តើលោកយេស៊ូមានរូបរាងបែបណា?
ចម្លើយពីគម្ពីរ
គ្មានអ្នកណាដឹងច្បាស់ថាលោកយេស៊ូមានរូបរាងបែបណាទេ ដោយសារគម្ពីរមិនបានរៀបរាប់អំពីរូបរាងរបស់លោកឡើយ។ នេះបញ្ជាក់ថារូបរាងរបស់លោកយេស៊ូ គឺមិនសំខាន់ទេ។ ប៉ុន្តែ គម្ពីរឲ្យតម្រុយខ្លះៗ ដើម្បីយើងអាចដឹងថាលោកយេស៊ូមានរូបរាងបែបណា។
រូបរាង: លោកយេស៊ូគឺជាជនជាតិយូដា ហើយលោកទំនងជាមានរូបរាងឬមុខមាត់កាត់តាមម្ដាយរបស់លោកដែលជាជនជាតិយូដា។ (ហេប្រឺ ៧:១៤) ដូច្នេះ លោកមិនខុសប្លែកពីមនុស្សដែលជាជនជាតិនោះទេ។ មានពេលមួយ លោកអាចធ្វើដំណើរដោយសម្ងាត់ពីស្រុកកាលីឡេទៅក្រុងយេរូសាឡិមបាន ហើយគ្មានអ្នកណាអាចរកលោកឃើញឡើយ។ (យ៉ូហាន ៧:១០, ១១) ម្យ៉ាងទៀត ក្នុងចំណោមពួកអ្នកកាន់តាម លោកមិនខុសប្លែកពីពួកគេទេ។ ជាឧទាហរណ៍ មានពេលមួយយូដាសអ៊ីស្ការីយ៉ុតបាននាំមនុស្សមួយក្រុមមករកចាប់លោកយេស៊ូ ហើយយូដាសត្រូវឲ្យសញ្ញាសម្គាល់ដល់ពួកគេដើម្បីដឹងថាអ្នកណាជាលោកយេស៊ូ។—ម៉ាថាយ ២៦:៤៧-៤៩
ប្រវែងសក់: លោកយេស៊ូទំនងជាមិនមានសក់វែងទេ ពីព្រោះគម្ពីរប្រាប់ថា«បុរសត្រូវអាប់ឱនកិត្តិយសប្រសិនបើមានសក់វែង»។—កូរិនថូសទី១ ១១:១៤
ពុកចង្កា: លោកយេស៊ូមានពុកចង្កា។ លោកធ្វើតាមច្បាប់របស់សាសនាយូដា ដែលហាមបុរសមិនឲ្យ‹កាត់តម្រឹមពុកចង្ការបស់ពួកគេ›។ (ច្បាប់លេវី ១៩:២៧; កាឡាទី ៤:៤) ម្យ៉ាងទៀត គម្ពីរបានលើកឡើងអំពីពុកចង្ការបស់លោកយេស៊ូក្នុងទំនាយមួយដែលជាប់ទាក់ទងនឹងការរងទុក្ខវេទនារបស់លោក។—អេសាយ ៥០:៦
រាងកាយ: មានកំណត់ហេតុជាច្រើនដែលបញ្ជាក់ថា លោកយេស៊ូមានរាងកាយមាំមួន។ ក្នុងអំឡុងកិច្ចបម្រើរបស់លោក លោកបានធ្វើដំណើរទៅកន្លែងឆ្ងាយៗដោយថ្មើរជើង។ (ម៉ាថាយ ៩:៣៥) លោកបានសម្អាតវិហាររបស់ជនជាតិយូដាពីរដង ដោយផ្កាប់តុរបស់ពួកអ្នកដូរប្រាក់ និងយករំពាត់ដេញសត្វទាំងអស់ដែលគេលក់ ចេញពីវិហារ។ (លូកា ១៩:៤៥, ៤៦; យ៉ូហាន ២:១៤, ១៥) សព្វវចនាធិប្បាយមួយបានសរសេរថា៖«កំណត់ហេតុទាំងមូលអំពីកិច្ចការផ្សព្វផ្សាយរបស់គ្រិស្ត បង្ហាញថាលោកយេស៊ូមានកាយសម្បទារឹងមាំ» (McClintock and Strong’s Cyclopedia ក្បាលទី៤ ទំព័រ៨៨៤)។
ទឹកមុខ: លោកយេស៊ូជាបុគ្គលដែលកក់ក្ដៅ និងមានចិត្តអាណិតមេត្តា ដូច្នេះទឹកមុខលោកក៏ច្បាស់ជាដូច្នោះដែរ។ (ម៉ាថាយ ១១:២៨, ២៩) មនុស្សគ្រប់ប្រភេទបានទៅរកលោកឲ្យជួយនិងសម្រាលទុក្ខពួកគេ។ (លូកា ៥:១២, ១៣; ៧:៣៧, ៣៨) សូម្បីតែកូនក្មេង ក៏មានអារម្មណ៍ស្រួលនៅក្បែរលោកដែរ។—ម៉ាថាយ ១៩:១៣-១៥; ម៉ាកុស ៩:៣៥-៣៧
ការយល់ខុសអំពីរូបរាងរបស់លោកយេស៊ូ
ការយល់ខុស: មនុស្សខ្លះអះអាងថាលោកយេស៊ូចេញពីពូជអាហ្វ្រិក ដោយសារសៀវភៅការបើកបង្ហាញប្រៀបប្រដូចសក់របស់លោកទៅនឹងរោមចៀម ហើយប្រដូចជើងរបស់លោកទៅនឹង«ស្ពាន់សុទ្ធដែលកំពុងភ្លឺក្នុងឡ»។—ការបើកបង្ហាញ ១:១៤, ១៥
ការពិត: សៀវភៅការបើកបង្ហាញបានត្រូវសរសេរសម្រាប់ជា«និមិត្តរូប»។ (ការបើកបង្ហាញ ១:១) ពាក្យពណ៌នាអំពីសក់និងជើងរបស់លោកយេស៊ូគឺជាពាក្យដែលប្រើក្នុងន័យធៀប ដើម្បីលើកបញ្ជាក់អំពីគុណសម្បត្តិរបស់លោកក្រោយពីលោកបានត្រូវប្រោសឲ្យរស់ឡើងវិញ មិនមែនពណ៌នាអំពីរូបរាងរបស់លោកពេលលោកនៅផែនដីទេ។ ការបើកបង្ហាញ ១:១៤ចែងថា៖«សក់ក្បាលរបស់លោកសស្គុសដូចរោមចៀម»។ នៅខនេះបញ្ជាក់អំពីពណ៌ មិនមែនលក្ខណៈនៃរោមចៀមទេ ហើយពណ៌សនោះជាចំណុចដែលបានត្រូវប្រើក្នុងន័យធៀប ជាតំណាងប្រាជ្ញាដែលលោកយេស៊ូមានដោយសារលោកមានអាយុច្រើន។ (ការបើកបង្ហាញ ៣:១៤) ដូច្នេះ ខនេះមិនបានប្រៀបធៀបសក់របស់លោកយេស៊ូទៅនឹងលក្ខណៈនៃរោមចៀមទេ តែប្រៀបធៀបសក់របស់លោកទៅនឹងពណ៌នៃរោមចៀមដែលសស្គុសវិញ។
ជើងរបស់លោកយេស៊ូ«ដូចស្ពាន់សុទ្ធដែលកំពុងភ្លឺក្នុងឡ»។ (ការបើកបង្ហាញ ១:១៥) រីឯមុខរបស់លោក«ភ្លឺដូចថ្ងៃពេលដែលកំពុងពេញកម្ដៅ»។ (ការបើកបង្ហាញ ១:១៦) ដោយសារគ្មានជាតិសាសន៍ណាមានពណ៌សម្បុរដូចការពណ៌នាទាំងនោះ ដូច្នេះយើងដឹងថានេះគ្រាន់តែជាពាក្យក្នុងន័យធៀបប៉ុណ្ណោះ ដែលបើកបង្ហាញឲ្យឃើញថាក្រោយពីលោកយេស៊ូបានត្រូវប្រោសឲ្យរស់ឡើងវិញ លោកបានទៅជាអ្នកដែល«នៅក្នុងពន្លឺដែលគ្មានអ្នកណាអាចចូលទៅជិតបាន»។—ធីម៉ូថេទី១ ៦:១៦
