“Kyebhi Kyexile o Kifwa Mba Pholo ya Jezú?”
O Bibidya i tambwijila
Seku muthu wejiya o pholo ya Jezú ni kidi kyoso, mukonda o Bibidya ki izwela yalungu ni pholo ya Jezú. Kiki kilondekesa kwila, o pholo yê ki yene o kima kya beta o kota. Maji o Bibidya itukwatekesa kuxinganeka kyebhi kyexile o pholo ya Jezú.
Mwene wadifwile kyebhi? Jezú wexile Judé, nange wadifwile ni mwiji wa manyâ. (Jihebelewu 7:14) Jezú wadifwile ni athu engi. Sayi kithangana Jezú watundu ku Ngalileya yu wayi ku Jeluzaleme, o athu kejidile kwila wexile mwene. (Nzwá 7:10, 11) Mwene katundile o maxibulu mê mu kuwabha o pholo kana. Juda dya Kadyota wabhingile kutungula Jezú bhukaxi ka mundu. Kiki kilondekesa kwila, mwene wadifwile ni athu engi.—Matesu 26:47-49.
Ndemba: Nange Jezú kexile ni ndemba ya lebha, mukonda o Bibidya yamba kwila “ki kifwama o diyala kukala ni ndemba yalebha.”—1 Kolindu 11:14.
Mwezu: Jezú wexile ni mwezu. Mwene wexile mu kayela o kijila kya Jijudé kyexile mu fidisa o mayala ‘kubhuta o mwezu.’ (Ijila 19:27; Ngalásya 4:4) Kikyene ngó, o Bibidya izwela we yalungu ni mwezu wa Jezú mu kikanenu kizwela yalungu ni hadi yeji tala.—Izaya 50:6.
Mukutu: Yoso ilondekesa kwila, Jezú wexile diyala dya nguzu. Mu ukunji wê mwene wende jinjila jalebha bhoxi. (Matesu 9:35) Mwene wabokona luyadi mu tembulu yu walundumuna o jimesa ja akwa kusumbisa. Mu kithangana kya mukwa, mwene wakwata xikote ya jingoji, wakaye o jimbudi ni jingombe jexile musumbisa mu tembulu. (Luka 19:45, 46; Nzwá 2:14, 15) Sayi divulu enciclopédia dyamba: “O madivulu a Matesu Malúku Luka ni Nzwá, alondekesa kwila Jezú wexile muthu waswina, wexile ni sawidi yambote.”—Volume IV, difwe 884.
Pholo yê: Jezú wexile muthu wa henda, wexile mu suwa o athu. O pholo yê yexile mu londekesa o henda yiyi. (Matesu 11:28, 29) Athu a maukexilu oso exile muya kwa mwene phala kubhinga kikwatekesu ni kwa konda o malamba. (Luka 5:12, 13; 7:37, 38) Katé mwene o ana ndenge awabhelele kukala ni Jezú.— Matesu 19:13-15; Máluku 9:35-37.
Makutu alungu ni pholo ya Jezú
Makutu: Sayi athu axikina kwila Jezú wadifwile ni athu akwa Africa, mukonda o divulu dya Dijingunwinu disokesa o ndemba ya mútwe wê ni mujinya, o inama yê ni “ngondo yakatunda kyoso kya izunza mu túbhya.”—Dijingunwinu 1:14, 15.
Kidi: O divulu dya Dijingunwinu adisoneka bhukaxi ka “ijimbwete mba ifika.” (Dijingunwinu 1:1) Mu kuzwela yalungu ni ndemba ni inama ya Jezú, o divulu ki dyamuzwela yalungu ni pholo yê kyoso kyexile mu ixi kana. Maji dizwela yalungu ni idifwa yeji kala nayu kyoso kyeji mu fukununa. O divulu dya Dijingunwinu 1:14 dyamba kwila, o “ndemba ya mútwe wa [Jezú] yazelele kala mujinya, kala neve.” Kiki kilombolola o kolo ya ndemba yê, kana o kidifwa kya ndemba yê. (Dijingunwinu 3:14) Kiki kilondekesa kwila Jezú wexile njimu kala kibhita ni muthu wala ni jimvi.
O inama ya Jezú yedile kala “ngondo yakatunda kyoso kya izunza mu túbhya. (Dijingunwinu 1:15) O pholo yê yedile “kala o dikumbi dya mubhenya mu mwanya watu kyavulu.” (Dijingunwinu 1:16) Mu ngongo yoso seku muthu wala ni idifwa yiyi. Kiki kilondekesa kwila, kyoso kya mu fukununa, Jezú “watungu mu kididi mwezala ni kubhenya, kana muthu utena kubhixila-mu.”—1 Timote 6:16.
Makutu: Jezú kexile ni nguzu yavulu, kexile muthu waswina.
Kidi: Jezú wexile ni nguzu yavulu, wexile muthu waswina. Mu kifika, kyoso kyamukasele ku athu ambatele mauta, mixi ni jixiphata, mwene wadilondekesa sé woma. (Nzwá 18:4-8) Jezú wexile ni ufunu wa kalupindelu, kiki kilondekesa kwila mwene wexile ni nguzu yavulu.—Máluku 6:3.
Mukonda dyahi Jezú abhingile ku mukwatekesa kwambata o taka kwa mujibhila? Mukonda dyahi mwéne wadyanga o kufwa, o mayala ayadi a aphaphela nê kumoxi ku taka kana? (Luka 23:26; Nzwá 19:31-33) Ithangana ande dya kumujibha, Jezú kakexile dingi ni nguzu yavulu, watohokele. Mwene katenene kuzeka usuku woso, mukonda dya hadi yexile mutala. (Luka 22:42-44) Mu usuku amutalesa hadi ku Jijudé, mu kamene amubeta kyavulu ku akwa Loma. (Matesu 26:67, 68; Nzwá 19:1-3) O hadi yoso yiyi, yene ya mubhangesa kufwa ni lusolo.
Makutu: Jezú kasangulukile kyavulu, watolokele o muxima.
Kidi: Jezú wexile mulondekesa ni kidi kyoso o idifwa ya Tat’ê Jihova. O Bibidya imwixana kwila mwene “Nzambi ya sanguluka.” (1 Timote 1:11; Nzwá 14:9) Mu kidi, Jezú walongo ihi ya tokala kubhanga o athu phala kusanguluka. (Matesu 5:3-9; Luka 11:28) Kiki kilondekesa kwila, Jezú wasangulukile, o pholo yê yexile mu londekesa o kusanguluka kuku.
Eye Nange Wandawabhela we o Maka Yá
ESSENTIAL BIBLE TEACHINGS
Kyebhi ki tu Tena Kwijiya Kwila, o Bibidya Divulu Dya Kidi?
Se o Bibidya ya tokala kwa Nzambi, yene ki yeji difangana ni divulu dyosodyoso.
IA LUNGU N’ETU
Bhinga Phala Kukukunda
Kuzwela yalungu ni kibhwidisu kya Bibidya mba kudilonga yalungu ni Jimbangi ja Jihova.