Sayi jingeleja Mingedi amwixana “Sandu Mingedi,” o Mingedi mwenyú sé phata dijina dya Jezú ande dya mwene kwiza mu ixi ni kyoso mwene kyavutuka ku dyulu. a Mingedi wadikwata ni Satanaji kyoso Mozé kyafu yu wakwatekesa anju kutula njimbu ya Nzambi kwa polofeta Daniyele. (Daniyele 10:13, 21; Juda 9) Mingedi ubhanga mwene kala kyafwamena o dijina dyê. O Digina Mingedi dilombolola “Nanyi Wadifangana ni Nzambi?” Mwene uzokela o ungana wa Nzambi, ubhânga ni jinguma ja Nzambi.—Daniyele 12:1; Dijingunwinu 12:7.

 Ijiya se mukonda dyahi twatokala kuxikina kwila Jezú mwéne Mingedi kota dya jianju.

•   Mingedi mwéne “alukanju.” (Juda 9) O dijina “alukanju” dilombolola “kota dya jianju,” dimoneka ngo mu jivelusu jiyadi ja Bibidya. Mu ididi iyadi, o kizwelu kilombolola ngo muthu umoxi, kiki kilondekesa kwila kwala ngo anju imoxi amwixana mu dijina didi dya ujitu. Velusu imoxi yamba kuma o Ngana Jezú amufukununa “wanda tuluka ku dyulu ni kukola ni dízwi dya swina dya Kota dya jianju.” (1 Tesalonika 4:16) Jezú wala ni “dízwi dya kota dya jianju” mukonda mwéne o alukanju, Mingedi.

•   Mingedi utumina kifuxi kya jianju. “Mingedi ni jianju jê a lwa ita ni kidikixi,” Satanaji. (Dijingunwinu 12:7) Mingedi wala ni ungana wadikota kudyulu, mukonda watokala we ‘mu ilamba ya dyanga’ amwixana we ‘kilamba kya dikota.’ (Daniyele 10:13, 21; 12:1) O majina yá aujitu alondekesa kwila Mingedi mwéne “o comandande utumina o kifuxi kya jianju,” kala kyatange o ngijiye yakatunda wa Kikutu Kyobhe ngana David E. Aune.

   O Bibidya itumbula dijina dimoxi ngo dyengi dya muthu utumina o kifuxi kya jianju. Kiki kilondekesa o “kithangana kyoso o Ngana Jezú kyanda tukuluka tunde ku dyulu, kumoxi ni jianju jê jala ni kutena. Mwene wanda kwijila mu mulengu wa túbhya phala kufundisa.” (2 Tesalonika 1:7, 8; Matesu 16:27) Jezú “wayi ku dyulu. Nzambi wabhangesa kwila o jianju, maungana ni makutena a belesela Jezú.” (1 Phetele 3:21, 22) Kitwejitendela se Nzambi watele Jezú ni Mingedi kala jinguma mudyâ maji ala ku pholo dya jianju. Muveji dya kiki tutena kutendela kwila o majina ayadi, Jezú ni Mingedi, atokala kumuthu umoxi ngo.

•   Mingedi “wa kà balumuka” mu “thembu ya phaxi,” phaxi yiyi nuka twaimwene. (Daniyele 12:1) Mu divulu dya Daniyele, o kizwelu “kubalumuka” mujiveji javulu kyatokala ku sobha wandabalumuka phala kubhanga kima kyakatunda. (Daniyele 11:2-4, 21) Jezú Kidistu amutumbula kala “O Kizwelu Kya Nzambi,” kuma “Sobha ya Jisobha” wandabhanga kima kyakatunda phala kubwika o jinguma ja Nzambi ni kulanga o mundu wa Nzambi. (Dijingunwinu 19:11-16) Mwene wandabhanga kiki mu kithangana kya “hadi yadikota, kiluwa ibhita tundé ku dimatekenu dya ngongo katé kindala.”—Matesu 24:21, 42.