ပှၤကွဲးကျိာ်ထံတၢ်ဖိခံဂၤ လၢအထၢနုာ်လီၤက့ၤ ကစၢ်ယွၤအမံၤလၢ လံာ်စီဆှံအသီတကတြူၢ်ပူၤ
တၢ်ဃ့ထုကဖၣ် လၢယ့ၣ်ၡူးသိၣ်လိဝဲ အပျဲၢ်အဘီၣ်န့ၣ် မ့ၢ်ဝဲတၢ်ဃ့ထုကဖၣ် လၢပှၤအါဂၤ မၤလိဘၣ်ဝဲ အဆိကတၢၢ်. တၢ်ဃ့ထုကဖၣ်အံၤန့ၣ် ပထံၣ်န့ၢ်အီၤလၢ လံာ်စီဆှံလၢ အသီတကတြူၢ်အပူၤ. တၢ်ဃ့ထုကဖၣ်အံၤ တဲဝဲလၢ “ပပၢ်အိၣ်လၢမူခိၣ်ဧၢ, မ်နမံၤ ဘၣ်တၢ်ပာ်စီဆှံအီၤတက့ၢ်.” (မးသဲ ၆:၉) လံာ်စီဆှံ အသီတကတြူၢ် လၢကီၤလၤဝါအလံာ်စီဆှံတဖၣ်အပူၤ ကစၢ်ယွၤအမံၤလၢအမ့ၢ် “ယဟိဝၤ” မ့တမ့ၢ် “ယၤဝ့” န့ၣ်ပတထံၣ်ဘၣ်အီၤကြီကြီဘၣ်. ဘၣ်ဆၣ် ယွၤလၢအကမၣ်တဖၣ် အမံၤန့ၣ် ပထံၣ်ဘၣ်အီၤ. အဒိ ဖဲန့ၣ်န့ၣ် ပှၤကွဲးဖျါထီၣ် အဝဲသ့ၣ်အမံၤ လၢအမ့ၢ် ကစၢ်စူ, ကစၢ်ဟ့ၢ်မ့ၤ ဒီးနီၢ်အၢ်တ့းမံၤ. အဃိ ယွၤလၢအမ့ၢ်အတီ ဒီးအဒုးအိၣ်ထီၣ်လံာ်စီဆှံတဂၤ အမံၤန့ၣ် ပှၤကြၢး ကွဲးဖျါထီၣ်အီၤ တမ့ၢ်ဧီၤ.—မၤတၢ် ၁၄:၁၂; ၁၉:၃၅; ၂ တံၤမသ့း ၃:၁၆.
လဲးစလီး ၡဲးဝဲ ဒီးဖြဲၤဒၢၤရံၣ် ဖးခၢၤလၢအကဲဝဲ ပှၤကွဲးကျိာ်ထံ ကီၤလၤဝါလံာ်စီဆှံန့ၣ် ဆိကမိၣ်ဝဲလၢ ပှၤကြၢးထၢနုာ်က့ၤ ကစၢ်ယွၤအမံၤ လၢလံာ်စီဆှံလၢ အသီတကတြူၢ်ပူၤ. ဘၣ်မနုၤအဃိ ပသူတၢ်ကတိၤလၢ ပှၤကြၢးထၢနုာ် “က့ၤ” လဲၣ်. မ့ၢ်လၢအဝဲသ့ၣ် ဆိကမိၣ်ဝဲလၢ လၢအခီၣ်ထံးန့ၣ် ကစၢ်ယွၤအမံၤ အိၣ်ပာ်စၢၤလၢ လံာ်စီဆှံ အသီတကတြူၢ်အပူၤ ဘၣ်ဆၣ် လၢခံန့ၣ် ပှၤထုးထီၣ်ကွံာ်အီၤ. ဘၣ်မနုၤအဃိ အဝဲသ့ၣ် ဆိကမိၣ်ဝဲ ဒ်န့ၣ်လဲၣ်.
