ចូរចាំយាម!
ហេតុអ្វីមនុស្សមិនអាចធ្វើឲ្យមានសន្តិភាព? តើគម្ពីរចែងយ៉ាងណា?
ពួកអ្នកដឹកនាំក្នុងពិភពលោកនិងអង្គការអន្តរជាតិមិនអាចនាំមកនូវសន្តិភាពដល់មនុស្សបានទេ។ សព្វថ្ងៃនេះ មានសង្គ្រាមសាហាវៗកាន់តែច្រើនឡើង បើគិតតាំងពីពេលមានសង្គ្រាមលោកលើកទី២។ មនុស្សប្រហែល២.០០០.០០០.០០០នាក់កំពុងរស់នៅតំបន់ដែលមានសង្គ្រាម។ ចំនួននេះស្មើនឹង១ភាគ៤នៃមនុស្សក្នុងពិភពលោកទាំងមូល។
ហេតុអ្វីមនុស្សមិនអាចធ្វើឲ្យមានសន្តិភាព? តើគម្ពីរចែងយ៉ាងណា?
មូលហេតុបីយ៉ាងដែលមនុស្សមិនអាចនាំឲ្យមានសន្តិភាព
១. មនុស្សបង្ហាញចិត្តគំនិតដែលរារាំងការធ្វើឲ្យមានសន្តិភាព សូម្បីតែពួកគេខំព្យាយាមធ្វើឲ្យមានសន្តិភាពក៏ដោយ។ គម្ពីរបានប្រាប់ទុកជាមុនថាក្នុងអំឡុងគ្រារបស់យើង «មនុស្សនឹងស្រឡាញ់តែខ្លួនឯង ស្រឡាញ់ប្រាក់ អួតបំប៉ោង ក្រអឺតក្រទម . . . គ្មានភក្ដីភាព . . . មិនព្រមស្រុះស្រួលគ្នា . . . មិនចេះទប់ចិត្ត កាចសាហាវ . . . ធ្វើតាមទំនើងចិត្ត មានមោទនភាពហួសហេតុពេក»។—ធីម៉ូថេទី២ ៣:២-៤
២. មិនថាមនុស្សម្នាក់ឬជាក្រុមក្ដី ពួកគេគ្មានសមត្ថភាពដោះស្រាយបញ្ហារបស់ខ្លួនបានទេ បើគ្មានជំនួយពីព្រះយេហូវ៉ា aដែលជាអ្នកបង្កើត។ គម្ពីរប្រាប់ថា៖«មនុស្សគ្មានសិទ្ធិដឹកនាំផ្លូវរបស់ខ្លួនទេ ហើយក៏គ្មានសមត្ថភាពតម្រង់ជំហានរបស់ខ្លួនដែរ»។—យេរេមា ១០:២៣
៣. ពិភពលោកនេះនៅក្រោមអំណាចរបស់មេកំណាចសាថានដែលជាអ្នកគ្រប់គ្រងដ៏អាក្រក់និងសាហាវឃោរឃៅ ហើយមេកំណាចនេះ«កំពុងបំភាន់ពិភពលោកទាំងមូល»។ (ការបើកបង្ហាញ ១២:៩) ដូច្នេះ ដរាបណា«ពិភពលោកទាំងមូលនៅក្រោមអំណាចរបស់មេកំណាច» ដរាបនោះសង្គ្រាមនិងជម្លោះនឹងមានរហូត។—យ៉ូហានទី១ ៥:១៩
តើអ្នកណាអាចនាំឲ្យមានសន្តិភាព?
