ನಿಜ ಏನು ಗೊತ್ತಾ?

ಕಳವಳ, ಭಯ, ಅತಿಯಾದ ಯೋಚನೆ ಇವೆಲ್ಲಾ ಚಿಂತೆಯಲ್ಲಿ ಒಳಗೂಡಿದೆ. ಯಾವಾಗ ಏನಾಗುತ್ತೇ ಅಂತ ಗೊತ್ತಿಲ್ಲದೆ ಇರುವ ಕಾರಣ ಯಾರನ್ನು ಬೇಕಾದರೂ ಚಿಂತೆ ಕಾಡಬಹುದು.

ಬೈಬಲ್‌ ಏನು ಹೇಳುತ್ತದೆ?

ಪುರಾತನ ಇಸ್ರೇಲಿನ ರಾಜ ದಾವೀದ ಹೀಗೆ ಬರೆದನು: “ನಾನು ಇನ್ನೆಷ್ಟರ ವರೆಗೆ ಹಗಲೆಲ್ಲಾ ದುಃಖಾಕ್ರಾಂತನಾಗಿ ಆಲೋಚಿಸಿಕೊಳ್ಳುತ್ತಾ ಇರಬೇಕು?” (ಕೀರ್ತನೆ 13:2) ಇದರಿಂದ ಹೊರಬರಲು ದಾವೀದನಿಗೆ ಯಾವುದು ಸಹಾಯಮಾಡಿತು? ಅವನು ಮನಸ್ಸುಬಿಚ್ಚಿ ಯೆಹೋವ ದೇವರ ಹತ್ತಿರ ತನ್ನ ಚಿಂತೆಗಳನ್ನು ಹೇಳಿಕೊಂಡ. ಏಕೆಂದರೆ ದೇವರು ಅವನನ್ನು ತುಂಬ ಪ್ರೀತಿಸುತ್ತಾನೆಂದು ಅವನಿಗೆ ಗೊತ್ತಿತ್ತು. (ಕೀರ್ತನೆ 13:5; 62:8) ನಮ್ಮ ಚಿಂತೆಗಳನ್ನೆಲ್ಲಾ ತನ್ನ ಮೇಲೆ ಹಾಕಬೇಕೆಂದು ದೇವರು ಬಯಸುತ್ತಾನೆ. 1 ಪೇತ್ರ 5:7 ಹೀಗನ್ನುತ್ತದೆ: “ನಿಮ್ಮ ಚಿಂತೆಯನ್ನೆಲ್ಲಾ [ದೇವರ] ಮೇಲೆ ಹಾಕಿರಿ, ಏಕೆಂದರೆ ಆತನು ನಿಮಗೋಸ್ಕರ ಚಿಂತಿಸುತ್ತಾನೆ.”

ಚಿಂತೆಯನ್ನು ನಿಭಾಯಿಸಬಹುದು. ಹೇಗೆ? ಬೈಬಲ್‌ ಬರೆದವರಲ್ಲಿ ಒಬ್ಬನಾದ ಪೌಲನಿಗೆ ಕ್ರೈಸ್ತ ಸಭೆಯಲ್ಲಿದ್ದವರ ಬಗ್ಗೆ ಚಿಂತೆ ಇತ್ತು. ಆಗ ಅವನು ಅವರನ್ನು ಸಾಂತ್ವನಗೊಳಿಸಲು, ಉತ್ತೇಜಿಸಲು ಶ್ರಮಿಸಿದ. (2 ಕೊರಿಂಥ 11:28) ಹೀಗೆ ಮಾಡಿದಾಗ ಪೌಲನಿಗೆ ಅವರ ಕಡೆಗಿದ್ದ ಚಿಂತೆ ಕಡಿಮೆ ಆಯಿತು. ಸಭೆಯವರಿಗೂ ಪ್ರಯೋಜನವಾಯಿತು. ಇದು ನಮ್ಮ ವಿಷಯದಲ್ಲೂ ನಿಜ. ಆದರೆ ಯಾರಿಗೇನಾದರೆ ನನಗೇನು ಅನ್ನುವ ಮನೋಭಾವ ಸರಿಯಲ್ಲ. ಬೇರೆಯವರ ಮೇಲೆ ನಮಗೆ ಪ್ರೀತಿ ಕಾಳಜಿ ಇಲ್ಲ ಎಂದು ಇದು ತೋರಿಸುತ್ತದೆ.—ಜ್ಞಾನೋಕ್ತಿ 17:17.

“ನಿಮ್ಮಲ್ಲಿ ಪ್ರತಿಯೊಬ್ಬನು ಸ್ವಹಿತವನ್ನು ಮಾತ್ರ ನೋಡದೆ ಪರಹಿತವನ್ನು ಸಹ ನೋಡಲಿ.” —ಫಿಲಿಪ್ಪಿ 2:4, ಸತ್ಯವೇದವು.