လဲးစလီး ၡဲးဝဲ ဒီးဖြဲၤဒၢၤရံၣ် ဖးခၢၤ သ့ၣ်ညါဝဲလၢ လံာ်စီဆှံလၢ အလီၢ်လံၤတကတြူၢ်လၢ လၢအခီၣ်ထံးခါ ပှၤကွဲးအီၤလၢ ဧ့ၤဘြံၤကျိာ်န့ၣ် ကစၢ်ယွၤအမံၤ အိၣ်ဝဲ အဘျီလၢ အကထိညါ. ဘၣ်ဆၣ် လံာ်စီဆှံအသီတကတြူၢ်လၢ ပှၤကွဲးအီၤလၢအခီၣ်ထံး လၢအအိၣ်ဒီးအဝဲသ့ၣ်န့ၣ် ကစၢ်ယွၤအမံၤ အိၣ်ဝဲ သနာ်က့ ပှၤတကွဲးလီၤဝဲ ကစၢ်ယွၤအမံၤ ဒီတဖျၢၣ်ဘၣ်. a အဃိ အဝဲသ့ၣ် ဆိကမိၣ်ဝဲလၢ ဘၣ်မနုၤအဃိ ပှၤတကွဲးလီၤ ကစၢ်ယွၤအမံၤဘၣ်လဲၣ်. လဲးစလီး ၡဲးဝဲ ထံၣ်ဝဲလၢ တၢ်ကွဲးအသး အခီၣ်ထံး အသီတကတြူၢ်န့ၣ် ပှၤသူဝဲတၢ်ကတိၤလၢ တၢ်ကွဲးအသး အလီၢ်လံၤတကတြူၢ်အပူၤ ဒ်သိးဒီး တၢ်ကတိၤလၢအမ့ၢ် “ယဟိဝၤယွၤ အမူခိၣ်ကလူး.” ဘၣ်ဆၣ် ပှၤလၢအကွဲးကူဝဲ ကြံးလံာ်စီဆှံအသီတကတြူၢ်န့ၣ် လၢကစၢ်ယွၤအမံၤ အလီၢ်န့ၣ် ကွဲးဝဲလၢ ခံရီး (Kyʹri·os) လၢအခီပညီမ့ၢ်ဝဲ “ကစၢ်ယွၤ.”—၂ စီၤပၤ ၁:၃, ၁၅; မၤတၢ် ၁၃:၂၃.
တချုးလၢ လဲးစလီး ၡဲးဝဲ ဒီးဖြဲၤဒၢၤရံၣ် ဖးခၢၤ ထုးထီၣ်ဝဲ ကီၤလၤဝါ လံာ်စီဆှံဒံးဘၣ်န့ၣ် ပှၤကွဲးကျိးထံ လံာ်စီဆှံအဂၤတနီၤန့ၣ် ထၢနုာ်ဝဲကစၢ်ယွၤအမံၤလၢ လံာ်စီဆှံလၢအသီတကတြူၢ်အပူၤလံ, ဘၣ်ဆၣ် အဝဲသ့ၣ် ထၢနုာ်ဝဲထဲ စှၤကိာ်ဘျီလီၤ. b တချုးလၢ ၁၈၆၃, ဖဲ ဖြဲၤဒၢၤရံၣ် ဖးခၢၤ ထုးထီၣ်ဝဲ A Literal Translation of the New Testament ဒံးဘၣ်န့ၣ် ပှၤကွဲးကျိာ်ထံ လံာ်စီဆှံလၢ ကီၤလၤဝါကျိာ်လၢ အဖၢနုာ် ကစၢ်ယွၤအမံၤလၢ လံာ်စီဆှံအသီတကတြူၢ်အပူၤ အဘျီအါမးန့ၣ် တအိၣ်နီတဂၤဘၣ်. လဲးစလီး ၡဲးဝဲ ဒီးဖြဲၤဒၢၤရံၣ် ဖးခၢၤန့ၣ် အကဲမတၤတဖၣ်လဲၣ်.
