တမ့ၢ်ဘၣ်. တၢ်လၢကစၢ်ယွၤအဘီအမုၢ်န့ၣ်​ တမ့ၢ်ဝဲတၢ်အိၣ်သးတခါလၢ အအိၣ်လၢ ပှၤဟီၣ်ခိၣ်ဖိအသးကံၢ်ပူၤဘၣ်. a လံာ်စီဆှံပာ်ဖျါထီၣ်ဝဲလၢ ကစၢ်ယွၤအဘီအမုၢ်အိၣ်လၢ တၢ်လီၢ်ဖဲလဲၣ်န့ၣ်လီၤ. ဒီးအကိးဝဲတၢ်လီၢ်အံၤလၢ “မူခိၣ်အဘီအမုၢ်”လီၤ. (မးသဲ ၄:၁၇) အခဲအံၤ ပကတဲသကိးဘၣ်ဃးဒီး တၢ်ဂ့ၢ်အံၤ. လံာ်စီဆှံပာ်ဖျါထီၣ်န့ၢ်ပှၤလၢ ကစၢ်ယွၤအဘီအမုၢ်န့ၣ်​ မ့ၢ်ဝဲ တၢ်ပၢတၢ်ပြးတခါလၢ အအိၣ်လၢမူခိၣ်လီၤ.

•   ကစၢ်ယွၤအဘီအမုၢ်န့ၣ်​ အိၣ်ဒီးပှၤပၢတၢ်တဖၣ်, ပှၤဒိးပၢသးတဖၣ်​ ဒီးတၢ်သိၣ်တၢ်သီတဖၣ်လၢ ကဒုးအိၣ်ထီၣ်ကစၢ်ယွၤ အတၢ်ဘၣ်သးလၢမူခိၣ်ဒီးဟီၣ်ခိၣ်လီၤ. မးသဲ ၆:၁၀; လီၣ်ဖျါ ၅:၁၀

•   ကစၢ်ယွၤ အတၢ်ပၢတၢ်ပြးအံၤ မ့တမ့ၢ် အဘီအမုၢ်အံၤ ကပၢဝဲ “ပှၤဂီၢ်မုၢ်, ပှၤကလုာ် ဒီးပှၤလၢအတဲကျိာ် အကလုာ်ကလုာ်” လၢအအိၣ်လၢ ဟီၣ်ခိၣ်ချၢ. (ဒၤနံးယ့လး ၇:၁၃, ၁၄) တၢ်ပၢတၢ်ပြး အတၢ်စိကမီၤသ့ၣ်တဖၣ်န့ၣ်​ ဟဲဝဲလၢ ကစၢ်ယွၤအအိၣ်လီၤ.—စံးထီၣ်ပတြၢၤ ၂:၄-၆; ယၡါယၤ ၉:၇.

•   ယ့ၣ်ၡူးတဲဝဲလၢ အတၢ်မၢဖိလၢအသးတီသ့ၣ်တဖၣ်န့ၣ်​ ကပၢဃုာ်တၢ်ဒီးအီၤလၢ မူခိၣ်အဘီအမုၢ်အပူၤဒီး “ကဆ့ၣ်နီၤလၢ လီၢ်ပစိာ်အလိၤ.”—လူၤကၣ် ၂၂:၂၈, ၃၀.

•   ကစၢ်ယွၤအတၢ်ပၢတၢ်ပြးအံၤ အိၣ်ဒီးအဒုၣ်အဒါတဖၣ်ဘၣ်ဆၣ်​ အဝဲသ့ၣ်ခဲလၢာ်န့ၣ်​ ကဘၣ်တၢ်မၤဟးဂီၤကွံာ်အီၤ.—စံးထီၣ်ပတြၢၤ ၂:၁, ၂, ၈, ၉; ၁၁၀:၁, ၂; ၁ ကရံၣ်သူး ၁၅:၂၅, ၂၆.

 လံာ်စီဆှံသိၣ်လိဝဲလၢ မူခိၣ်အဘီအမုၢ်န့ၣ်​ တအိၣ်လၢပသးကံၢ်ပူၤဘၣ်​ ဒီးတပၢတၢ်လၢ ပသးကံၢ်ပူၤစ့ၢ်ကီးဘၣ်. ဘၣ်ဆၣ်​ လံာ်စီဆှံ ပာ်ဖျါထီၣ်ဝဲလၢ “ဘီမုၢ်အဂ့ၢ်” ဒီး “ဘီမုၢ်တၢ်သးခုကစီၣ်” န့ၣ်​ နုာ်လီၤလၢပသးကံၢ်ပူၤ ဒီးထိၣ်ဟူးထိၣ်ဂဲၤထီၣ်​ ပသးသ့လီၤ.—မးသဲ ၁၃:၁၉; ၂၄:၁၄.

