តើអនាគតរបស់អ្នកពិតជាផ្អែកទៅលើអ្វី?
មនុស្សជាច្រើនជឿថា អ្វីមួយដែលពួកគេមើលមិនឃើញកំពុងតែគ្រប់គ្រងទៅលើអនាគតរបស់ពួកគេ។ ដោយផ្អែកលើជំនឿនេះពួកគេធ្វើតាមទំនៀមទម្លាប់ដែលពួកគេជឿថានឹងនាំឲ្យពួកគេមានអនាគតល្អ។
អ្វីដែលមនុស្សជាច្រើនជឿ
ហោរាសាស្ត្រ: មនុស្សខ្លះជឿថា ទីតាំងនៃផ្កាយនៅពេលដែលបុគ្គលម្នាក់កើតកំណត់អនាគតរបស់ពួកគេ។ ដូច្នេះ ពួកគេមើលហោរាសាស្ត្រ ដើម្បីដឹងថាពួកគេគួរឬមិនគួរធ្វើអ្វីមួយ ដើម្បីជៀសវាងកុំឲ្យមានគ្រោះថ្នាក់ ឬដើម្បីមានជីវិតជោគជ័យ។
ហុងស៊ុយ: មនុស្សខ្លះជឿថា បើពួកគេសង់ឬរៀបផ្ទះតាមរបៀបណាមួយ នោះពួកគេនឹងទទួលបានសុភមង្គលនិងភាពជោគជ័យ។ ឡូវីង *ដែលរស់នៅទីក្រុងហុងកុងបាននិយាយថា៖«គ្រូហុងស៊ុយម្នាក់បានប្រាប់ខ្ញុំថា បើខ្ញុំដាក់កែវចរណៃក្នុងហាងរបស់ខ្ញុំនៅកន្លែងដែលគាត់បានកំណត់ឲ្យ នោះខ្ញុំនឹងអាចរកលុយបានច្រើនជាងមុន»។
ការសែនជីដូនជីតា: មនុស្សខ្លះជឿថា ពួកគេត្រូវគោរពបូជាជីដូនជីតាដែលបានស្លាប់ឬព្រះឯទៀត ដើម្បីទទួលការការពារនិងពរពីពួកគាត់។ វ៉ាន់ដែលរស់នៅប្រទេសវៀតណាមបាននិយាយថា៖ «ខ្ញុំជឿថាបើខ្ញុំសែនជីដូនជីតារបស់ខ្ញុំ នោះខ្ញុំនឹងទទួលបានជីវិតល្អនៅឥឡូវនេះ ហើយខ្ញុំនិងកូនៗនឹងមានអនាគតល្អ»។
ការចាប់ជាតិ: មនុស្សជាច្រើនជឿថា ពេលបុគ្គលម្នាក់ស្លាប់គាត់នឹងចាប់ជាតិ ហើយនេះនឹងកើតឡើងម្ដងហើយម្ដងទៀត។ ពួកគាត់ជឿថាអ្វីដែលល្អឬអាក្រក់ដែលពួកគាត់ជួបប្រទះ គឺដោយសារអ្វីដែលពួកគាត់បានធ្វើកាលពីជាតិមុន។
ប៉ុន្តែមនុស្សជាច្រើនគិតថា អ្វីទាំងនេះគឺគ្រាន់តែជាអបិយជំនឿប៉ុណ្ណោះ។ ទោះជាយ៉ាងនេះក៏ដោយ ពួកគេនៅតែចូលចិត្តការទាយបាតដៃ មើលហោរាសាស្ត្រ ក្ដារសម្រាប់ទស្សន៍ទាយ ទាយសន្លឹកបៀរ និងអ្វីស្រដៀងនេះ។ ពួកគេមានអារម្មណ៍ថា អ្វីទាំងនេះប្រហែលជានឹងអាចជួយពួកគេឲ្យដឹងអំពីអនាគតរបស់ខ្លួន។
តើមានលទ្ធផលអ្វី?
