លែងមានមហន្ដរាយធម្មជាតិទៀត!
លែងមានមហន្តរាយធម្មជាតិទៀត!
បើនរណាម្នាក់ប្រាប់លោកអ្នកថា៖ «នៅពេលបន្ដិចទៀតនឹងគ្មានគ្រោះមហន្តរាយទៀត» តើលោកអ្នកនឹងមានប្រតិកម្មយ៉ាងណា? លោកអ្នកប្រហែលជាឆ្លើយថា៖ «អ្នកយល់សប្ដិទេដឹង។ គ្រោះមហន្តរាយជាបាតុភូតធម្មជាតិដែលត្រូវតែមាន»។ ឬក៏លោកអ្នកប្រហែលជាគិតថា‹នេះមិនគួរឲ្យជឿទេ!›។
ទោះជាគ្រោះមហន្តរាយធម្មជាតិមើលទៅដូចជាមិនអាចបំបាត់ចោលបានក៏ដោយ សេចក្ដីសង្ឃឹមដែលថានឹងលែងមានគ្រោះមហន្តរាយទៀតមានមូលដ្ឋានច្បាស់លាស់។ ក៏ប៉ុន្តែ ការផ្លាស់ប្ដូរនេះមិនមែនមកពីការខំប្រឹងប្រែងរបស់មនុស្សឡើយ។ មនុស្សជាតិមិនអាចយល់យ៉ាងពេញលេញអំពីរបៀបនិងមូលហេតុដែលមានគ្រោះមហន្តរាយក្នុងធម្មជាតិបានទេ ដូច្នេះពួកគេច្បាស់ជាមិនអាចគ្រប់គ្រងឬផ្លាស់ប្ដូរធម្មជាតិបានឡើយ។ ស្តេចសាឡូម៉ូននៅស្រុកអ៊ីស្រាអែលពីសម័យបុរាណ ជាមនុស្សល្បីល្បាញដោយសារប្រាជ្ញានិងការពូកែសង្កេតមើល គាត់បានសរសេរថា៖ «មនុស្សនឹងស្វែងរកឲ្យដឹងពីអស់ទាំងការដែលកើតមាននៅក្រោមថ្ងៃមិនបាន ដ្បិតទោះបើខំប្រឹងស្វែងរកយ៉ាងណា គង់តែមិនដែលប្រទះយល់ដែរ ហើយទោះបើមានមនុស្សប្រាជ្ញណាស្មានថា នឹងរកស្គាល់បាន ក៏គង់តែមិនអាចនឹងយល់បានដែរ»។—សាស្ដា ៨:១៧
បើមនុស្សជាតិមិនអាចគ្រប់គ្រង់លើគ្រោះមហន្តរាយធម្មជាតិ តើនរណាអាចគ្រប់គ្រងបាន? គម្ពីរបានដៅបញ្ជាក់ថាព្រះដែលជាអ្នកបង្កើតផែនដី លោកអាចកែប្រែស្ថានការណ៍នេះបាន។ លោកជាអ្នកដែលរៀបចំឲ្យមានប្រព័ន្ធធម្មជាតិផ្សេងៗ ដូចជាវដ្ដទឹកជាដើម។ (សាស្ដា ១:៧) ខុសគ្នាឆ្ងាយពីមនុស្សយើង ព្រះមានឫទ្ធានុភាពដែលគ្មានកម្រិតឡើយ។ យេរេមាដែលជាអ្នកប្រកាសទំនាយរបស់ព្រះបានបញ្ជាក់អំពីរឿងនេះដោយពោលថា៖ «ឱព្រះអម្ចាស់យេហូវ៉ាអើយ! មើល! ទ្រង់បានបង្កើតផ្ទៃមេឃនឹងផែនដី ដោយសារព្រះចេស្ដាដ៏ធំរបស់ទ្រង់ នឹងព្រះពាហុដ៏លើកសំរេច គ្មានអ្វីដែលពិបាកពេកដល់ទ្រង់ទេ»។ (យេរេមា ៣២:១៧) ដោយសារព្រះបានបង្កើតផែនដីនិងធាតុទាំងឡាយនៅផែនដី នោះជាការសមហេតុសមផលដែលលោកដឹងអំពីរបៀបគ្រប់គ្រងអ្វីៗទាំងអស់ដើម្បីឲ្យមនុស្សអាចរស់នៅដោយសន្ដិភាពនិងដោយសុវត្ថិភាព។—ទំនុកតម្កើង ៣៧:១១; ១១៥:១៦
