Di nyuz ful-ɔp wit ripɔt dɛn bɔt wɔ, pipul dɛn we de tɔk ɛn du tin dɛn we de sho se dɛn et dɛnsɛf, dɛn de tek wan pɔsin bɛtɛ pas ɔda pɔsin, ɛn dɛn de atak ɔda pipul dɛn jɔs bikɔs dɛn kɔmɔt difrɛn say.

•   “Di wɔ bitwin Izrɛl ɛn Gaza ɛn di we aw pipul dɛn lɛk fɛt-fɛt de mek bɔku pipul dɛn de tɔk tin dɛn na soshal midia we de sho se dɛn et dɛnsɛf.”​—The New York Times, Novɛmba 15, 2023.

•   “Frɔm Ɔktoba 7, mɔ ɛn mɔ pipul dɛn de tɔk tin dɛn we de sho se dɛn et dɛnsɛf ɛn dɛn lɛk fɛt-fɛt. Dis de apin bikɔs na naw mɔ pipul dɛn de tek wan pɔsin bɛtɛ pas ɔda pɔsin.”​—Dennis Francis, president of the United Nations General Assembly, Novɛmba 3, 2023.

 Nɔto tide pipul dɛn bigin put an pan wɔ, fɛt-fɛt, ɔ fɔ tɔk tin dɛn we de sho se dɛn et dɛnsɛf. Infakt, di Baybul tɔk bɔt pipul dɛn we bin de trade we bin de tɔk “bad bad wɔd dɛn [we] tan lɛk aro dɛn,” ɛn dɛn bin lɛk wɔ ɛn fɛt-fɛt. (Sam 64:​3; 120:​7; 140:​1) Bɔt di Baybul ɛksplen se dis et we pipul dɛn et dɛnsɛf tide gɛt impɔtant minin.

 Di Baybul sho tu rizin dɛn we mek bɔku pipul dɛn et dɛnsɛf tide.

1.  1. I bin dɔn tɔk bɔt tɛm we “plɛnti pipul dɛn lɔv go ridyus.” (Matyu 24:​12) Bifo pipul dɛn sho lɔv, dɛn go de du tin dɛn we go mek dɛn et dɛnsɛf.​—2 Timoti 3:​1-5.

2.  2. Bikɔs Setan gɛt badat ɛn i wikɛd, i de mek pipul dɛn et dɛnsɛf pasmak. Di Baybul tɔk se “di wan ol wɔl de na di wikɛd wan in an.”​—1 Jɔn 5:​19; Rɛvɛleshɔn 12:​9, 12.

 Bɔt di Baybul tɔk bak se i nɔ go te igen, Gɔd go pul di tin dɛn we de mek pipul dɛn et dɛnsɛf. Dɔn bak, i go mɛn di wan dɛn we de sɔfa bikɔs pipul dɛn et dɛnsɛf. Di Baybul prɔmis se:

•   Gɔd “go wep ɔl di kray wata na dɛn yay, ɛn day nɔ go de igen, pwɛlat ɛn pen nɔ go de igen, ɛn dɛn nɔ go kray igen bikɔs dɛn at pwɛl. Di tin dɛn we bin de apin nɔ go de igen.”​—Rɛvɛleshɔn 21:​4.