢ်ဧါ. မ့ၢ်, ပှၤဖးလံာ်ဖိလၢ အကကွဲၢ်န့ၣ်​ တဲဝဲလၢ အကဲဘျုးဝဲလီၤ. ဒီပုၢ်ဝဲၢ် စဲဒြ့ၤ လၢအမ့ၢ်ပှၤကွဲးကျိာ်ထံတၢ်လၢ ခီကိၣ်​ လၢအအိၣ်လၢ ဒံၣ်မိၣ်ခြဲးထ့း ရံၣ်ဖၢဘလံး ခိကိၣ်န့ၣ်​ ပာ်ဖျါထီၣ်ဝဲလၢ “ဘၣ်ဃးဒီး ပတၢ်ကွဲးကျိာ်ထံတၢ်အကျိၤအကျဲလၢ ခီကိၣ်န့ၣ်​ ဒီပုၢ်ဝဲၢ်မုၣ်ခွါတနီၤ ကိးဝဲလၢ ‘တၢးထီခိးတၢ်လၢ ခီကိၣ်ကျိာ်’ မ့ၢ်လၢပသူတၢ်ကတိၤတဖၣ်န့ၣ်​ လီၤဆီဒီး ပှၤလီၢ်ကဝီၤဖိတဖၣ်​ သူဝဲလၢမုၢ်ဆ့ၣ်မုၢ်ဂီၤအဃိလီၤ. ဘၣ်ဆၣ်​ ခဲအံၤန့ၣ်​ အဝဲသ့ၣ်တဲဝဲလၢ ပလံာ်လဲၢ်တဖၣ်​ ဘၣ်တၢ်ကွဲးကျိာ်ထံအီၤလၢ တၢ်ကတိၤလၢ ပှၤသူအီၤလၢမုၢ်ဆ့ၣ်မုၢ်ဂီၤလီၤ.”

 အဲဒံလဲး လၢအမ့ၢ် ပှၤကွဲးကျိာ်ထံတၢ်လၢ ခိၣ်စါ လၢအအိၣ်လၢ ကလံၤထံး အၤဖြံၤကၤန့ၣ်​ တဲဝဲလၢ ပနၢ်ဟူဘၣ်လၢ “ပှၤအါတက့ၢ် တဲပှၤလၢ အဝဲသ့ၣ်​ ပာ်သူၣ်ပာ်သးဘၣ်ဝဲလၢ တၢ်ကွဲးကျိာ်ထံတဖၣ်န့ၣ်​ ဆီတလဲအသးလီၤ.” အဝဲတဲစ့ၢ်ကီးဝဲလၢ “ပှၤဖိသၣ်လၢ အဖးတ့ၢ်ဝဲတၢးထီခိးလၢ ကီၤလၤဝါကျိာ်တဖၣ်န့ၣ်​ ခဲအံၤအဝဲသ့ၣ်​ ဖးက့ၤဝဲလၢ ခိၣ်စါကျိာ်လီၤ. လီၤဆီဒၣ်တၢ် ဟီၣ်ခိၣ်သီ တၢ်ကွဲးကျိာ်ထံ လံာ်စီဆှံ လၢဘၣ်တၢ်မၤဂ့ၤထီၣ်က့ၤအီၤန့ၣ်​ ပှၤသူဝဲတၢ်ကတိၤလၢ ပှၤနၢ်ပၢၢ်ဘၣ်အီၤညီအဃိ အဝဲသ့ၣ်ဘၣ်သူၣ်ဘၣ်သးဝဲဒိၣ်မးလီၤ.”

 RTOs တၢ်ဖံးတၢ်မၤတဖၣ်, တၢ်ကွၢ်ထွဲဘှီဂ့ၤထီၣ်က့ၤ ဒီးပှၤမၤတၢ်ဖိတဖၣ်အဂီၢ် တၢ်လၢာ်ဘူၣ်လၢာ်စ့န့ၣ် ပသူဝဲတၢ်မၤဘူၣ်လၢ ပှၤဟ့ၣ်လီၤလၢ ဟီၣ်ခိၣ်ဒီဘ့ၣ်တၢ်မၤအဂီၢ်လီၤ. ပၣ်ဃုာ်စ့ၢ်ကီးဒီး တၢ်မၤဘူၣ်လၢ ပှၤဟ့ၣ်လီၤလၢ donate.isa4310.com အပူၤလီၤ.