Karina qanoq nalaataqartoq atuaruk, takorloorullu ilinnut taama pisoqartoq. Illit qanoq iliussagaluarpit?

 Karina: “Atuariartortillunga sukkavallaamik biilerama politiip unitsippaanga akiligassillungalu. Ajuusaaqaanga! Anaana oqaluttuuppara, oqarfigaangalu ataata tamanna pillugu oqaluttuutissagiga – paasitikkusunngeqaaralu.”

Illit qanoq iliussagaluarpit?

1.  Periarfissaq A: Ataata qanoq pisoqarneranik oqaluttuutissanngilara, paasinngisaannassagaalu neriuutigalugu.

2.  Periarfissaq B: Ataata qanorpiaq pisoqarsimaneranik oqaluttuutissavara.

 Periarfissaq A immaqa toqqarusussagaluarpat. Anaanavimmi immaqa ataatannut nassuersimassasutit ilimagiinnassavaa. Kukkussutivilli – sukkavallaamik biilernivit arlaatigulluunniit kukkunivit – nassuerutiginissaannut pissutissaqarluarpoq.

1.  1. Eqqortuliornerummat. Biibilimi kristumiut ‘tamatigut eqqortumik ilioqquneqarput’. – Hebræerit 13:18.

    “Unneqqarikkumallunga iliuutsikkalu akisussaaffigiumallugit ilungersorpunga – kukkugaangamalu ingerlaannaq nassuerniartarpunga.” – Alexis.

2.  2. Kukkussutiminnik nassuerutiginnittut isumakkeerfigiumaneqarnerusarmata. Biibilimi ima allassimavoq: “Unioqqutitsinerminik isertuisoq pilluaatissaqanngilaq; ajortuliaminilli anngiiaatiginnittoq soraarussisorlu nallittorneqartussaavoq.” – Ussatit 28:13.

    “Kukkoreerluni nassuerniarneq sapernarsinnaavoq, allanilli tatigineqalissutigissavat. Paasissavaat unneqqarissuusutit. Kukkussutinnik nassuerutiginninnikkut pisoq ajortoq ajunngitsumut saatsissavat.” – Richard.

3.  3. Pingaarnertut, Jehovap Guutip tamanna iluarimmagu. Biibilimi ima allassimavoq: “[Jehova] sianiinaariniartartumik iluarinninngilluinnarpoq, unneqqarissunulli ikinngutaalluarpoq.” – Ussatit 3:32, NW.

    “Ingasattumik kukkoreerlunga paasiartulerpara kukkunera nassuerutigisariaqarlugu. Jehovap peqqusinermisut iliunngikkuma pilluaqqunavianngilaanga.” – Rachel.

 Taavami Karinap kukkussutini qanoq aaqqippaa? Akiligassinneqarnini ataataminut isertorniarsarigaluaruniulluunniit paasisaasussaavoq. Karina ima oqaluttuarpoq: “Ukioq ataatsip missaa qaangiummat ataatama sillimmasiinermut nalunaarsuutit misissoramigit sukkavallaamik biilernera pillugu akiligassinneqarnera paasivaa. Assut naveerneqarpunga – allaat anaanaga kamappoq oqarnermisut iliorsimannginnama.”

 Ilinniagassaq ilikkarneqartoq: Karina ima oqarpoq: “Kukkussutit isertuunniarsarigaanni pissutsit ajorneruliinnartarput. Kingusinnerusukkut kingunipilui atortariaqassavatit!”

 Inuit tamarmik kukkusarput. (Romamiut 3:23; 1 Johannesi 1:8) Ingerlaannarli nassuerneq maniguuttuunermik inersimalluartuunermillu ersersitsineruvoq.

 Iliuuserineqartussap tullia tassaavoq kukkussutit ilinniutiginissaat. Ajoraluartumik inuusuttut ilaat taamaaliunngitsoortarput. Immaqa inuusuttuaqqatut Priscillatut ima misigisimasutut misigipput: “Kukkussutikka nikallussutigisaqaakka. Suunngitsutut imminut isigisarpunga, kukkussutikka nanertuutaasutut uannut oqimaappallaartutut ittarput. Eqqortuliorsinnaanngitsutut pitsanngoriarfissaqanngitsutullu misigisarpunga.”

 Illit taamatut misigisarpit? Taamaappat una eqqaamajuk: Kukkussutigisimasavit eqqarsaatigiuarnerat biilertilluni tarrarsuuteeqqakkut kingumut isigiuarnermut assersuunneqarsinnaavoq. Pereersut eqqarsaatigiuarukkit suunngitsutut misigilissallutillu siunissami unamminiarnartut nalaatassatit nukissaaruffigissavatit.

 Soormi oqimaaqatigiissaarinerusumik isiginnittaaseqarniaruit?

 “Kukkussutitit kingumut qiviartakkit, iliuusereqqikkumanagilli ilinniutigikkit. Nikallussutiginissaasali tungaanut eqqarsaatigiuaqinagit.” – Elliot.

 “Inuttut pitsaanerulerniassagama tullianilu allatut iliuuseqarniassagama kukkussutima ilinniutigiuaannarnissaat anguniartarpara. Taamaaliorneq inuttut ineriartuutaajuaannarmat taamatut isiginnittaaseqarneq pitsaasuuvoq.” – Vera.