လဲးစလီး ၡဲးဝဲ
လဲးစလီး ၡဲးဝဲ (၁၈၀၈–၁၈၆၁) န့ၣ်အမ့ၢ်ဝဲ ပီၢ်ရီ ဒီးအကဲဝဲ ကီၢ်အဲကလံး အပဒိၣ်ဖးဒိၣ် စၢၤ လဲးစလီး ၡဲးဝဲ အဖိခွါ. လဲးစလီး ၡဲးဝဲန့ၣ် အကဲဝဲ အဲကလံး တၢ်ဘါသရီာ် အပှၤကရၢဖိတဂၤ. အနာ်ဝဲ ယွၤသၢဂၤတဂၤဃီဘၣ်ဆၣ် အဝဲပာ်ကဲဝဲ ကစၢ်ယွၤအမံၤ. ဒီးဘၣ်ဃးဒီး ကစၢ်ယွၤအမံၤန့ၣ် အဝဲတဲဝဲလၢ “ယဟိဝၤယွၤ အမံၤလၢ အလီၤဘီလီၤမုၢ်.” ဖဲအဝဲကွဲးကျိာ်ထံဝဲ လံာ်မးသဲ ဒီးမၢ်ကူး အခါ အထၢနုာ်ဝဲ “ယဟိဝၤ” ၂၈ ဘျီ ဒီးလၢတၢ်ဂ့ၢ်အဘျဲၣ်တဖၣ်အပူၤန့ၣ် အကွဲးဝဲ ကစၢ်ယွၤအမံၤ ၄၆၅ ဘျီညါ.
လဲးစလီး ၡဲးဝဲန့ၣ် ဘၣ်သ့ၣ်သ့ၣ် ကမၤလိဘၣ်ဝဲ ကစၢ်ယွၤအမံၤလၢ တၢ်ကွဲးအသးအခီၣ်ထံး အလီၢ်လံၤ တကတြူၢ်လၢ ဧ့ၤဘြံၤကျိာ်အပူၤ. အဝဲတဲဝဲလၢ ပှၤကွဲးကျိာ်ထံ လံာ်စီဆှံအလီၢ်လံၤတကတြူၢ်လၢ ကြံးကျိာ် ဒီးလၢကစၢ်ယွၤအမံၤအလီၢ်န့ၣ် အပာ်လီၤက့ၤဝဲလၢ ခံရီး (Kyʹri·os) န့ၣ် “အတမ့ၢ်ပှၤလၢ အကွဲးကျိာ်ထံတၢ် တီတီလိၤလိၤဘၣ်.”
လၢ လဲးစလီး ၡဲးဝဲ အတၢ်ကွဲးကျိာ်ထံအပူၤန့ၣ် အဝဲကွဲးဖျါထီၣ်ဝဲ “ယဟိဝၤ” အဆိကတၢၢ် တဘျီ ဖဲ မးသဲ ၁:၂၀ အပူၤ. ဒီးလၢလံာ်စီဆှံတဆၢအံၤ အတၢ်ဂ့ၢ်အဘျဲၣ်အပူၤန့ၣ် အဝဲကွဲးဝဲလၢ “လၢလံာ်စီဆှံတဆၢအံၤအပူၤ ဒီးလံာ်စီဆှံအဆၢအဂၤတဖၣ်လၢ လံာ်စီဆှံအသီတကတြူၢ်အပူၤ တၢ်ကတိၤလၢအမ့ၢ် ခံရီးန့ၣ် အခီပညီမ့ၢ်ဝဲ ကစၢ်ယွၤအမံၤ ယဟိဝၤ. အဃိ ကီၤလၤဝါ တၢ်ကွဲးကျိာ်ထံအပူၤ တၢ်ကတိၤလၢအမ့ၢ် ခံရီးအလီၢ်န့ၣ် အရ့ဒိၣ်ဒိၣ်မးလၢ ပှၤကထၢနုာ်က့ၤ ကစၢ်ယွၤအမံၤ.” ဒီးအဝဲတဲစ့ၢ်ကီးလၢ “ဒ်သိးပကမၤလၤကပီၤကစၢ်ယွၤအဂီၢ် ပကဘၣ်မၤဒ်န့ၣ်. ကစၢ်ယွၤအနီၢ်ကစၢ်ဒၣ်ဝဲ ပာ်ဖျါထီၣ်န့ၢ်ပှၤလၢ အမံၤန့ၣ် မ့ၢ်ဝဲယဟိဝၤ. အဃိ ဖဲပတဲဘၣ်ပှၤဂၤလၢ အဂ့ၢ်အခါ ပကဘၣ်တဲဖျါထီၣ်အမံၤ. ပမ့ၢ်မၤဒ်န့ၣ်န့ၣ် မ့ၢ်ကျဲအဂ့ၤကတၢၢ်လၢ ပမၤလၤကပီၤအီၤ.” ဒီးအဝဲ တဲကဒီးဝဲလၢ “လံာ်စီဆှံလၢအမ့ၢ် Established, Authorized ဒီးခ့ကၠ့ ဘၢၡၢၤ အပူၤန့ၣ် တၢ်ကတိၤလၢအမ့ၢ် ယဟိဝၤန့ၣ် ပတထံၣ်ဘၣ်အီၤ အါအါဘၣ်. . . . လၢကစၢ်ယွၤအမံၤအလီၢ်န့ၣ် ပထံၣ်ဘၣ်ပှၤကွဲးဝဲလၢ ကစၢ်ယွၤ.” လဲးစလီး ၡဲးဝဲ တဲဝဲလၢ လၢကစၢ်ယွၤအမံၤ ယဟိဝၤအလီၢ် ပှၤထၢနုာ်က့ၤလၢ “ကစၢ်ယွၤန့ၣ် တကြၢးတဘၣ်နီတစဲးဘၣ်.” အဝဲတဲဝဲလၢ အီၤနာ်က့ လၢအထံအကီၢ် ဒီးအအိၣ်တၢ်လီၢ်န့ၣ် ပှၤကိးအီၤလၢ “ကစၢ်ယွၤ” စ့ၢ်ကီး.
လဲးစလီး ၡဲးဝဲ တဲဝဲလၢ “ကစၢ်ယွၤ အနီၢ်ကစၢ်ဒၣ်ဝဲ ပာ်ဖျါထီၣ်န့ၢ်ပှၤလၢ အမံၤန့ၣ် မ့ၢ်ဝဲယဟိဝၤ. အဃိ ဖဲပတဲဘၣ်ပှၤဂၤလၢ အဂ့ၢ်အခါ ပကဘၣ်တဲဖျါထီၣ်အမံၤ. ပမ့ၢ်မၤဒ်န့ၣ်န့ၣ် မ့ၢ်ကျဲအဂ့ၤကတၢၢ်လၢ ပမၤလၤကပီၤအီၤ.”
ဖဲ ၁၈၅၉ န့ၣ် လဲးစလီး ၡဲးဝဲ ထုးထီၣ်ဝဲ လံာ်မးသဲလၢ အကွဲးကျိာ်ထံဝဲ. ဒီးဖဲ ၁၈၆၁ န့ၣ်အထုးထီၣ်ဝဲ လံာ်မးသဲ ဒီးလံာ်မၢ်ကူး တပူၤဃီ. ဖဲ လါယနူၤအါရံၤ ၁၁, ၁၈၆၁ န့ၣ် အဝဲသံဝဲ ဒီးဖဲအသံအခါ အသးနံၣ်အိၣ် ၅၂ နံၣ်. အဃိ အတၢ်မၤတခါန့ၣ် ပတုာ်ဝဲ. သနာ်က့ တၢ်လၢအမၤတ့ၢ်ဝဲတဖၣ်န့ၣ် တကဲထီၣ် တၢ်ကလီကလီဘၣ်.
