KAPITALI 35

Guutimut qanoq ikinngutaalersin­naavunga?

Jeremyp aliasun­nermini Guutimik ikinnguteqarnerup pingaaruteqassusia ilikkarpaa. Oqaluttuarpoq: “Aqqaneq-marlunnik ukioqarlunga ataatama qimappaatigut. Unnuit ilaanni qinutillunga Jehova uteriif­figaara ataataga angerlaq­qeqqullugu.”

Jeremy aliasun­nermini Biibilimik atualerpoq. Tussiaat 10:14 siumorpaa, atuaramiullu attortingaarpoq. Jehova pillugu tassani allassimavoq: “Sanngiitsoq tunaarlerpoq ilinnut, tassaagavit iliarsorortut ikiortaat.” Jeremy oqarpoq: “Misigivunga Jehovap oqaluukkaanga paasitil­lungalu ikiortaalluni. Tassa Ataatagivara. Allamik pitsaanerusumik ataataqarnerpa?”

JEREMYTUT misigisaqarsimaguit misigisaqarsiman­ngikkaluaruil­luunniit Biibilimi eqqaaneqarpoq Jehovap illit ikinngutigerusukkaatit. Imami Biibilimi allassimavoq: “Guuti qanillisiuk, taava ilissinnut qanillissaaq.” (Jaaku 4:8) Oqaatsit taakku qanoq isumaqarnersut eqqarsaatigiuk: Takusin­naanngik­kaluarit – aamma allaat naligin­ngikkaluarit – Jehovap Guutip illit ikinngutigerusuppaatit!

Guutimilli ikinnguteqarusukkuit illit iliuuseqar­tariaqarputit. Assersuutigalugu: Naasuuteqaruit nalunngilat nammineerluni ineriar­tornavian­ngitsoq. Naajartussappat imerter­neqartariaqarpoq, aamma nillertumiis­sanngilaq. Aamma Guutimik ikinnguteqarnermut tunngatillugu taamaappoq. Taamatut ikinngutigiinneq qanoq ineriar­tortissin­naaviuk?

Misissueq­qissaar­tarnerup pingaaruteqassusia

Ikinngutigiit attaveqatigiittarput – tassa tusarnaartarput oqaluut­tarlutillu. Aamma Guutimik ikinnguteqarnermi taamaappoq. Guutip uagutsinnut oqaasererusutai Biibilimik atuarnikkut misissueq­qissaar­nikkullu tusarnaar­tarpagut. – Tussiaat 1:2, 3.

Imaassin­naavorli atuarneq nuannarival­laanngikkit. Inuusut­torpassuit fjernsynerneq, spillerneq imaluunniit ikinngutinik ilagisaqarneq nuannarinerusarpaat. Guutimilli ikinnguteqarusukkuit taanna tusarnaar­tariaqarpat. Taamaattumik Oqaasia, Biibili, atuartariaqarpat.

Isumakuloqinalli. Biibilimik misissueq­qissaarneq pikkunaatsuusariaqanngilaq. Nuannaarutiginissaa ilikkarsinnaavat – aamma atuarumatuutut imminut isiginngik­kaluarlutit. Siullertut, Biibilimik atuartar­nissamut piffissamik immikkoor­titsisariaqarputit. “Skemaqarpunga,” niviarsiaraq Laisimik atilik oqarpoq. “Ullaat tamaasa Biibilimi kapitali ataaseq atuartarpara.” Maria 15-inik ukiulik allatut pilersaarusior­nikuuvoq. Oqarpoq: “Unnuit tamaasa innannginninni Biibilimik atualaar­tarpunga.”

Nammineq Biibilimik misissueq­qissaar­tarnissannik aallartik­kumallutit ungalusaq “ Biibilit misissoruk” takuuk. Taava ataani allaguk qaqugukkut 30 minutsiin­naalluunniit Guutip oqaasianik atuartarsin­naanerlutit.

․․․․․

Pilersaarusiorneq aallarniutaannaavoq. Immaqa misissueq­qissaar­taleruit paasilissavat Biibilimi allassimasut ilaat paasiuminaas­sinnaasut. Jezreel, 11-nik ukiulik, isumaqatigis­sagunarpat. Unneqqarilluni ima oqaluttuarpoq: “Biibilimi allassimasut ilaat oqimaal­lutillu pikkunaas­sinnaapput.” Taamatut misigiguit tunniutiin­naqinak. Eqqaamajuk Biibilimik misissueq­qissaaraangavit Jehova Guuti, ikinngutit, tusarnaartarit. Illit apeqqutaallutit Biibilimik misissueq­qissaarnerit pissanganarlunilu pissarsiaqar­narsinnaavoq!