តើមនុស្សដែលទុកចិត្តទៅលើជំនឿ និងទំនៀមទម្លាប់ទាំងនេះមានជីវិតនិងអនាគតល្អឬទេ?
សូមពិចារណាអំពីបទពិសោធន៍របស់ហាវដែលរស់នៅប្រទេសវៀតណាម។ គាត់មើលហោរាសាស្ត្រ ហុងស៊ុយ ហើយសែនជីដូនជីតា ដើម្បីណែនាំជីវិតគាត់។ តើគាត់បានទទួលជោគជ័យឬទេ? ហាវនិយាយថា៖ «ការរកស៊ីរបស់ខ្ញុំបរាជ័យ ខ្ញុំជំពាក់បំណុលគេ មានបញ្ហាក្នុងក្រុមគ្រួសារ ហើយធ្លាក់ទឹកចិត្តយ៉ាងខ្លាំង»។
ឆមិងមកពីប្រទេសតៃវ៉ាន់ក៏ជឿទៅលើហោរាសាស្ត្រ ការចាប់ជាតិ ព្រេងវាសនា ហុងស៊ុយ និងការសែនជីដូនជីតាដែរ។ ក្រោយពីគាត់បានពិនិត្យមើលជំនឿទាំងនេះយ៉ាងដិតដល់គាត់បាននិយាយថា៖ «ខ្ញុំឃើញថាការបង្រៀន និងទំនៀមទម្លាប់ទាំងនេះផ្ទុយពីគ្នា ហើយធ្វើឲ្យខ្ញុំភាន់ច្រឡំ។ ម្យ៉ាងទៀត ការមើលហោរាសាស្ត្រភាគច្រើនគឺមិនត្រឹមត្រូវនោះទេ។ រីឯជំនឿទៅលើការចាប់ជាតិវិញ បើយើងមិនចាំនូវអ្វីដែលយើងបានធ្វើកាលពីជាតិមុន តើតាមរបៀបណាយើងអាចផ្លាស់ប្ដូរហើយប្រព្រឹត្តល្អជាងនៅជាតិនេះ?»។
«ខ្ញុំឃើញថាការបង្រៀន និងទំនៀមទម្លាប់ទាំងនេះផ្ទុយពីគ្នា ហើយធ្វើឲ្យខ្ញុំភាន់ច្រឡំ»។—ឆមិងពីប្រទេសតៃវ៉ាន់
ដូចហាវ ឆមិង និងមនុស្សជាច្រើនទៀតបានទទួលស្គាល់ អនាគតរបស់យើងមិនផ្អែកទៅលើព្រេងវាសនា ផ្កាយ ជីដូនជីតាដែលបានស្លាប់ ឬការចាប់ជាតិនោះទេ។ តើនេះមានន័យថាយើងមិនអាចគ្រប់គ្រងទៅលើអនាគតរបស់យើងឬ?
មនុស្សជាច្រើនគិតថា ការទទួលបានការអប់រំខ្ពស់និងទ្រព្យសម្បត្តិច្រើននឹងធានាថា ពួកគេនឹងទទួលបានអនាគតដ៏ល្អប្រសើរ។ តើអ្នកដែលធ្វើដូច្នេះបានទទួលលទ្ធផលអ្វី?
^ វគ្គ 5 ក្នុងអត្ថបទនេះនិងអត្ថបទបន្តបន្ទាប់ ឈ្មោះខ្លះបានត្រូវផ្លាស់ប្ដូរ។
^ វគ្គ 16 ពាក្យនេះដកស្រង់ពីគម្ពីរបរិសុទ្ធនៅកាឡាទី ៦:៧។ នេះស្រដៀងនឹងសុភាសិតនៅតំបន់អាស៊ីដែលនិយាយថា៖ «ដាំអីបាននឹង»។