KIKWATEKESU PHAL’O MWIJI | JITATA
Okwila Ngitena Kuta Monami Mukididi Kyakulanga o Anandenge?
Sayi jitata kyoso kyamateka kukalakala enemuta otwana twâ mu ididi yakulanga o anandenge, o ididi yiyi yadifu ni xikola. Okwila okubhanga kiki kwandakwatekesa moné?
Ibhwidisu iwatokala kudibhanga
Okwila kuta monami mukididi kyakulanga otwana kwandazozesa o ukamba wami ni mwene? Nange kyene. Kyoso omona kyamuvwala, mumivu yadyanga owongo wê umukwatekesa kudibhana kyambote ni athu. Kyenyiki sota kubhita kithangana kyasoko ni moné, kyoso kyala hanji mukitala kiki.—Matendelelu 6:6, 7.
Se wamuxinganeka kuta moné mukididi kyakulanga o anandenge, xinganeka we okithangana kyasoko kiwandabhindamena phala kukalanê.
Okwila kuta monami mukididi kyakulanga o anandenge kwandangibhonzesa kumukwatekesa? Nange kyene. Sayi divulu dizwela yalungu ni kusasa otwana dyamba: “Se mona ubhita ithangana yavulu ni jikoleka jê, ene atena kumufunyisa.”
Se wamuxinganeka kuta moné mukididi kyakulanga otwana, xinganeka we se eye wandakala phangu yambote phala mwene.
Okwila kuta monami mukididi kyakulanga otwana kwandamukwatekesa kyoso mwene kyandamateka kudilonga muxikola? Sayi athu amba kwila kyene. Amukwá amba kuma kwata mukididi kiki kutena kwakwatekesa mba kana. Sayi mesene amwixana Penelope Leach wambe: “Kana kubanza kwila, o ilongesu yaxikola yene yandabhangesa moné kuditunda kyambote kumwenyu. Mba kana kubanza kwila, se moné umateka kudilonga mu undenge wê mba udilonga kyavulu, wandaditunda kyambote kumwenyu wê. Se ubanza kiki, kiwamubhana valolo mu ilongesu iwabhana kwa moné tundé kiwamuvwala.”
Se wamubanza kuta moné mukididi kyakulanga o anandenge, xinganeka se kyandamukwatekesa mba se wabhindamena mwene.
Okwila sayi muthu mudyenu utena kukala kubhata muveji dyakukalakala? Sayi bhabha otata ni mama akalakala ngó phala kukala ni jimbote javulu. Maji okwila kiyadi kyâ abhingi mwene kukalakala?
Se wamubanza kuta moné mukididi kyakulanga otwana, xinganekenu se mutena kusosolola okitadi kimwene mungastala phala umoxi mudyenu kukala kubhata.
Ande dyakuta moné mukididi kyakulanga otwana, xinganeka hanji mumbote ni mu ibhidi itena kumoneka. Abha se kyoso ki uzubha kuxinganeka mumaka yá, anga umona kuma kuta moné mukididi kiki kwandakwatekesa omwiji.
Ihi iwatokala okubhanga
O Bibidya yamba: ‘Njimu u zonga kyambote kyoso kyenda.’ (Jisabhu 14:15) Ande dyakusola se nanyi wandakala ni moné, xinganeka kyambote mukitendelesu kiki ni ihi imutena okubhanga.
Xinganeka mu ima i utena okubhanga
Sayi jitata asola kuta otwana mukididi kyofele kyakulanga otwana, nange mu inzo ya muthu, kimwala twana twavulu ni muthu umoxi mba ayadi amulanga otwana tutu.
Sayi jitata asolo kuxisa o twana twa kujindandu mba kwixana muthu kubhata phala kukala maseka.
Mukubhanga okima kiki kwala mbote, maji kwala we ibhidi. Dizwelese ni jitata jamukwa abhange kyá o ima yiyi. O Bibidya yamba: “O athu atetuluka abhanga yoso ni unjimu.”—Jisabhu 13:10.
Maji se nekiki, eye usola kuta moné mukididi kya kulanga o anandenge? Se kyene . . .
Sota kwijiya yalungu ni kididi
Okwila o kididi kiki kyamubelesela o ijila ya jinguvulu? Ene akalakala kyebhi? Okwila ala ni fuma yambote?
Okwila okididi kyazele, kyakondama mwene?
Ihi yandabhanga o anandenge mukididi kiki? a
Sota kwijiya ananyi ene mulanga otwana
Ufunu webhi ala nawu yo alanga otwana? Okwila ene adilongo kyebhi kyalanga otwana, ni kyebhi kyatena kwasaka se ene adikwama?
Okwila wasoto kya kwijiya se omuthu wandalanga moné, wexile kya mukaleya mba kana?
Okwila okididi kyene mulungulula lwavulu o athu alanga otwana? Se kyene, kiki kilombolola kwila monê wandakala ni alangidi avulu.
Kala mukalakadi ulanga twana tukuxi? Se mukalakadi umoxi ulanga twana twavulu, nange moné kandamulanga kyambote. Mukidi, o ibhindamu yatwana kiyene imoxi, sayi yá abhingi kwalanga dingi.
Okwila o athu andalanga otwana ala polondo phala kuzwela yalungu ni ibhindamu yenu ni yatwana?
a Okwila otwana abhita ithangana yavulu mukutala o mutelembe wa izuzumbya inga abhanga ima yengi phala kudilonga mba kukatula mbote kala okutungutisa omukutu?