Qinuneq pingaaruteqarluinnarpoq

Qinugaangatta Guutimut oqaluttarpugut. Qinunerup tunissutaanera qanoq tupinnar­tigisoq eqqarsaatigilaariaruk. Jehova Guuti qaquguk­kulluunniit, ullukkut unnuakkullu, oqaluus­sinnaavat. Saaffigiuaan­narsinnaavat, aamma qanoq oqaasis­saqarnersutit tusarnaarusuttarpaa. Taamaattumik Biibilimi kajumis­saarneqarputit ‘pissutsini qanorluunniit ittuni qinunikkut kimigiiser­nikkullu Guutimut ikioqqusarlutillu qujasas­sasutit.’ – Filippimiut 4:6.

Aap, Jehovamut eqqaasin­naasatit amerlaqaat. Assersuutigalugu ajornar­torsiutitit ernumas­sutigisin­naasatil­luunniit. Aamma qujamasuutigisatit eqqaasin­naavatit. Ikinngutivimmi ikiorlutit iliuusii pillugit qujaffigisan­nginnerpigit? Jehovamut aamma taamaaliorsin­naavutit, taanna kikkunnit tamanit illit pillutit iliuuseqar­nerpaajummat. – Tussiaat 106:1.

Jehovamut illit qujamasuutigisatit ataanut allattukkit.

․․․․․

Soorunami ilaannikkut isumakuluuteqarsin­naasarputit. Tussiaat 55:23-mi ima allassimavoq: “Nanertuutigisat Naalakkamut tunniuguk, taava isumagiumaarpaatit.”

Isumakuluutigisatit qinunermi eqqaarusutatit ataanut allattukkit.

․․․․․

Nammineq misigisatit

Guutimik ikinnguteqarnermi pingaar­titassannik allamik peqarpoq. Tussiaasiortoq Daavi allappoq: “Ussersiuk takusiullu Naalagaq ajunngitsuusoq.” (Tussiaat 34:9) Daavip Tussiaat 34 allakkamiuk ajoqisumik misigisaqaq­qammerpoq. Kunngimit Saulimit, toqutsiumatuumit, qimaaqqammerpoq. Aamma Filisterinut, akeqqaminut, qimaasariaqarsimavoq. Toqutaanissani annilaangagigamiuk Daavi silaarut­tuusaarluni qimaasin­naasimavoq. – Samuelimik 1. 21:11-16.

Daavi isumaqanngilaq silatusaal­laqqikkami qimaasin­naasimalluni, tamatumunngali Jehova ataqqinaatissippaa. Tussiaammi qulaani eqqaaneqartumi allappoq: “Naalakkap ujaranni akivaanga, aniguisip­paangalu siooqqatigisannit tamanit.” (Tussiaat 34:5) Tassa Daavip nammineq misigisani tunngavigalugu allat ima kajumis­saarsinnaavai: “Ussersiuk takusiullu Naalagaq ajunngitsuusoq.” a

Jehovap ilinnik isumagin­ninneranut uppernarsaataasumik misigisaqar­nikuuit? Taamaappat ataanut allakkit. Siunnersuut: Misigisaq annertoorsuusariaqanngilaq. Kisianni ulluinnarni ikiorneqarnerit, immaqa ilaat taamaat­tussaannartut isigisoorsin­naasartakkatit, eqqarsaatigikkit.

․․․․․

Immaqa angajoqqaavit Biibili pillugu ilinniar­tippaatit. Taamaappat iluanaarsimavutit. Kisianni illit nammineerlutit Guutimik ikinnguteqarnermik suli ineriar­tortitsisariaqarputit. Taamaaliorsiman­ngikkuit kapitalimi uani siunnersuutit aallartis­sutigisin­naavatit. Jehovap iliuuseqarninni tapersersorumaarpaatit. Biibilimi ima allassimavoq: “Qinujuarussi tunineqassaasi, ujarler­tuarussi nanisissaasi kasuttor­tuarussilu ammaanneqas­sallusi.” – Matiusi 7:7.

[Quppernerup ataani ilanngussaq]

ALLASSIMAFFIK PINGAARUTILIK

“Pilluarput anersaakkut pisariaqar­titaqar­nerminnik eqqumaf­figinnittut.” – Matiusi 5:3.

SIUNNERSUUT

Biibilimi kapitalit pingasut tallimal­luunniit ullut tamaasa atuartarukkit ukiup ataatsip ingerlanerani tamaat naammas­sissavat.