បើដូច្នេះ តើព្រះនឹងបំបាត់គ្រោះមហន្តរាយយ៉ាងដូចម្ដេច? សូមចាំអ្វីដែលលោកអ្នកបានអានក្នុងអត្ថបទទី២នៃទស្សនាវដ្ដីនេះដែលរៀបរាប់ថាអ្វីៗដ៏គួរឲ្យខ្លាចដែលមាននៅលើផែនដីនេះគឺជា«សញ្ញាសម្គាល់»ដែលបញ្ជាក់ថានេះជា«គ្រាចុងបញ្ចប់នៃរបៀបរបបពិភពលោក»។ លោកយេស៊ូបានមានប្រសាសន៍ថា៖ «ពេលដែលអ្នករាល់គ្នាឃើញការទាំងនេះកើតឡើង ចូរដឹងថារាជាណាចក្ររបស់ព្រះគឺជិតដល់ហើយ»។ (ម៉ាថាយ ២៤:៣; លូកា ២១:៣១) រាជាណាចក្ររបស់ព្រះដែលជារដ្ឋាភិបាលមួយដែលព្រះបង្កើតឡើងនៅស្ថានសួគ៌ នឹងកែប្រែផែនដី ហើយរដ្ឋាភិបាលនេះថែមទាំងអាចគ្រប់គ្រងធម្មជាតិបានទៀតផង។ ទោះជាព្រះយេហូវ៉ាមានឫទ្ធានុភាពដើម្បីសម្រេចអ្វីៗទាំងនេះដោយខ្លួនលោកផ្ទាល់ក៏ដោយ លោកបានសម្រេចចិត្តប្រគល់ភារកិច្ចនេះទៅបុត្ររបស់លោកវិញ។ ដោយនិយាយអំពីបុត្រនេះ ដានីយ៉ែលដែលជាអ្នកប្រកាសទំនាយបានពោលថា៖ «នោះបានប្រទានឲ្យទ្រង់មានអំណាចគ្រប់គ្រង នឹងសិរីល្អ ព្រមទាំងឲ្យមានរាជ្យផង ដើម្បីឲ្យបណ្ដាជនទាំងឡាយ សាសន៍ដទៃ នឹងមនុស្សគ្រប់ភាសាបានគោរពដល់ទ្រង់»។—ដានីយ៉ែល ៧:១៤
លោកយេស៊ូគ្រិស្តដែលជាបុត្ររបស់ព្រះបានទទួលឫទ្ធានុភាពដែលលោកត្រូវការដើម្បីកែប្រែស្ថានភាពនៅផែនដីឲ្យមនុស្សរស់នៅដោយមានសុភមង្គល។ ពីរពាន់ឆ្នាំមុន ពេលដែលលោកយេស៊ូរស់នៅលើផែនដី លោកបានបង្ហាញថា លោកមានសមត្ថភាពគ្រប់គ្រងធម្មជាតិ។ ជាឧទាហរណ៍ នៅពេលមួយ ពេលដែលលោកនិងពួកអ្នកកាន់តាមជិះទូកនៅសមុទ្រកាលីឡេ «មានខ្យល់ព្យុះដ៏ខ្លាំងមួយ ហើយរលកបានបក់បោកវាយផ្ទប់ទូកនោះ រហូតដល់ទឹកចូលជិតពេញ»។ ពួកអ្នកកាន់តាមលោកតក់ស្លុតខ្លាំងណាស់។ ដោយភ័យខ្លាចស្លាប់ ពួកគេបានសុំជំនួយពីលោកយេស៊ូ។ តើលោកយេស៊ូបានធ្វើយ៉ាងណា? លោកគ្រាន់តែ«ស្តីបន្ទោសខ្យល់ ថែមទាំងស្រដីទៅសមុទ្រថា៖ ‹ចូរស្ងៀមទៅ!›។ រួចខ្យល់ក៏ស្ងប់ ហើយក៏កើតមានសភាពស្ងប់ស្ងាត់ក្រៃលែង»។ ពួកអ្នកកាន់តាមលោកបាននឹកអស្ចារ្យ ហើយសួរគ្នាថា៖ «តើលោកនេះពិតជាអ្នកណា? សូម្បីតែខ្យល់និងសមុទ្រក៏ស្ដាប់បង្គាប់លោកដែរ»។—ម៉ាកុស ៤:៣៧-៤១
