ចូរចាំយាម!
ឆ្នាំ២០២៣ជាឆ្នាំនៃទុក្ខកង្វល់ តើគម្ពីរចែងយ៉ាងណា?
ក្នុងអំឡុងឆ្នាំ២០២៣ មានព្រឹត្តិការណ៍ជាច្រើននៅទូទាំងពិភពលោក ដែលបញ្ជាក់យ៉ាងច្បាស់ថាយើងកំពុងរស់នៅគ្រាមួយដែលគម្ពីរហៅថា«គ្រាចុងក្រោយបង្អស់»។ (ធីម៉ូថេទី២ ៣:១) សូមកត់សម្គាល់ព្រឹត្តិការណ៍ផ្សេងៗដែលស្របនឹងអ្វីដែលគម្ពីរបានប្រកាសទុកជាមុនថានឹងកើតឡើងនៅគ្រារបស់យើង។
ព្រឹត្តិការណ៍ផ្សេងៗដែលទាក់ទងនឹងគម្ពីរ
«ឮសូរសង្គ្រាម»។—ម៉ាថាយ ២៤:៦
«សង្គ្រាមនិងអំពើហិង្សាមានកាន់តែច្រើនឡើងនៅគ្រប់ទីកន្លែងនៅទូទាំងពិភពលោក»។ a
សូមមើលអត្ថបទដែលមានចំណងជើងថា«តើអ្នកណានឹងសង្គ្រោះជនស្លូតត្រង់?» និងអត្ថបទ«រដ្ឋាភិបាលទូទាំងពិភពលោកចំណាយ២.០០០.០០០.០០០.០០០ដុល្លារទៅលើវិស័យយោធា»។
«មានរញ្ជួយដីពីកន្លែងមួយទៅកន្លែងមួយ»។—ម៉ាកុស ១៣:៨
«តាំងពីដើមឆ្នាំ២០២៣ មានរញ្ជួយដីចំនួន១៣កន្លែងដែលមានកម្រិតលើស៧វិចទ័រ ហើយនេះជាកម្រិតខ្ពស់បំផុតក្នុងកំណត់ត្រាពិភពលោក»។ b
សូមមើលអត្ថបទដែលមានចំណងជើងថា«ការរញ្ជួយដីដ៏ខ្លាំងនៅប្រទេសតួកគីនិងប្រទេសស៊ីរី»។
«ឃើញអ្វីដែលគួរឲ្យខ្លាច»។—លូកា ២១:១១
អគ្គលេខាធិការនៃអង្គការសហប្រជាជាតិ លោកអង់តូនីញ៉ូ គុថេរិស បានរៀបរាប់ថា៖«សម័យកាលពិភពលោកដែលក្ដៅខ្លាំងបានកន្លងផុតទៅ ហើយសម័យកាលពិភពលោកដែលកាន់តែក្ដៅជាងបានចូលមកដល់?»។ c
សូមមើលអត្ថបទដែលមានចំណងជើងថា«រដូវក្ដៅឆ្នាំ២០២៣កាន់តែក្ដៅឡើងនៅជុំវិញពិភពលោក»។
«មានការអត់ឃ្លាន»។—ម៉ាថាយ ២៤:៧
«ឆ្នាំ២០២៣ក៏ជាឆ្នាំដែលមនុស្សពិបាកផ្គត់ផ្គង់អាហារដល់ក្រុមគ្រួសារដែរ»។ d
សូមមើលអត្ថបទដែលមានចំណងជើងថា«ការខ្វះស្បៀងអាហារនៅទូទាំងពិភពលោកដោយសារសង្គ្រាមនិងបម្រែបម្រួលអាកាសធាតុ»។
«លំបាកខ្លាំងណាស់»។—ធីម៉ូថេទី២ ៣:១
«នៅទូទាំងពិភពលោក មនុស្សម្នាក់ក្នុងចំណោម៨នាក់កំពុងប្រឈមនឹងបញ្ហាសុខភាពផ្លូវចិត្ត»។ e
សូមមើលអត្ថបទដែលមានចំណងជើងថា«បញ្ហាផ្លូវចិត្តមានកាន់តែច្រើនឡើងលើពួកយុវវ័យ»។
តើយើងរំពឹងថានឹងមានអ្វីខ្លះកើតឡើងនៅឆ្នាំ២០២៤?