ဖြဲၤဒၢၤရံၣ် ဖးခၢၤ
ဖြဲၤဒၢၤရံၣ် ဖးခၢၤ (၁၈၀၄-၁၈၈၈) န့ၣ်အကဲဝဲ ပှၤမၤစံပွါယ့ ဒီးအဝဲဖးဘၣ်ဝဲ လံာ်မးသဲလၢ လဲးစလီး ၡဲးဝဲ ကွဲးကျိာ်ထံဝဲ. ဒီးအဝဲ စးထီၣ်ကွဲးကျိာ်ထံဝဲ လံာ်စီဆှံအသီတကတြူၢ် ဖဲအသးနံၣ်အိၣ် ၂၀ အခါ. သနာ်က့ အဝဲတနာ်ဝဲ ယွၤသၢဂၤတဂၤဃီ ဒ်လဲးစလီး ၡဲးဝဲ နာ်ဝဲအသိးဘၣ်. အဝဲကွဲးဝဲလၢ “မ် ကစၢ်ယွၤ အဖိသးဘိလၢ သရိာ်ပူၤခဲလၢာ် . . . တူၢ်လိာ်ဝဲ တၢ်မ့ၢ်တၢ်တီ . . . ဒီးဘူၣ်ထီၣ်ဘါထီၣ် သ့တၢ်လၢာ်ကစၢ် ယဟိဝၤယွၤ ထဲတဂၤဧိၤတက့ၢ်.” ဖြဲၤဒၢၤရံၣ် ဖးခၢၤ တူၢ်ဘၣ်ဝဲလၢ လံာ်စီဆှံအသီတကတြူၢ်လၢ ပှၤကွဲးအီၤ လၢအခီၣ်ထံးန့ၣ် လၢကစၢ်ယွၤ ဒီးကစၢ်ယ့ၣ်ၡူး အလီၢ်န့ၣ် အသူဝဲ တၢ်ကတိၤတဖျၢၣ်ဃီ လၢအမ့ၢ် ခံရီး. အဃိ တၢ်ကတိၤလၢအကဲ ခံရီးအံၤ အအဲၣ်ဒိးတဲဝဲ ကစၢ်ယွၤဧါ, ကစၢ်ယ့ၣ်ၡူးဧါန့ၣ် အတသ့ၣ်ညါဝဲလီၤတံၢ်ဘၣ်. အဃိ ဖဲအဝဲထံၣ်ဝဲလၢ တၢ်ကတိၤလၢ အကဲ ခံရီးအလီၢ်တနီၤန့ၣ် လဲးစလီး ၡဲးဝဲ ကွဲးဝဲလၢ “ယဟိဝၤ” အခါ အဝဲ အဲၣ်ဒိးဃုသ့ၣ်ညါအါထီၣ်ဝဲ.
ဖြဲၤဒၢၤရံၣ် ဖးခၢၤ သ့ၣ်ညါဝဲ တၢ်ဂ့ၢ်တခါအံၤဒ်လဲၣ်. အီၤန့ၣ် အမၤလိဝဲ ကြံးကျိာ် ဒီးအကွဲးဝဲ ကြံးအလံာ်ကြၣ်မၢ် (Greek grammar) တဘျုးဘ့ၣ်ညါ. ဒီးအဝဲပၣ်ဃုာ်လၢ Anglo-Biblical Institute အကျါ. တၢ်ကရၢကရိတခါအံၤန့ၣ် ဃုသ့ၣ်ညါဝဲ လံာ်စီဆှံ တၢ်ကွဲးအသးအခီၣ်ထံး ဒ်သိး ကထုးထီၣ်ဝဲ လံာ်စီဆှံလၢ ကီၤလၤဝါကျိာ် လၢအဂ့ၤဒိၣ်ထီၣ် ကသ့အဂီၢ်. ဖဲ ၁၈၄၂ န့ၣ် ဖြဲၤဒၢၤရံၣ် ဖးခၢၤ ထုးထီၣ်ဝဲ လံာ်စီဆှံအသီတကတြူၢ်လၢ အကွဲးကျိာ်ထံဝဲ လၢအဆိကတၢၢ်. ဒီးအထုးထီၣ်ဝဲလၢ အကတြူၢ်ဆံးဆံးဖိတဖၣ်. c
ဖြဲၤဒၢၤရံၣ် ဖးခၢၤ ဂုာ်ကျဲးစၢး ထၢနုာ်က့ၤ ကစၢ်ယွၤအမံၤ
ဖြဲၤဒၢၤရံၣ် ဖးခၢၤန့ၣ် အကွဲးဝဲ တၢ်ဂ့ၢ်ဘၣ်ဃးဒီး “လၢလံာ်စီဆှံပူၤ တၢ်ကတိၤလၢအမ့ၢ် ခံရီးန့ၣ် တဘျီတခီၣ် အဲၣ်ဒိးတဲဝဲ ကစၢ်ယွၤ ဒီးတဘျီတခီၣ် အဲၣ်ဒိးတဲဝဲ ကစၢ်ယ့ၣ်ၡူး.” ဒီး “ဘၣ်မနုၤအဃိ ခံရီးန့ၣ် ပှၤသူအီၤလၢ တၢ်မံၤတၢ်သၣ်အလီၢ်အါဘျီ ဒီးပှၤတသူအီၤလၢ မံၤလၤသၣ်ကပီၤအဂီၢ်ဘၣ်လဲၣ်.”
