မံၤက့လးန့ၣ်​ တၢ်ဘူၣ်တၢ်ဘါတနီၤ သိၣ်လိဝဲလၢ အကဲ ပှၤစီဆှံတဂၤ အမံၤ ဒီးမံၤတဖျၢၣ်အံၤန့ၣ်​ အကဲဝဲ ယ့ၣ်ၡူးအမံၤလၢ မူခိၣ်. a ဘၣ်တဘျီ ဖဲစီၤမိၤၡ့ သံဝံၤအလီၢ်ခံန့ၣ်​ မံၤက့လး တဲအါလိာ်သးဒီး မုၣ်ကီၤလံၢ်. ဒီးမံၤက့လးန့ၣ်​ အဝဲ မၤစၢၤစ့ၢ်ကီး မူခိၣ်ကလူးတဂၤ လၢကလဲၤတဲဘၣ်​ ဝံဒၤနံးယ့လး လၢကစၢ်ယွၤ အတၢ်ကစီၣ်. (ဒၤနံးယ့လး ၁၀:၁၃, ၂၁; ယူဒၤ ၉) မံၤက့လးန့ၣ်​ အခီပညီမ့ၢ်ဝဲ “မတဂၤလီၤဂာ်ဒီး ကစၢ်ယွၤလဲၣ်.” ဒီးပထံၣ်ဘၣ်လၢ မံၤက့လး အိၣ်မူဒ် အမံၤအခီပညီ အိၣ်ဝဲအသိး ခီဖျိ အဒီသဒၢ ကစၢ်ယွၤ အတၢ်ပၢအခွဲး ဒီးဒုးဝဲ ကစၢ်ယွၤ အဒုၣ်အဒါတဖၣ်လီၤ.—ဒၤနံးယ့လး ၁၂:၁; လီၣ်ဖျါ ၁၂:၇.

 ယ့ၣ်ၡူးန့ၣ်​ ဘၣ်မနုၤအဃိ ပတဲသ့လၢ အကဲ မူခိၣ်ကလူးအခိၣ်​ မံၤက့လးလဲၣ်.

•   မံၤက့လးန့ၣ်​ အကဲ မူခိၣ်ကလူးအခိၣ်​ လၢအဟ့ၣ်လီၤ တၢ်ကလုၢ် လၢမူခိၣ်ကလူး အသုးမုၢ်သံၣ်ဘိတဖၣ်​ အအိၣ်. (ယူဒၤ ၉) မံၤလၤသၣ်ကပီၤတဖျၢၣ်အံၤန့ၣ်​ မ့ၢ်ဝဲထဲလၢ ပှၤတဂၤအဂီၢ်အဃိ ပသ့ၣ်ညါလၢ ပှၤလၢအန့ၢ်ဘၣ်​ မံၤလၤသၣ်ကပီၤတဖျၢၣ်အံၤန့ၣ်​ အိၣ်ထဲတဂၤလီၤ. မံၤလၤသၣ်ကပီၤတဖျၢၣ်အံၤန့ၣ် အအိၣ်လၢ လံာ်စီဆှံအဆၢဖိ ထဲခံဆၢအပူၤ. ဒီးယ့ၣ်ၡူးန့ၣ်​ အကဲဝဲ မူခိၣ်ကလူးအခိၣ်​ မံၤက့လးအဃိ အဝဲအိၣ်ဒီး မူခိၣ်ကလူးအခိၣ်အကလုၢ်လီၤ. ဘၣ်မနုၤအဃိလဲၣ်န့ၣ်​ လၢလံာ်စီဆှံ ခံဆၢအံၤ အကျါတဆၢန့ၣ်​ တဲဝဲလၢ ကစၢ်ယ့ၣ်ၡူး လၢအဂဲၤဆၢထၢၣ်သမူထီၣ်က့ၤန့ၣ်​ “ကဟဲလီၤလၢမူခိၣ်လီၤ. အကကိးပသူထီၣ်ဖးဒိၣ်လၢ မူခိၣ်ကလူးအခိၣ်​ အကလုၢ်” လီၤ. (၁ သ့းစၤလနံ ၄:၁၆) တကးဒံးဘၣ်​ လံာ်စီဆှံ ပာ်ဖျါထီၣ်ဝဲလၢ “မံၤက့လး ဒီးအမူခိၣ်ကလူးတဖၣ်န့ၣ်​ ဒုးတၢ်ဒီးပယိၤ” လၢအမ့ၢ် မုၣ်ကီၤလံၢ်. (လီၣ်ဖျါ ၁၂:၇) မံၤက့လးန့ၣ်​ ပှၤကိးအီၤလၢ “ပှၤခိၣ်ပှၤနၢ်လၢ အပတီၢ်ထီ ကတၢၢ်တဖၣ်အကျါတဂၤ” ဒီး “ပှၤခိၣ်ပှၤနၢ်ဖးဒိၣ်တဂၤ” အဃိ လၢပှၤနီၢ်သးဖိတဖၣ်အကျါန့ၣ်​ အဝဲအိၣ်ဒီး အလီၢ်အလၤဖးဒိၣ်ညါ. (ဒၤနံးယ့လး ၁၀:၁၃, ၂၁; ၁၂:၁) ဒ့ဘ့ၤ အံအီ လၢအမ့ၢ် ပှၤကူၣ်ဘၣ်ကူၣ်သ့ လၢအဘၣ်ဃးဒီး လံာ်စီဆှံအသီတကတြူၢ်န့ၣ်​ ပာ်ဖျါထီၣ်ဝဲလၢ မံၤလၤသၣ်ကပီၤသ့ၣ်တဖၣ်အံၤ ပာ်ဖျါထီၣ်ဝဲဒၣ်လၢ မံၤက့လးန့ၣ်​ မ့ၢ်ဝဲဒၣ်​ မူခိၣ်ကလူး အသုးမုၢ်သံၣ်ဘိသ့ၣ်တဖၣ်​ အခိၣ်. ဒီးပှၤတဂၤလၢ အအိၣ်ဒီး တၢ်စိတၢ်ကမီၤလၢ မူခိၣ်ကလူး အသုးမုၢ်သံၣ်ဘိသ့ၣ်တဖၣ်​ အဖီခိၣ်န့ၣ်​ လံာ်စီဆှံ ပာ်ဖျါထီၣ်ဝဲ အမံၤလၢအဂၤ အိၣ်ဒံးဝဲတဖျၢၣ်လီၤ. ဘၣ်ဃးဒီးမံၤအံၤန့ၣ်​ လံာ်စီဆှံ ပာ်ဖျါထီၣ်ဝဲလၢ ‘ဖဲတၢ်လီၣ်ဖျါထီၣ်​ ပကစၢ် ယ့ၣ်ၡူးအခါ . . . အဝဲကဟဲလၢမူခိၣ်​ အိၣ်ဒီး အမူခိၣ်ကလူးတဖၣ်​ လၢအပှဲၤဒီးတၢ်စိတၢ်ကမီၤ လၢမ့ၣ်အူလၣ်အပူၤ ဒ်သိးကဟ့ၣ်ကၣ်က့ၤတၢ်.’ (၂ သ့းစၤလနံ ၁:၇, ၈; မးသဲ ၁၆:၂၇) ယ့ၣ်ၡူးန့ၣ်​ “က့ၤထီၣ်လၢ မူခိၣ်​ . . . ဒီးမူခိၣ်ကလူးတဖၣ်, တၢ်ကဲခိၣ်ကဲနၢ်တဖၣ်​ ဒီးတၢ်စိတၢ်ကမီၤတဖၣ်န့ၣ်​ ဘၣ်တၢ်ပာ်လီၤအီၤလၢ အဖီလာ်လီၤ.” (၁ ပ့းတရူး ၃:၂၁, ၂၂) ပမ့ၢ်ဘၣ်ကွၢ်န့ၣ်​ တမ့ၢ်လၢ ကစၢ်ယွၤ ကပာ်ထီၣ်​ မူခိၣ်ကလူးအခိၣ်​ ခံဂၤဘၣ်. အဃိ ပတဲသ့လၢ မံၤက့လးဒီးယ့ၣ်ၡူးန့ၣ်​ အကဲပှၤတဂၤဃီလီၤ.