NALUNNGILIUK …?

Biibilimik misissuil­lutillu ilikkak­kannillu maleruaaninnit erserpoq Jehovap illit inuttut soqutigigaatit. – Johannesi 6:44.

ILIUUSERISASSATIT!

Biibilimik misissueq­qissaar­tarnera pissarsiaqarfiginerujumallugu ima iliussaanga ․․․․․

Qinusar­nerujumallunga ima iliussaanga ․․․․․

Uku sammisat pillugit angajoq­qaannut apeqqutigerusutakka ․․․․․

QANOQ ISUMAQARPIT?

● Biibilimik misissueq­qissaar­tarnerit qanoq nuannarinerulersin­naaviuk?

● Sooq inuit naammal­luinnan­ngitsut qinnutaat Jehovap tusarnaarusuttarpai?

● Qinusarnerit qanoq pitsaanerulersis­sinnaaviuk?

[Issuagaq]

“Mikinerullunga qinnutinnik uteqattaarisarpunga. Massakkulli ullormut nuannarisakka nuanniigisakkalu Jehovamut eqqaasarpakka. Uannut ullut tamarmik assigiin­ngittarmata qinnutima uteqattaan­nginnis­saannut iluaqutigisarpara.” – Eve

[Ungalusaq]

Biibili misissoruk

1. Biibilimi oqaluttuaq atuarusutat toqqaruk. Atuakkavit paasinissaanut ilisimas­susermik Guutimut qinugit.

 2. Oqaluttuaq atuaqqissaaruk. Piffissaqarfigilluaruk. Atuarnerani takorluuigit. Malugisaatitit atorluakkit. Susoqarnersoq takujuk. Inuttaasa nipaat tusaakkit. Silaannaa naamajuk. Nerisassat misilikkit, ilaalu ilanngullugit. Isumanni oqaluttuaq uummaaris­suutiguk.

3. Atuaqqam­mikkatit eqqarsaatigikkit. Imminut ima aperisarit, soorlu ukuninnga:

● Sooq Jehovap oqaluttuaq una oqaatsiminut ilanngutitsippaa?

● Kikkut ilaarneqarsin­naappat, kikkullu ilaarneqas­sanngillat?

● Atuarninni suut atoriaannaasut ilikkarpakka?

● Oqaluttuami Jehova pillugu qanoq ilikkagaqarpunga?

4. Jehovamut naatsumik qinugit. Biibilimik misissueq­qissaarninni suna ilikkarsimanerlugu inuuninnilu qanoq atorusun­nerlugu oqaluttuuguk. Jehovalu qujaffigiuartaruk Oqaatsiminik, Biibilimik illernartumik, tunisimammatit!

[Assiliartaq]

“Oqaatsitit naneruaraakka isikkannut, qaammaq­qutigalugillu aqqutinni.” – Tussiaat 119:105.

[Ungalusaq]

Pingaarnerit salliutittakkit

Qinunissamut ulapippal­laarpit? Biibilimik misissuinissaq piffissaqarfigin­ngiliuk? Tassa illit pingaar­nersiuinerit apeqqutaaginnarpoq.

Una misiliguk: Qattaq tigujuk ujaqqallu anngajaat ikillugit. Taava sioqqanik ulikkaarlugu immeruk. Maanna qattaq ujaqqanik sioqqanillu ulikkaarpoq.

Taava qattaq imaaruk. Maanna tulleriiaarneri paarlaakkit: Qattaq sioqqanik immeriarlugu ujaqqat ikikkit. Ilaat inissaqan­ngillat? Tassa sioqqat siulliullugit qattamut ikigakkit.

Sunaana ersersin­niarneqartoq? Biibilimi allassimavoq: ‘Suut pingaar­nerpaanersut qulakkiikkit.’ (Filippimiut 1:10) Inuunerit pingaaruteqan­ngitsunik, soorlu aliikkutassanik, ‘immersoq­qaarukku’ inuuninni pingaarutilinnut, tassa anersaakkut ittunut, piffissaqar­navianngilatit. Kisianni Biibilimi siunnersuutigineqartoq malikkukku paasissavat Guutimut kiffartornermi iliuuseqar­nissamut aamma aliikkutaqar­nissamut piffissaqalerlutit. Tassa apeqqutaaginnarpoq qattamut suut siulliullugit ikineritit!

[Assiliartaq]

Soorlu naasoq paarineqartartoq, Guutimik ikinnguteqarneq ineriar­tussappat aamma paarineqar­tariaqarpoq