គម្ពីរផ្ដល់ការធានាដល់យើងថា នឹងមានសន្តិភាពជាក់ជាមិនខាន។ ប៉ុន្តែ មិនមែនមកពីការខំប្រឹងប្រែងរបស់មនុស្សទេ តែមកពីព្រះវិញ។
«ព្រះយេហូវ៉ាប្រកាសថា៖‹ព្រោះខ្ញុំដឹងច្បាស់នូវគំនិតដែលខ្ញុំកំពុងគិតចំពោះអ្នករាល់គ្នា គឺខ្ញុំចង់ឲ្យអ្នករាល់គ្នាមានសេចក្ដីសុខសាន្ត មិនមែនសេចក្ដីវេទនាទេ ហើយចង់ឲ្យអ្នករាល់គ្នាមានសេចក្ដីសង្ឃឹមនិងអនាគតល្អប្រសើរ›»។—យេរេមា ២៩:១១
តើព្រះនឹងសម្រេចសេចក្ដីសន្យានេះតាមរបៀបណា? គម្ពីរចែងថា៖«ព្រះដែលផ្ដល់សេចក្ដីសុខសាន្តនឹង . . . កិនកម្ទេចសាថាន»។ (រ៉ូម ១៦:២០) ព្រះមានរដ្ឋាភិបាលមួយនៅស្ថានសួគ៌ដែលគម្ពីរហៅថា«រាជាណាចក្ររបស់ព្រះ» ហើយមានលោកយេស៊ូគ្រិស្តជាស្ដេច។ តាមរយៈរាជាណាចក្រនោះ ព្រះនឹងនាំមកនូវសន្តិភាពពេញផែនដី។ (លូកា ៤:៤៣) ក្រោមការគ្រប់គ្រងរបស់លោកយេស៊ូ មនុស្សនឹងរៀនឲ្យចេះរស់នៅជាមួយគ្នាដោយសន្តិភាព។—អេសាយ ៩:៦, ៧
ដើម្បីរៀនថែមទៀត សូមអានអត្ថបទដែលមានចំណងជើងថា«តើរាជាណាចក្ររបស់ព្រះនឹងសម្រេចអ្វីខ្លះ?»
a យេហូវ៉ាជានាមរបស់ព្រះ។—ចម្រៀងសរសើរព្រះ ៨៣:១៨
លោកអ្នកក៏ប្រហែលជាចូលចិត្តដែរ
សំណួរនិងចម្លើយពីគម្ពីរ
ហេតុអ្វីពិបាកមានសន្តិភាពពេញពិភពលោកម្ល៉េះ?
ទោះជាមនុស្សខំព្យាយាមធ្វើឲ្យពិភពលោកមានសន្តិភាពក្ដី ការព្យាយាមនោះមិនបានសម្រេចទេ។ សូមពិចារណាមូលហេតុមួយចំនួន។
សំណួរនិងចម្លើយពីគម្ពីរ
សន្តិភាពនៅផែនដី តើនេះនឹងកើតឡើងយ៉ាងដូចម្ដេច?
សូមរៀនអំពីអ្វីដែលព្រះសន្យាថាលោកនឹងធ្វើដើម្បីនាំឲ្យមានសេចក្ដីសុខសាន្តនៅទូទាំងពិភពលោកតាមរយៈរាជាណាចក្ររបស់លោក។
សេចក្ដីបង្រៀនសំខាន់ៗក្នុងគម្ពីរ
តើរាជាណាចក្ររបស់ព្រះជាអ្វី?
ក្នុងអំឡុងកិច្ចបម្រើផ្សាយរបស់លោកយេស៊ូនៅផែនដី លោកបានបង្រៀនអំពីរាជាណាចក្រព្រះច្រើនជាងប្រធានបទផ្សេងទៀត។ អស់រាប់រយឆ្នាំមកហើយ អ្នកកាន់តាមលោកអធិដ្ឋានឲ្យរាជាណាចក្រនោះបានមកដល់។
ប្រធានបទឯទៀត
សេចក្ដីសង្ឃឹមដ៏ពិតប្រាកដកំពុងរង់ចាំអ្នក
ហេតុអ្វីសេចក្ដីសន្យាទាំងប៉ុន្មានដែលមានក្នុងគម្ពីរខុសពីសេចក្ដីសន្យាផ្សេងៗនិងការព្យាករណ៍របស់មនុស្ស?