គ្មានអ្នកណាដឹងប្រាកដទេថានឹងមានអ្វីកើតឡើងនៅឆ្នាំ២០២៤។ ប៉ុន្តែ ព្រឹត្តិការណ៍ផ្សេងៗនៅទូទាំងពិភពលោកបញ្ជាក់ថា មិនយូរទៀតរាជាណាចក្រព្រះនឹងគ្រប់គ្រងជំនួសរដ្ឋាភិបាលរបស់មនុស្ស។ បន្ថែមទៅទៀត រាជាណាចក្រព្រះដែលជារដ្ឋាភិបាលនៅស្ថានសួគ៌ នឹងបំបាត់ចោលនូវដើមហេតុទាំងអស់ដែលនាំឲ្យមនុស្សរងទុក្ខនិងខ្វល់ចិត្ត។—ដានីយ៉ែល ២:៤៤; ការបើកបង្ហាញ ២១:៤
ដំណាលគ្នានោះ ពេលដែលយើងខ្វល់ចិត្តនិងថប់បារម្ភ យើងអាចស្វែងរកជំនួយពីព្រះ។ គម្ពីរចែងថា៖
«ពេលដែលខ្ញុំភ័យខ្លាច ខ្ញុំទុកចិត្តលោក»។—ចម្រៀងសរសើរព្រះ ៥៦:៣
តើតាមរបៀបណាយើងអាចបង្ហាញថាយើងទុកចិត្តព្រះ? យើងសូមអញ្ជើញលោកអ្នករៀនថែមទៀតអំពីសេចក្ដីសន្យាដែលមាននៅក្នុងគម្ពីរ ដែលថានឹងលែងមានការឈឺចាប់និងទុក្ខវេទនាទៀត។ សូមសាកល្បងរៀនវគ្គសិក្សាគម្ពីរដោយឥតគិតថ្លៃ ដើម្បីឃើញថាសេចក្ដីសន្យាក្នុងគម្ពីរមានប្រយោជន៍យ៉ាងណាចំពោះលោកអ្នកនិងក្រុមគ្រួសារ។
a នៅថ្ងៃទី៣០ ខែតុលា ឆ្នាំ២០២៣ អេមម៉ា បៀល និងភីធើ សាលីសប៊ូរីបានចេញអត្ថបទមួយដែលមានចំណងជើងថា«ពិភពលោកកំពុងមានសង្គ្រាម ហេតុអ្វីមានសង្គ្រាមច្រើនម្ល៉េះ?»(Foreign Affairs)។
b នៅខែឧសភា ឆ្នាំ២០២៣ អត្ថបទ«ឆ្នាំ២០២៣ជាឆ្នាំដែលមានរញ្ជួយដីធំៗហៀបនឹងបំបែកកំណត់ត្រាពិភពលោក»(Earthquake News)។
c «ការថ្លែងការណ៍ពីអគ្គលេខាធិការនៃអង្គការសហប្រជាជាតិស្ដីអំពីបម្រែបម្រួលអាកាសធាតុ» (អត្ថបទមួយពីអង្គការសហប្រជាជាតិ ដែលចុះផ្សាយនៅថ្ងៃទី២៧ ខែកក្កដា ឆ្នាំ២០២៣)។
d អង្គការកម្មវិធីស្បៀងអាហារពិភពលោកបានចេញអត្ថបទមួយដែលមានចំណងជើងថា«ការខ្វះស្បៀងអាហារនៅទូទាំងពិភពលោក»។
e អត្ថបទពីអង្គការសុខភាពពិភពលោកដែលមានចំណងជើងថា«ទិវាសុខភាពផ្លូវចិត្ត ឆ្នាំ២០២៣» (ចុះផ្សាយនៅថ្ងៃទី១០ ខែតុលា ឆ្នាំ២០២៣)។