Кʹьтеба Пирозда те готьне, ԝәки һерса бе контрол дькарә зийане бьдә ча кәсе һерс, ӧса жи мәрьвед дәр-дора ԝи (Мәтʹәлок 29:22). Рʹаст ә, щарна мәʹни һәнә кӧ әм һерс дькʹәвьн, ле диса жи Кʹьтеба Пирозда те готьнә, әԝед кӧ бәрдәԝам дькьн һерс дькʹәвьн, ԝе хьлаз нәбьн (Галати 5:19-21). Принсипед Кʹьтеба Пироз дькарьн али мәрьва бькьн һерса хԝә контрол кьн.

•  Гәло тʹьме һерскʹәтьн нәрʹаст ә?

•  Кʹижан һерс нәрʹаст ә?

•  Ча һерса хԝә контрол кьн?

•  Рʹезед жь Кʹьтеба Пироз дәрһәԛа һерсе?

На. Һьнә дәрәщада һерскʹәтьн тьштәки нормал ә. Мәсәлә, Нәһәмийа хьзмәткʹаре Хԝәде, «зәһф һерс» кʹәт, чахе пеһʹәсийа, ԝәки щьмәʹта ԝи дьчәрчьриньн (Нәһәмийа 5:6).

Щарна Хԝәде жи һерс дькʹәвә. Чахе щьмәʹта ԝи Исраел пәймана тʹәви ԝи тʹәрʹьбанд у дәстпекьрьн хӧданед ԛәлпрʹа ԛӧльх кьн, әԝ гәләк сәр ԝан һерс кʹәт (Һʹакьмти 2:13, 14). Ле һерс һʹӧнӧре Йаһоԝайә сәрәкә нинә. Һерса Йаһоԝа тʹьме щийе хԝәда нә у бьн контрола ԝида нә (Дәркʹәтьн 34:6; Ишайа 48:9).

Һерса бе контрол у бе мәʹни нәрʹаст ә. Мәрьвед гӧнәкʹар гәләк щар хут ви щурʹә һерсе дьдьнә кʹьфше. Мәсәлә:

• Ԛайин «гәләки һерс кʹәт» чахе Хԝәде ԛӧрбана ԝи ԛәбул нәкьр. Ԛайин изьн да һерсе, кӧ фькьр у дьле ԝи зәфт кә. Рʹуйе һерседа әԝи бьре хԝә кӧшт (Дәстпебун 4:3-8).

• Уньс пʹехәмбәр «һерс кʹәт» чахе Хԝәде гӧне хԝә щьмәʹта Нинәԝайе ани. Хԝәде готе: «Гәло һәԛ ә, кӧ тӧ бона ве йәке бина хԝә һаԛаси тәнг дьки»? Уньс гәрәке һьндава ԝан дьлрʹәʹм буйа, чьмки ԝана кьред хԝәйә хьраб тʹобә кьрьн (Уньс 3:10–4:1, 4, 11). a

Әԝ мәсәлә дьдьнә кʹьфше, ԝәки әм гӧнәкʹар ьн у «һерса мерьв рʹастийа Хԝәде найнә сери» (Аԛуб 1:20).

• Бир нәкьн, ԝәки һерса бе контрол, нишана сьстбуне йә. Һьнәк дьфькьрьн, кӧ чахе мәрьв изьне дьдә хԝә һерс кʹәвә, демәк әԝ йәки ԛәԝи йә. Ле бь рʹасти мәрьвед ӧса сьст ьн. Кʹьтеба Пирозда те готьне, ԝәки кәсе кӧ нькарә һерса хԝә зәфт кә «мина бажаре бе бьрщ, йе хәра буйи йә» (Мәтʹәлок 25:28; 29:11). Ле әԝед кӧ һерса хԝә контрол дькьн, ԛәԝи у сәрԝахт ьн (Мәтʹәлок 14:29). Кʹьтеба Мәтʹәлокда те готьне: «Мәрьве хԝәйисәбьр жь мерхас четьр ә» (Мәтʹәлок 16:32).

• Һерса хԝә зәфт кә, кӧ паше рʹуйе кьред нәрʹастда пʹошман нәби. Зәбур 37:8-да те готьне «Һерс нәкʹәвә, нәԛьлԛьлә», у паше ӧса те готьне «бинтәнг нәбә кӧ хьрабийе бьки». Әв йәк те һʹәсабе, кӧ әм хԝәха дькарьн сафи кьн чь бькьн. Чахе әм һерскʹәти нә жи, әм дькарьн хԝә контрол кьн, ԝәки хьрабийе нәкьн. Әфәси 4:26-да те готьне: «Һәгәр һун һерс кʹәвьн, гӧна нәкьн».

• Һәрге дәрәщә дьԛьлԛьлә, һе баш ә тӧ бьһели һәрʹи. Мәтʹәлокда те готьне: «Дәстпебуна шерʹ мина авбәрʹдане йә, һе шәрʹ кӧ гьран нәбуйә же дур кʹәвә» (Мәтʹәлок 17:14). Рʹаст ә, баш ә зу проблеме сафи кьн, ле дьбәкә дәрәща ԝәда ԝе дьһа баш бә, кӧ һерса ԝә дайнә, у паше һуне бькарьбьн рʹьһʹәт һәр тьшти сафи кьн.

•   Пешийе һәр тьштида избат бьн. Кʹьтеба Мәтʹәлокда ӧса ньвисар ә: «Фәʹме ԛәнщ мерьв жь һерсе пашда дехә» (Мәтʹәлок 19:11). Пешийа кӧ тьштәки һьлди һʹәсаб, дьһа баш ә избат би кӧ әв йәк рʹаст ә йан на. Һәрге әм рʹьнд гӧһ бьдьнә һәр кәса, кʹе кӧ ве дәрәщева гьредайи нә, әме фәʹм бькьн кӧ чьрʹа һәр тьшт ӧса ԛәԝьми, у әме бадиһәԝа һерс нәкʹәвьн (Аԛуб 1:19).

•   Дӧа бькьн, кӧ дьле ԝәда әʹдьлайи бә. Бь сайа дӧа һуне «әʹдьлайийа Хԝәде кӧ жь һәр һʹьш-аԛьли дәрбазтьр ә» бьстиньн (Филипи 4:7). Сәва кӧ рʹӧһʹе пироз бьстиньн, лазьм ә дӧа бькьн, әв али мә дькә сәбьр кьн у хԝәгьрти бьн, ӧса жи әʹдьлайе дькә дьле мә (Луԛа 11:13; Галати 5:22, 23).

• Һәвалед баш бьжберә. Әм дьбьнә мина ԝан мәрьва, тʹәви кʹе һәвалтийе дькьн (Мәтʹәлок 13:20; 1 Корьнтʹи 15:33). Ләма жи Кʹьтеба Пирозда те готьне: «Тʹәви мәрьве һерс һәвалтийе нәкә, у тʹәви мәрьве зу ԛӧлоз дьбә рʹе нәчә». Гәло чьрʹа? Кʹьтеба Пироз дьбежә: «Нәбә кӧ тӧ рʹе-дьрбед ԝи һин би у нәфса тә бькʹәвә тʹәле» (Мәтʹәлок 22:24, 25).