ចូរចាំយាម!

តើសង្គ្រាមអាម៉ាគេដូននឹងចាប់ផ្ដើមនៅប្រទេសអ៊ីស្រាអែលឬ? តើគម្ពីរចែងយ៉ាងណា?

លេង

គម្ពីរបានរៀបរាប់ថា អាម៉ាគេដូនមិនមែនជាសង្គ្រាមដែលមានឥទ្ធិពលទៅលើកន្លែងមួយប៉ុណ្ណោះទេ តែមានឥទ្ធិពលលើពិភពលោកទាំងមូល ព្រោះសង្គ្រាមនេះគឺរវាងរដ្ឋាភិបាលរបស់មនុស្សនិងព្រះ។

«បណ្ដាំពីពួកវិញ្ញាណកំណាច . . . ចេញទៅឯស្ដេចទាំងឡាយនៅគ្រប់ទីអាស្រ័យនៅផែនដី . . . ដើម្បីប្រមូលស្ដេចទាំងនោះសម្រាប់សង្គ្រាមដែលនឹងកើតឡើងនៅថ្ងៃដ៏ធំរបស់ព្រះដែលមានឫទ្ធានុភាពខ្លាំងក្លាបំផុត។ . . . ពួកគេបានប្រមូលស្ដេចទាំងនោះទៅឯកន្លែងដែលភាសាហេប្រឺហៅថាអាម៉ាគេដូន»។—ការបើកបង្ហាញ ១៦:១៤, ១៦

ពាក្យ«អាម៉ាគេដូន»មកពីពាក្យភាសាហេប្រឺហាមេគីដោន ដែលមានន័យថា«ភ្នំមេគីដោ»។ មេគីដោគឺជាក្រុងមួយនៅតំបន់អ៊ីស្រាអែលសម័យបុរាណ។ ហេតុនេះហើយ មនុស្សខ្លះជឿថាសង្គ្រាមអាម៉ាគេដូននឹងកើតឡើងនៅអ៊ីស្រាអែល។ ប៉ុន្តែ តំបន់ជុំវិញមេគីដោនិងតំបន់ផ្សេងទៀតនៅមជ្ឈិមបូព៌ាមានទីតាំងតូចពេកសម្រាប់ឲ្យ«ស្ដេចទាំងឡាយនៅគ្រប់ទីអាស្រ័យនៅផែនដី»និងសត្រូវរបស់ពួកគេធ្វើសមរភូមិនៅទីនោះបាន។

សៀវភៅការបើកបង្ហាញ បានត្រូវសរសេរជា«និមិត្តរូប»ឬតំណាងអ្វីមួយ។ (ការបើកបង្ហាញ ១:១) អាម៉ាគេដូនមិនមែនសំដៅទៅលើទីតាំងមែនទែនណាមួយទេ តែសំដៅទៅលើស្ថានភាពមួយដែលប្រជាជាតិទាំងឡាយនៅទូទាំងពិភពលោកប្រមូលផ្ដុំគ្នាដើម្បីធ្វើសង្គ្រាមផ្ដាច់ព្រ័ត្រជាមួយនឹងរដ្ឋាភិបាលរបស់ព្រះ។—ការបើកបង្ហាញ ១៩:១១-១៦, ១៩-២១

គម្ពីរផ្ដល់ការធានាដល់យើងថា ព្រះនឹងមិនអនុញ្ញាតឲ្យផែនដីត្រូវបំផ្លាញឡើយ។ ដើម្បីស្វែងយល់ថែមទៀត សូមអានអត្ថបទដែលមានចំណងជើងថា«តើផែនដីនឹងត្រូវបំផ្លាញចោលឬ?»
ដើម្បីរៀនថែមទៀតអំពីអ្វីដែលគម្ពីរចែងស្ដីអំពីអាម៉ាគេដូន សូមអានអត្ថបទចំណងជើងថា«តើសង្គ្រាមអាម៉ាគេដូនជាអ្វី?»
សូមស្វែងយល់ថាតើគម្ពីររៀបរាប់អំពីព្រឹត្តិការណ៍អ្វីខ្លះមុនឈានទៅដល់សង្គ្រាមអាម៉ាគេដូន។ សូមអានអត្ថបទដែលមានចំណងជើងថា«តើអ្វីជាគ្រាទុក្ខវេទនាជាខ្លាំង?»
តើគម្ពីរបានប្រកាសទុកជាមុនអំពីព្រឹត្តិការណ៍នៅអ៊ីស្រាអែលសព្វថ្ងៃនេះឬទេ? សូមស្វែងរកចម្លើយក្នុងអត្ថបទ«តើទំនាយគម្ពីរលើកឡើងអំពីអ៊ីស្រាអែលសព្វថ្ងៃនេះឬទេ?»