ಮನುಷ್ಯರು ಭೂಮಿಯಲ್ಲಿ ಸುಖನೆಮ್ಮದಿಯಿಂದ ಸಾವಿಲ್ಲದೆ ಬದುಕಬೇಕು ಎನ್ನುವುದು ದೇವರ ಇಷ್ಟ.

‘ಇದು ನಿಜ್ವಾಗ್ಲೂ ಸಾಧ್ಯನಾ’ ಎಂದು ನೀವು ಹುಬ್ಬೇರಿಸಬಹುದು. ಸಾಧ್ಯ ಎನ್ನುತ್ತದೆ ಬೈಬಲ್‌. ದೇವರ ಸರ್ಕಾರ ಬಂದಾಗ ಅಂಥ ಬದುಕು ನಮಗೆ ಸಿಗುತ್ತದೆ. ತನ್ನ ಆ ಸರ್ಕಾರದ ಬಗ್ಗೆ ಹಾಗೂ ಅದು ಏನು ಮಾಡುತ್ತದೆ ಎನ್ನುವುದರ ಬಗ್ಗೆ ಮಾನವರೆಲ್ಲರೂ ತಿಳಿದುಕೊಳ್ಳಬೇಕು ಎನ್ನುವುದು ದೇವರ ಇಚ್ಛೆ.—ಕೀರ್ತನೆ 37:11, 29; ಯೆಶಾಯ 9:7.

ನಾವು ಸಂತೋಷದಿಂದ ಬದುಕಬೇಕು ಎನ್ನುವುದು ದೇವರ ಇಷ್ಟ.

ಮಕ್ಕಳು ಸಂತೋಷವಾಗಿ ಇರಬೇಕೆಂದು ಬಯಸುವ ತಂದೆಯಂತೆಯೇ ನಮ್ಮ ಸೃಷ್ಟಿಕರ್ತ ದೇವರು ಸಹ ನಾವು ಸದಾಕಾಲ ಸಂತೋಷವಾಗಿ ಇರಬೇಕೆಂದು ಇಷ್ಟಪಡುತ್ತಾನೆ. (ಯೆಶಾಯ 48:17, 18) ಹಾಗಾಗಿಯೇ ‘ನನ್ನ ಚಿತ್ತವನ್ನು ಮಾಡುವವನು ಎಂದೆಂದಿಗೂ ಇರುವನು’ ಎಂದು ಆತನು ಮಾತುಕೊಟ್ಟಿದ್ದಾನೆ.—1 ಯೋಹಾನ 2:17.

ತಾನು ತೋರಿಸುವ ಮಾರ್ಗದಲ್ಲಿ ಮನುಷ್ಯರು ನಡೆಯಬೇಕು ಎನ್ನುವುದು ದೇವರ ಇಷ್ಟ.

ನಾವು ನಡೆಯಬೇಕಾದ ಮಾರ್ಗವನ್ನು ದೇವರು “ಬೋಧನೆ ಮಾಡುವನು” ಎಂದು ಬೈಬಲ್‌ ತಿಳಿಸುತ್ತದೆ. (ಯೆಶಾಯ 2:2, 3) ತನ್ನ ಇಷ್ಟವನ್ನು ಭೂಮಿಯ ಎಲ್ಲಾ ಜನರಿಗೆ ತಿಳಿಸುವ ಉದ್ದೇಶದಿಂದ ದೇವರು “ತನ್ನ ಹೆಸರಿಗಾಗಿ” ಜನರ ಗುಂಪೊಂದನ್ನು ಆರಿಸಿಕೊಂಡಿದ್ದಾನೆ.—ಅಪೊಸ್ತಲರ ಕಾರ್ಯಗಳು 15:14.

ಮನುಷ್ಯರೆಲ್ಲರೂ ತನ್ನನ್ನು ಆರಾಧಿಸುತ್ತಾ ಒಗ್ಗಟ್ಟಾಗಿರಬೇಕು ಎನ್ನುವುದು ದೇವರ ಇಷ್ಟ.

ಯೆಹೋವ ದೇವರನ್ನು ಆರಾಧಿಸುವಾಗ ಜನರಲ್ಲಿ ಪ್ರೀತಿ ಐಕ್ಯತೆ ಹೆಚ್ಚುತ್ತದೆ. ಅವರು ಭೇದಭಾವ ಮರೆತು ಒಂದಾಗುತ್ತಾರೆ. (ಯೋಹಾನ 13:35) ದೇವರನ್ನು ಐಕ್ಯಭಾವದಿಂದ ಆರಾಧಿಸುವುದು ಹೇಗೆಂದು ಯಾರು ತಿಳಿಸಿಕೊಡುತ್ತಾರೆ? ಉತ್ತರ ಈ ಕಿರುಹೊತ್ತಗೆಯಲ್ಲಿದೆ.