ការយល់ខុស: លោកយេស៊ូជាបុរសទន់ខ្សោយ។
ការពិត: លោកយេស៊ូគឺជាបុរសពិតៗ។ ជាឧទាហរណ៍ ពេលមនុស្សមួយក្រុមដែលប្រដាប់អាវុធមករកចាប់លោក លោកបានចេញមុខដោយប្រាប់ពួកគេយ៉ាងក្លាហានថាលោកជាអ្នកណា។ (យ៉ូហាន ១៨:៤-៨) ម្យ៉ាងទៀត លោកយេស៊ូជាជាងឈើដែលធ្លាប់ប្រើឧបករណ៍ផ្សេងៗ ដូច្នេះលោកច្បាស់ជាមានរាងកាយរឹងមាំ។—ម៉ាកុស ៦:៣
បើដូច្នោះមែន ហេតុអ្វីលោកយេស៊ូចាំបាច់ឲ្យគេជួយលីបង្គោលទារុណកម្មរបស់លោក? ហើយហេតុអ្វីលោកស្លាប់មុនអ្នកផ្សេងទៀតដែលបានត្រូវព្យួរក្បែរលោក? (លូកា ២៣:២៦; យ៉ូហាន ១៩:៣១-៣៣) មុននឹងគេយកលោកយេស៊ូទៅប្រហារជីវិត រាងកាយរបស់លោកខ្សោះកម្លាំងរួចទៅហើយ។ លោកមិនបានសម្រាន្តពេញមួយយប់ ដោយសារលោកបានកើតទុក្ខក្រៃលែង។ (លូកា ២២:៤២-៤៤) នៅយប់មុននោះ ពួកយូដាបានធ្វើបាបលោក ហើយព្រឹកឡើងជនជាតិរ៉ូមបានធ្វើទារុណកម្មលោកទៀត។ (ម៉ាថាយ ២៦:៦៧, ៦៨; យ៉ូហាន ១៩:១-៣) អ្វីទាំងនេះទំនងជាធ្វើឲ្យលោកយេស៊ូស្លាប់លឿនជាង។
ការយល់ខុស: លោកយេស៊ូតែងតែស្រងូតស្រងាត់និងសោកសៅ។
ការពិត: លោកយេស៊ូមានគុណសម្បត្តិដូចព្រះយេហូវ៉ាដែលជាបិតារបស់លោកបេះបិទ។ គម្ពីរបានចែងអំពីព្រះយេហូវ៉ាថាលោកជា«ព្រះដែលមានសេចក្ដីសប្បាយ»។ (ធីម៉ូថេទី១ ១:១១; យ៉ូហាន ១៤:៩) តាមពិត លោកយេស៊ូបានបង្រៀនអ្នកឯទៀតអំពីរបៀបដែលជួយឲ្យពួកគេមានជីវិតសប្បាយឬមានសុភមង្គល។ (ម៉ាថាយ ៥:៣-៩; លូកា ១១:២៨) កត្តាទាំងនេះសឲ្យឃើញថា ជារឿយៗលោកយេស៊ូមានទឹកមុខសប្បាយរីករាយ។
លោកអ្នកក៏ប្រហែលជាចូលចិត្តដែរ
សេចក្ដីបង្រៀនសំខាន់ៗក្នុងគម្ពីរ
ហេតុអ្វីយើងអាចប្រាកដថាគម្ពីរបរិសុទ្ធគឺមកពីព្រះ?
បើគម្ពីរគឺមកពីព្រះមែន នោះគួរមានភ័ស្ដុតាងដែលបង្ហាញថាគម្ពីរខុសពីសៀវភៅឯទៀតទាំងអស់។