ဖြဲၤဒၢၤရံၣ် ဖးခၢၤ ထံၣ်ဘၣ်ဝဲ လဲးစလီး ၡဲးဝဲ အတၢ်ကွဲးကျိာ်ထံ လံာ်မးသဲ လၢအထုးထီၣ်ဝဲဖဲ ၁၈၅၉ ဒီးလၢတၢ်ဂ့ၢ်အဘျဲၣ်ပူၤန့ၣ် အကွဲးဝဲဘၣ်ဃးဒီး တၢ်ကတိၤလၢအမ့ၢ် ခံရီး. ဖဲန့ၣ်အခါ အဝဲသ့ၣ်ညါထီၣ်ဝဲလၢ တၢ်ကတိၤလၢအမ့ၢ် ခံရီးအလီၢ်တနီၤန့ၣ် “ပှၤကြၢးကွဲးကျိာ်ထံအီၤလၢ ယဟိဝၤ.” အဃိ အဝဲဘှီဂ့ၤထီၣ်က့ၤ အတၢ်ကွဲးကျိာ်ထံ လံာ်စီဆှံအသီတကတြူၢ် ဒီးလၢကြံးအလံာ်ကျိၤ မ့တမ့ၢ် ကြၣ်မၢ်အဖီခိၣ် အဝဲထၢနုာ်လီၤဝဲ “ယဟိဝၤ” ဖဲတၢ်လီၢ်လၢ အဆိကမိၣ်ဝဲလၢ အကြၢးထၢနုာ်ဝဲ. A Literal Translation of the New Testament လၢဖြဲၤဒၢၤရံၣ် ဖးခၢၤ ထုးထီၣ်ဝဲအပူၤန့ၣ် ကစၢ်ယွၤအမံၤအိၣ်ဝဲ ၁၈၇ ဘျီ. လီၤဂာ်လၢ လံာ်စီဆှံလၢ ကီၤလၤဝါကျိာ်လၢ ဖြဲၤဒၢၤရံၣ် ဖးခၢၤ ကွဲးကျိာ်ထံဝဲန့ၣ် အကဲဝဲ လံာ်စီဆှံအသီတကတြူၢ် အဆိကတၢၢ်တဘ့ၣ် လၢအပၣ်ဃုာ်ဒီး ကစၢ်ယွၤအမံၤ လၢလံာ်ပူၤဒီတဘ့ၣ်. d
ဖြဲၤဒၢၤရံၣ် ဖးခၢၤ ပာ်ဖှိၣ်ဝဲ လံာ်ခံဘ့ၣ်လၢအမ့ၢ် A Collation of an English Version of the New Testament ဒီး Authorized English Version ဒီးထုးထီၣ်ဝဲဒ် လံာ်တဘ့ၣ်ဃီအသိး. အဝဲမၤဝဲဒ်န့ၣ် ဒ်သိး ပှၤကသ့ၣ်ညါဝဲလၢ လံာ်ခံဘ့ၣ်အံၤ လီၤဆီလိာ်အသးဒ်လဲၣ်အဂီၢ်. e