ក្រោយពីពេលនោះមក លោកយេស៊ូបានឡើងទៅស្ថានសួគ៌ជាបុគ្គលវិញ្ញាណ ហើយលោកបានទទួលឫទ្ធានុភាពនិងអំណាចកាន់តែខ្លាំង។ ក្នុងឋានៈជាស្តេចនៃរាជាណាចក្ររបស់ព្រះ លោកមានអំណាចនិងសមត្ថភាពកែប្រែអ្វីៗទាំងអស់ដែលចាំបាច់ដើម្បីឲ្យមនុស្សរស់នៅដោយសុខសាន្ត និងដោយសុវត្ថិភាពនៅផែនដី។
ក៏ប៉ុន្តែ ដូចយើងបានឃើញ បញ្ហា និងគ្រោះមហន្តរាយជាច្រើន កើតឡើងដោយសារស្នាដៃរបស់មនុស្ស ដែលពួកគេបណ្ដាលឡើង ឬធ្វើឲ្យមានកាន់តែច្រើនឡើងដោយភាពអាត្មានិយមនិងចិត្តលោភលន់ ដើម្បីជញ្ជក់យកផលប្រយោជន៍ពីមនុស្ស។ តើរាជាណាចក្រនេះនឹងធ្វើយ៉ាងណាចំពោះពួកអ្នកដែលបន្តប្រព្រឹត្តអ្វីៗទាំងនោះ ហើយមិនព្រមកែប្រែ? គម្ពីរបានចែងថា លោកម្ចាស់យេស៊ូលេចមក«ពីស្ថានសួគ៌ជាមួយនឹងបណ្ដាទេវតាខ្លាំងក្លារបស់លោក ក្នុងអណ្ដាតភ្លើង ពេលដែលលោកសងសឹកពួកអ្នកដែលមិនស្គាល់ព្រះ និងពួកអ្នកដែលមិនស្ដាប់តាមដំណឹងល្អអំពីលោកយេស៊ូជាម្ចាស់របស់យើង»។ ពិតមែនហើយ លោកនឹង«បំផ្លាញពួកអ្នកដែលកំពុងបង្ខូចផែនដី»។—ថែស្សាឡូនិចទី២ ១:៧, ៨; ការបើកបង្ហាញ ១១:១៨
ក្រោយមក លោកយេស៊ូគ្រិស្តដែលជា«ស្តេចលើស្តេចទាំងអស់»នឹងគ្រប់គ្រងទាំងស្រុងលើធម្មជាតិនៅផែនដី។ (ការបើកបង្ហាញ ១៩:១៦) លោកនឹងមិនឲ្យរាស្ត្រនៃរាជាណាចក្រនោះរងគ្រោះដោយសារគ្រោះមហន្តរាយធម្មជាតិទៀតឡើយ។ លោកនឹងប្រើឫទ្ធានុភាពរបស់លោកកាន់កាប់លើធម្មជាតិដើម្បីឲ្យមនុស្សទទួលប្រយោជន៍ពីអាកាសធាតុនិងរដូវកាលផ្សេងៗ។ ជាលទ្ធផល អ្វីដែលព្រះបានសន្យាចំពោះរាស្ត្ររបស់លោកជាយូរយារមកហើយនឹងបានសម្រេច ពោលគឺ៖ ‹ខ្ញុំនឹងបង្អុរភ្លៀងមកតាមរដូវកាល ហើយដីនឹងចំរើនផល ឯដើមឈើទាំងប៉ុន្មាននៅចំការ នោះនឹងបង្កើតផ្លែដែរ›។ (លេវីវិន័យ ២៦:៤) មនុស្សនឹងអាចសង់ផ្ទះដោយមិនភ័យព្រួយថាបាត់បង់ទៅវិញនៅក្នុងគ្រោះមហន្តរាយណាមួយឡើយ ព្រោះ«គ្រានោះ មនុស្សនឹងសង់ផ្ទះ ហើយនឹងអាស្រ័យនៅផង ក៏នឹងដាំចំការទំពាំងបាយជូរ ហើយនឹងបរិភោគផលដែរ»។—អេសាយ ៦៥:២១
តើលោកអ្នកត្រូវធ្វើអ្វី?