•   မံၤက့လး “ကဆၢထၢၣ်ဝဲ . . . ဖဲတၢ်ကိၢ်တၢ်ဂီၤ အဆၢကတီၢ်.” (ဒၤနံးယ့လး ၁၂:၁) လၢလံာ်ဒၤနံးယ့လးအပူၤန့ၣ်​ တၢ်ကတိၤလၢအမ့ၢ် “ဆၢထၢၣ်” န့ၣ်ညီနုၢ် ပှၤသူအီၤအခါဖဲ စီၤပၤတဂၤဟူးထီၣ်​ ဒ်သိးကဟံးထီၣ်ဖီၣ်ထီၣ်​ မူဒါလီၤဆီတမံၤမံၤအဂီၢ်. (ဒၤနံးယ့လး ၁၁:၂-၄, ၂၁) အဃိ ယ့ၣ်ၡူးခရံာ် လၢအမ့ၢ် “ကစၢ်ယွၤ အကလုၢ်” န့ၣ်ကဟံးထီၣ်ဖီၣ်ထီၣ်မူဒါဒ် “စီၤပၤတဖၣ်​ အစီၤပၤ” အသိး ဒီးကမၤဟးဂီၤကွံာ် ကစၢ်ယွၤ အဒုၣ်အဒါတဖၣ်​ ဒီးကဒီသဒၢ ကစၢ်ယွၤ အပှၤဂီၢ်မုၢ်. (လီၣ်ဖျါ ၁၉:၁၁-၁၆) ယ့ၣ်ၡူးခရံာ် ကမၤဝဲဒ်အံၤ “ဖဲတၢ်နးတၢ်ဖှီၣ်ဖးဒိၣ်” အခါ “ဒီးလၢဟီၣ်ခိၣ်​ ကဲထီၣ်သီလံၤလံၤ တုၤလီၤလၢ ဆၢကတီၢ်ခဲအံၤန့ၣ်​ တၢ်နးတၢ်ဖှီၣ်​ တကဲထီၣ်အသးဒ်အံၤ နီတဘျီဒံးဘၣ်.”—မးသဲ ၂၄:၂၁, ၄၂.