ပှၤထၢနုာ်လီၤက့ၤ ကစၢ်ယွၤအမံၤ လၢလံာ်စီဆှံပူၤအဃိ အကဲဘျုးဝဲဒ်လဲၣ်န့ၣ် ဖြဲၤဒၢၤရံၣ် ဖးခၢၤ ဟ့ၣ်ဝဲတၢ်အဒိတနီၤလၢ Authorized Version အပူၤ. အဒိ ဖဲလံာ်အံၤအပူၤ ဖဲ ရိမ့ၤ ၁၀:၁၃ န့ၣ်တဲဝဲလၢ “ပှၤလၢအကိးထီၣ် ကစၢ်အမံၤ ကိးဂၤဒဲးန့ၣ် ကတုၤလၢ တၢ်အုၣ်က့ၤခီၣ်က့ၤလီၤ.” အဃိ ဖြဲၤဒၢၤရံၣ် ဖးခၢၤ သံကွၢ်ဝဲလၢ “ဖဲသုဖး လံာ်စီဆှံတဆၢအံၤလၢ Authorized English Version အပူၤအခါ လံာ်စီဆှံတဆၢအံၤ အအဲၣ်ဒိးတဲဝဲ ယဟိဝၤယွၤ ဒီးအတအဲၣ်ဒိးတဲဝဲ ကစၢ်ယွၤအဖိခွါ ပကစၢ်ယ့ၣ်ၡူးဘၣ်န့ၣ် သုဆိကမိၣ်ဘၣ် တဘျီဘျီဧါ.”
ဖြဲၤဒၢၤရံၣ် ဖးခၢၤ သူဝဲအစ့ဒီဒူၣ်လၢ ကထုးထီၣ် ဒီးရၤလီၤဝဲ လံာ်ဖိ ဒီးလံာ်တဖၣ်အဂီၢ်. လၢတနံၣ်အတီၢ်ပူၤ အသူဝဲစ့ ၈၀၀ ပီၣ် (pound) ဒီးလၢပစိၤခဲအံၤန့ၣ် အလီၤလၢဝဲ ဘြံးတၢၣ် အစ့အပီၣ် ၁၀၀,၀၀၀ (အမဲရကၤ ဒီၤလၤ ၁၃၂,၀၀၀). အဝဲဆှၢလီၤဝဲ အလံာ်လဲၢ်အါမး လၢတၢ်ဘူၣ်တၢ်ဘါခိၣ်နၢ် လၢအမံၤဟူသၣ်ဖျါတဖၣ်အအိၣ် ခီလီလီ ဒ်သိး အဝဲသ့ၣ် ကဖးကဒါက့ၤဝဲအဂီၢ်.
လံာ်လဲၢ်တဖၣ် ဒီးလံာ်စီဆှံအသီတကတြူၢ်လၢ ဖြဲၤဒၢၤရံၣ် ဖးခၢၤ ကွဲးကျိာ်ထံဝဲန့ၣ် ပှၤတထုးထီၣ်အီၤအါအါဘၣ် ဒီးပှၤကူၣ်ဘၣ်ကူၣ်သ့တနီၤ ပာ်ဆံးဝဲ. အဝဲသ့ၣ် မၤဝဲဒ်န့ၣ်အဃိ လီၤဂာ်ဒ်သိးဒီး အဝဲသ့ၣ် တပာ်လုၢ်ပာ်ပှ့ၤဝဲ ဖြဲၤဒၢၤရံၣ် ဖးခၢၤ, လဲးစလီး ၡဲးဝဲ ဒီးပှၤဂၤတဖၣ် အတၢ်ဂုာ်ကျဲးစၢးလၢ ကဖၢနုာ်က့ၤဝဲ ကစၢ်ယွၤအမံၤလၢ ကီၤလၤဝါလံာ်စီဆှံ အသီတကတြူၢ်အပူၤဘၣ်.