ನಿಜ ಏನು ಗೊತ್ತಾ?

ಜನರು ಹಿಂದೆ ಮಾಡಿದ ತಪ್ಪುಗಳ ಬಗ್ಗೆ, ನಾಳೆಯ ಬಗ್ಗೆ ಅಥವಾ ಹಣಕಾಸಿನ ಬಗ್ಗೆ ಚಿಂತಿಸುತ್ತಾರೆ. *

ಬೈಬಲ್‌ ಏನು ಹೇಳುತ್ತದೆ?

ಹಿಂದೆ ಮಾಡಿದ ತಪ್ಪುಗಳ ಬಗ್ಗೆ ಚಿಂತೆ: ಮೊದಲನೇ ಶತಮಾನದ ಕೆಲವರು ಕ್ರೈಸ್ತರಾಗುವ ಮುಂಚೆ ಕುಡುಕರು, ಸುಲಿಗೆಮಾಡುವವರು, ಲೈಂಗಿಕ ಅನೈತಿಕತೆಯಲ್ಲಿ ಒಳಗೂಡಿರುವವರು, ಕಳ್ಳರು ಆಗಿದ್ದರು. (1 ಕೊರಿಂಥ 6:9-11) ಆದರೆ ಅವರು ಅದರ ಬಗ್ಗೆಯೇ ಯೋಚಿಸುತ್ತಾ ಇರುವ ಬದಲು ಕರುಣಾಸಾಗರ ದೇವರ ಮೇಲೆ ನಂಬಿಕೆ ಇಟ್ಟು ತಮ್ಮ ನಡತೆಯನ್ನು ಬದಲಾಯಿಸಿಕೊಂಡರು. ಕೀರ್ತನೆ 130:4 ಹೀಗನ್ನುತ್ತದೆ: “ನೀನು [ದೇವರು] ಪಾಪವನ್ನು ಕ್ಷಮಿಸುವವನಾದ್ದರಿಂದ ಮನುಷ್ಯರ ಭಯಭಕ್ತಿಗೆ ನೀನೇ ಪಾತ್ರನು.”

ನಾಳೆಯ ಬಗ್ಗೆ ಚಿಂತೆ: “ನಾಳೆಯ ವಿಷಯವಾಗಿ ಎಂದೂ ಚಿಂತೆಮಾಡಬೇಡಿ; ನಾಳೆಯ ದಿನವು ತನ್ನದೇ ಆದ ಚಿಂತೆಗಳನ್ನು ಹೊಂದಿರುವುದು” ಎಂದನು ಯೇಸು. (ಮತ್ತಾಯ 6:25, 34) ಅದರ ಅರ್ಥ? ಇವತ್ತಿನ ಬಗ್ಗೆ ಮಾತ್ರ ಯೋಚಿಸಿ. ನಾಳೆಯ ಚಿಂತೆಯನ್ನು ನಾಳೆಗೆ ಬಿಟ್ಟುಬಿಡಿ, ಇವತ್ತಿನದಕ್ಕೆ ಸೇರಿಸಬೇಡಿ. ಇಲ್ಲ ಅಂದರೆ ಎಲ್ಲ ಗಜಿಬಿಜಿಯಾಗಿ ತಲೆ ಕೆಟ್ಟುಹೋಗುತ್ತದೆ. ಇಷ್ಟೆಲ್ಲಾ ತಲೆ ಕೆಡಿಸಿಕೊಳ್ಳುವ ಅವಶ್ಯಕತೆ ಇರಲಿಲ್ಲ ಅಂತ ನಂತರ ಗೊತ್ತಾಗುತ್ತದೆ.

ಹಣಕಾಸಿನ ಚಿಂತೆ: “ಬಡತನವನ್ನಾಗಲಿ ಐಶ್ವರ್ಯವನ್ನಾಗಲಿ ಕೊಡದೆ” ಜೀವಿಸಲು ಬೇಕಾದದ್ದನ್ನು ಕೊಡು ಎಂದು ಬುದ್ಧಿವಂತನೊಬ್ಬ ದೇವರಿಗೆ ಬೇಡಿಕೊಂಡ. (ಜ್ಞಾನೋಕ್ತಿ 30:8) ಅವನು ಇರುವುದರಲ್ಲೇ ತೃಪ್ತನಾಗಿರಲು ಬಯಸಿದ. ದೇವರು ಇಷ್ಟಪಡುವುದು ಇದನ್ನೇ. ಇಬ್ರಿಯ 13:5ರಲ್ಲಿ ಹೇಳುತ್ತದೆ: “ನೀವು ನಿಮಗಿರುವವುಗಳಲ್ಲಿಯೇ ತೃಪ್ತರಾಗಿರುವಾಗ ನಿಮ್ಮ ಜೀವನ ರೀತಿಯು ಹಣದ ಪ್ರೇಮದಿಂದ ಮುಕ್ತವಾಗಿರಲಿ. ಏಕೆಂದರೆ ‘ನಾನು ಎಂದಿಗೂ ನಿನ್ನ ಕೈಬಿಡುವುದಿಲ್ಲ, ಎಂದಿಗೂ ತೊರೆಯುವುದಿಲ್ಲ’ ಎಂದು [ದೇವರು] ಹೇಳಿದ್ದಾನೆ.” ಹಣ ಇವತ್ತು ಇರುತ್ತೆ, ನಾಳೆ ಇರಲ್ಲ. ಆದರೆ ದೇವರ ಮೇಲೆ ನಂಬಿಕೆ ಇಟ್ಟು ಸರಳ ಜೀವನ ನಡೆಸಿದರೆ ಆತನು ಯಾವತ್ತೂ ನಮ್ಮ ಕೈಬಿಡಲ್ಲ.

