O akwa kutokwesa ambe kwila kwene 90% ya minzangala akwa Brasil ene musamba, maji kwene ngo 16% ene musamba izuwa yoso. Se phata, o minzangala yiyi ene mu dibhwidisa: ‘O kwila o kusamba kima ngo kibhangesa o athu kudivwa kyambote? Inga kwala dingi kima kyengi?’

•  O musambu ihi?

•  O kwila Nzambi wivwa mwene o misambu?

•  Ima yahi ingatokala kubhinga mu musambu?

•  Ihi yamba o minzangala ni akwenu

 O kusamba kifwa kudizwelesa ni Nzambi, o Mubhangi wa ima yoso. Xinganeka bhofele se kiki kilombolola ihi! Mu ima yoso Jihova wa betakota o ima ya mukwa ndenge. Maji né kiki “sé-ku muthu wa mukala dikanga.” (Ikalakalu 17:27) IMu kidi o Bibidya itubhana kixanu kya katunda, yene yamba: “Zukamenu kwa Nzambi, mwene wanda mi zukama we.”—Tiyaku 4:8.

 Kyebhi ki utena kuzukama kwa Nzambi?

•   Bhukaxi ka musambu—kyene ki utena kudizwelesa ni Nzambi.

•   Mu kudilonga o Bibidya—Yu wene o ukexilu wengi u utena “kuzwela” ni Nzambi.

 O kubhanga kiki—bhukaxi ka musambu ni kudilonga o Bibidya—kwanda kukwatekesa kukolesa o ukamba we ni Nzambi.

 “O kuzwela ni Jihova—o muthu wabetakota mu Ngongo—mwene o ujitu wabetakota utena kukala nawu o muthu.”—Jeremy.

 “O kuzwela ni muxima woso o uxinganeku yami kwa Jihova kungibhangesa ku muzukama dingi.”—Miranda.

 ENe mwene se eye uxikina kwila kwene Nzambi, ni kusamba kwa mwene, nange kwanda kubhonza kuxikina kwila mwene ukwivwa. Maji o Bibidya yamba kwila Jihova ‘mukwa kwivwa o misambu.’ (Jisálamu 65:2) Mwene ate u kubhinga phala ‘kumuxila o ibhindamu yetu yoso.’ Mukonda dyahi? “mukonda mwene wene mu kulanga.”—1 Phetele 5:7.

 Xinganeka bhofele: Eye ki wene mukatula kithangana phala kudizwelesa ni makamba mê? Utena we kubhanga kiki ni Nzambi. Zwela nê izuwa yoso, tumbula o dijina dyê, Jihova. (Jisálamu 86:5-7; 88:9) O Bibidya yamba kwila eye utena ‘kukolokota mu kusamba.’—1 Tesalonika 5:17.

 “O kusamba kudizwelesa ni Tata yami ya dyulu, mu kubhanga kiki, ngitena kuzwela yoso ya ngikala ku muxima.”—Moises.

 “Eme ngi zwela ni Jihova o ima yoso ya ngikala ku muxima, kala kingene mubhanga ni mama metu mba ni kamba dyami dya kazola.”—Karen.

 O Bibidya yamba: “Maji mu ima yoso, kumoxi ni kusamba ni kudyonda, ni kusakidila bhingenu kwa Nzambi o ima yoso i mwamesena.”—Filipe 4:6.

 O kwila tutena kusamba yalungu ni ibhidi yetu? Kyene tutena! Mu kidi, o Bibidya yamba: “Se wevu kimbamba kya kuxina iza nakyu kwa Jihova, mwene ukusokesa nakyu.”—Jisálamu 55:22.

 Kyoso ki tusamba ki twatokala ngo kutumbula o ibhidi yetu. Sayi munzangala a mwixana Chantelle wambe: “Ki kyeji fwama we izuwa yoso kubhinga kyango o kikwatekesu kwa Jihova. Kima kyambote kudyanga o kusakidila, eme ngala ni ima yavulu phala kusakidila.”

 Xinganeka bhofele: Ima yahi ikubhangesa kusakidila? Utena kuxinganeka mu ima itatu i utena kusakidila Jihova lelu?

 “Kate ni mu ima yofele, kala o kutala kakitulu kafwama, kutena kutubhangesa kusakidila Jihova.”—Anita.

 “Xinganeka mu ibhangelu ya Nzambi i kubhangesa kudiwana, mba mu velusu ya Bibidya i wa wabhela dingi, anga usamba kwa Jihova mu ima yiyi.”—Brian.