ဒ်သိးနကသ့ၣ်ညါအါထီၣ်တၢ်ဂ့ၢ်အဂီၢ် နကွၢ်တၢ်ဂီၤမူတခါအံၤ သ့စ့ၢ်ကီး–တၢ်လဲၤဟးတၢ်ကွၢ်ကီလီၢ် ဝီဝံး(ခ်)—“လံာ်စီဆှံ ဒီးကစၢ်ယွၤအမံၤ”
a “ယၤ” န့ၣ်အကဲဝဲ “ယဟိဝၤယွၤ” အမံၤလၢအဖုၣ် လၢပထံၣ်ဘၣ်အီၤဖဲ လီၣ်ဖျါ ၁၉:၁, ၃, ၄, ၆ အပူၤ. ဖဲန့ၣ်အကွဲးဝဲလၢ “ဟါလ့ၤလူယၤ” ဒီးအခီပညီမ့ၢ်ဝဲ “စံးထီၣ်ပတြၢၤ ယဟိဝၤ.”
b လဲးစလီး ၡဲးဝဲ တကွဲးကျိာ်ထံဝဲ လံာ်စီဆှံလၢအသီတကတြူၢ် ဒီဘ့ၣ်ဘၣ်. ပှၤကွဲးကျိာ်ထံတၢ်ဖိအဂၤ လၢအမ့ၢ် ဖံလံး ဒီးဒြ့း, အဲၣ်ဒဝဲၤ ဟါဝူး, ဝ့လံၤယၢၤ နၠူခါ, အဲကၤ ထ့လၢၤ ဒီးက့ဘၢၤ ဝံးဖံ ကွဲးဝဲစ့ၢ်ကီး.
c လၢတၢ်ဘူၣ်တၢ်ဘါလံာ်လဲၢ် ဒီးလံာ်စီဆှံလၢ အကွဲးကျိာ်ထံဝဲအပူၤန့ၣ် ဖြဲၤဒၢၤရံၣ် ဖးခၢၤ သူဝဲ အမံၤအဂၤတဖျၢၣ်လၢအမ့ၢ် ဟၢမဲၤ ဟဲဖံထၢၤ ဒ်သိး အတၢ်ဃုသ့ၣ်ညါလံာ်စီဆှံ အတၢ်မၤ တဘံဘူလိာ်သးဒီး အစံပွါယ့အတၢ်မၤအဂီၢ်. လၢတၢ်ဂ့ၢ်ဘၣ်ထွဲလိာ်သးလၢ ဟီၣ်ခိၣ်သီ တၢ်ကွဲးကျိာ်ထံလံာ်စီဆှံ အပူၤန့ၣ် ဟၢမဲၤ ဟဲဖံထၢၤ အမံၤအိၣ်ဝဲ တဘျုးဘျီညါ.
d ဖဲ ၁၈၆၄ န့ၣ် ဖြဲၤဒၢၤရံၣ် ဖးခၢၤ ထုးထီၣ်ဝဲ လံာ်စီဆှံလၢအမ့ၢ် An English Version of the New Testament ဒီးဖဲန့ၣ်န့ၣ် ကစၢ်ယွၤအမံၤပၣ်ဝဲ ၁၈၆ ဘျီညါ.
e တချုးလၢ ဖြဲၤဒၢၤရံၣ် ဖးခၢၤ ထုးထီၣ်အလံာ်စီဆှံဒံးဘၣ်န့ၣ် လၢလံာ်စီဆှံအသီတကတြူၢ်လၢ ပှၤကွဲးအီၤလၢ ဧ့ၤဘြံၤကျိာ်အါဘ့ၣ်အပူၤန့ၣ် ကစၢ်ယွၤအမံၤအိၣ်ဝဲ လၢလံာ်စီဆှံအဆၢဖိတဖၣ်အပူၤ တဘျုးဆၢညါ. ဖဲ ၁၇၉၅ န့ၣ်ကၠိဝါနၢၤ ကၠဲခီး စတိ ထုးထီၣ်ဝဲ လံာ်စီဆှံလၢ ပှၤကွဲးကျိာ်ထံအီၤလၢ ကၠၢမၢၤအကျိာ် ဒီးလံာ်မးသဲ တုၤလၢယူဒၤအပူၤန့ၣ် ကစၢ်ယွၤအမံၤ ပၣ်ဃုာ်ဝဲ အဘျီ ၉၀ ဘျဲၣ်ညါ.