“ನೀತಿವಂತನು ದಿಕ್ಕಿಲ್ಲದೆ ಬಿದ್ದಿರುವದನ್ನಾಗಲಿ ಅವನ ಸಂತತಿಯವರು ಭಿಕ್ಷೆಬೇಡಿ ತಿನ್ನುವದನ್ನಾಗಲಿ ನೋಡಲಿಲ್ಲ.”—ಕೀರ್ತನೆ 37:25.

ಜನರು ಏನು ಹೇಳುತ್ತಾರೆ?

“ಮೊದಲಿಗಿಂತ ಜನರು ಈಗ ಚಿಂತೆ ಮಾಡುವುದು ತುಂಬ ಜಾಸ್ತಿಯಾಗಿದೆ” ಎಂದು ಪತ್ರಕರ್ತ ಹರೀಯಟ್‌ ಗ್ರೀನ್‍ರವರು ಹೇಳಿದ್ದಾರೆ. (2008, ದ ಗಾರ್ಡಿಯನ್‌ ವಾರ್ತಾಪತ್ರಿಕೆ) “ಅಮೆರಿಕದವರು ಇತ್ತೀಚಿಗೆ ಚಿಂತೆ ಮಾಡುವುದು ವಿಪರೀತ ಆಗಿದೆ” ಎಂದು 2014ರಲ್ಲಿ ಪ್ಯಾಟ್ರಿಕ್‌ ಓ ಕೊನರ್‌ರವರು ದ ವಾಲ್‌ ಸ್ಟ್ರೀಟ್‌ ಜರ್ನಲ್‌ ಎಂಬ ಪತ್ರಿಕೆಯಲ್ಲಿ ಬರೆದಿದ್ದಾರೆ.

ಬೈಬಲ್‌ ಏನು ಹೇಳುತ್ತದೆ?

“ಕಳವಳವು ಮನಸ್ಸನ್ನು ಕುಗ್ಗಿಸುವದು; [ಒಳ್ಳೆಯ] ಮಾತು ಅದನ್ನು ಹಿಗ್ಗಿಸುವದು.” (ಜ್ಞಾನೋಕ್ತಿ 12:25) ದೇವರ ರಾಜ್ಯದ ಸುವಾರ್ತೆಯೇ ಆ ಒಳ್ಳೆಯ ಮಾತು. (ಮತ್ತಾಯ 24:14) ಮನುಷ್ಯನ ಕೈಯಿಂದ ಮಾಡಕ್ಕಾಗದೆ ಇರುವ ವಿಷಯಗಳನ್ನು ದೇವರ ರಾಜ್ಯ ಅಥವಾ ಸರ್ಕಾರ ಮಾಡುತ್ತೆ. ಅದು ಚಿಂತೆಗೆ ಮುಖ್ಯ ಕಾರಣವಾಗಿರುವ ರೋಗ, ಮರಣವನ್ನೂ ಬೇಗನೆ ತೆಗೆದುಹಾಕುತ್ತದೆ! ಆಗ “[ದೇವರು ನಮ್ಮ] ಕಣ್ಣೀರನ್ನೆಲ್ಲಾ ಒರಸಿಬಿಡುವನು; ಇನ್ನು ಮರಣವಿರುವುದಿಲ್ಲ; ಇನ್ನು ದುಃಖವಾಗಲಿ ಗೋಳಾಟವಾಗಲಿ ನೋವಾಗಲಿ ಇರುವುದಿಲ್ಲ.”—ಪ್ರಕಟನೆ 21:4. ▪ (g16-E No. 2)

“ನಿರೀಕ್ಷೆಯನ್ನು ಒದಗಿಸುವ ದೇವರು . . . ನಿಮ್ಮ ನಂಬಿಕೆಯ ಮೂಲಕ ನಿಮ್ಮಲ್ಲಿ ಎಲ್ಲ ರೀತಿಯ ಆನಂದವನ್ನೂ ಶಾಂತಿಯನ್ನೂ ತುಂಬಿಸಲಿ.” —ರೋಮನ್ನರಿಗೆ 15:13.