ដូចមនុស្សជាច្រើន លោកអ្នកច្បាស់ជាចង់រស់នៅក្នុងពិភពលោកមួយដែលគ្មានគ្រោះមហន្តរាយមកបំផ្លិចបំផ្លាញទៀត។ បើដូច្នេះ តើលោកអ្នកត្រូវធ្វើអ្វីដើម្បីរស់នៅក្នុងពិភពលោកនោះ? ដោយសារ«ពួកអ្នកដែលមិនស្គាល់ព្រះ» និង«ពួកអ្នកដែលមិនស្ដាប់តាមដំណឹងល្អ»នឹងមិនបានរស់នៅក្នុងពិភពលោកដែលលែងមានគ្រោះមហន្តរាយនៅពេលអនាគតនោះ នេះបញ្ជាក់យ៉ាងច្បាស់ថា នៅឥឡូវនេះ លោកអ្នកត្រូវរៀនអំពីព្រះ ហើយគាំទ្រការរៀបចំរបស់លោកស្តីអំពីអ្នកគ្រប់គ្រងផែនដីនេះ។ ព្រះតម្រូវឲ្យយើងស្គាល់លោកឲ្យបានច្បាស់ ហើយស្ដាប់តាមដំណឹងល្អអំពីរាជាណាចក្រដែលលោកបានបង្កើតឡើងតាមរយៈបុត្ររបស់លោក។
វិធីដ៏ល្អបំផុតដែលយើងអាចរៀនអ្វីៗទាំងនេះគឺដោយសិក្សាគម្ពីរឲ្យបានដិតដល់។ ក្នុងគម្ពីរមានការណែនាំដែលជួយយើងឲ្យមានលក្ខណៈគ្រប់គ្រាន់ក្នុងការរស់នៅក្នុងពិភពលោកដែលប្រកបដោយសុវត្ថិភាពដែលនឹងមានក្រោមការគ្រប់គ្រងរបស់រាជាណាចក្រ។ យើងសូមអញ្ជើញលោកអ្នកឲ្យរៀនជាមួយនឹងសាក្សីព្រះយេហូវ៉ាអំពីអ្វីដែលគម្ពីរបង្រៀន។ ពួកគេប្រុងប្រៀបជួយលោកអ្នកក្នុងគោលបំណងនេះជានិច្ច។ លោកអ្នកអាចជឿជាក់ថា បើលោកអ្នកខំព្យាយាមដើម្បីស្គាល់ព្រះ ហើយស្ដាប់តាមដំណឹងល្អ នោះពាក្យនៅសុភាសិត ១:៣៣នឹងក្លាយជាការពិតចំពោះលោកអ្នក ខនោះចែងថា៖ ‹អ្នកណាដែលស្ដាប់តាមខ្ញុំ នោះនឹងនៅដោយសេចក្ដីសុខពិត ហើយនឹងមានសេចក្ដីសំរាក ឥតភ័យខ្លាចចំពោះការអាក្រក់ឡើយ›។