မ့မ့ၢ်ဒ်န့ၣ်​ “ကစၢ်ယွၤအဘီအမုၢ် အိၣ်လၢပသးကံၢ်ပူၤ” န့ၣ်အဲၣ်ဒိးတဲဝဲ အခီပညီဒ်လဲၣ်.

 ဘၣ်ဃးဒီးကစၢ်ယွၤအဘီအမုၢ် အိၣ်ဝဲတၢ်လီၢ်ဖဲလဲၣ်န့ၣ်​ ပှၤတနီၤနီၤ အခိၣ်နူာ်ဘံဘူ မ့ၢ်လၢ လံာ်စီဆှံတနီၤနီၤ ကွဲးကျိာ်ထံဝဲ လူၤကၣ်​ ၁၇:၂၁ လီၤဆီလိာ်သးအဃိလီၤ. အဒိ မ့ၤစံၣ်အတၢ်ကွဲးကျိာ်ထံန့ၣ်​ ကွဲးကျိာ်ထံဝဲလၢ “ယွၤအဘီအမုၢ်အိၣ်လၢ သုသးကံၢ်ပူၤလီၤ.” ဒ်သိးပကသ့ၣ်ညါ တၢ်ဂ့ၢ်အံၤ အခီပညီလီၤတံၢ်လီၤဆဲးအဂီၢ် ပကဘၣ်ဆိကမိၣ်ထံ တၢ်ကတိၤလၢအလီၢ်ခံမဲာ်ညါလၢ အအိၣ်လၢ လံာ်စီဆှံအပူၤလီၤ.

 ဖဲယ့ၣ်ၡူးတဲတၢ်ကတိၤအံၤအခါ ပာ်သူၣ်ပာ်သးလၢ အဝဲတဲတၢ်ဒီးပှၤဖးရံၤၡဲတဖၣ်. အဝဲသ့ၣ်တဖၣ်န့ၣ်​ မ့ၢ်ဝဲ တၢ်ဘူၣ်တၢ်ဘါခိၣ်နၢ်တဖၣ်လၢ အထီဒါယ့ၣ်ၡူး ဒီးကူၣ်ထီၣ်ဝဲလၢ ကမၤသံယ့ၣ်ၡူးလီၤ. (မးသဲ ၁၂:၁၄; လူၤကၣ်​ ၁၇:၂၀) ဒီးယ့ၣ်ၡူး တဲအဝဲသ့ၣ်လၢ “လၢသုသးပူၤန့ၣ်ပှဲၤဒီး တၢ်ပာ်မၤသး ဒီးတၢ်တတီတလိၤဘၣ်လီၤ.”(မးသဲ ၂၃:၂၇, ၂၈) ဒီးပှၤသ့ၣ်တဖၣ်အံၤ အသးပူၤန့ၣ်အိၣ်ပှဲၤဝဲဒီး တၢ်အၢတၢ်သီတဖၣ်အဃိ မ့ၢ်ကစၢ်ယွၤအဘီအမုၢ်အိၣ်လၢ အသးကံၢ်ပူၤဘၣ်ကသ့ဧါ.

 မ့မ့ၢ်လံာ်စီဆှံတၢ်ကွဲးကျိာ်ထံလၢ အဂၤတဘ့ၣ်န့ၣ်​ ကွဲးဖျါထီၣ်ယ့ၣ်ၡူးအတၢ်ကတိၤဖဲ လူၤကၣ်​ ၁၇:၂၁ ဒီးတဲဝဲလၢ “ကစၢ်ယွၤအဘီအမုၢ်န့ၣ်​ အိၣ်ဒီးသုလီၤ.” (Italics ours; Contemporary English Version) “ကစၢ်ယွၤအဘီမုၢ်န့ၣ်​ အိၣ်လၢသုခၢၣ်သးလီၤ.” (New World Translation,) ဖဲယ့ၣ်ၡူးတဲ ပှၤဖးရံၤၡဲလၢ ကစၢ်ယွၤ အဘီမုၢ်လၢ “အိၣ်ဒီး” မ့တမ့ၢ် “အိၣ်လၢသုခၢၣ်သး” အခါန့ၣ်​ အဲၣ်ဒိးတဲဝဲလၢ ယ့ၣ်ၡူးလၢအမ့ၢ် ပှၤလၢအဘၣ်တၢ်ဃုထၢထီၣ်အီၤ ဒ်ကစၢ်ယွၤအဘီအမုၢ်စီၤပၤတဂၤအသိးန့ၣ်​ ဆၢထၢၣ်ဝဲလၢ အဝဲသ့ၣ်အကျါ မ့တမ့ၢ် အဝဲသ့ၣ်အခၢၣ်သးလီၤ.—လူၤကၣ်​ ၁:၃၂, ၃၃.