BIIBILI INUIT INUUNERANNIK ALLANNGUISITSISARPOQ
Inuunera ajorsiartuinnarpoq
-
UKIOQ INUUIA: 1952
-
INUNNGORFIA: USA
-
OQALUTTUARSARTAA: NAKUUSERTARTOQ
INUUNINNI PEREERSUT:
Californiami Los Angelesimi, USA-miittumi, inupiluuserfiusutut ikiaroornartunillu atornerluiffiusutut tusaamasaasumi peroriartorpunga. Qatanngutigiinni arfiniliusuni angajulliup tulliuvunga.
Anaanama ilagiinnut naaggaartunut ilaasortatut perorsarpaatigut. Inuusuttuaraallungali marloqiusamik inooriaaseqarpunga. Sapaatikkut oqaluffimmi tussiaqattaartartunut ilaasarpunga. Sapaatip-akunnerata sinnerani festertarpunga, ikiaroortarpunga kinguaassiuutitigullu inuunerluttarlunga.
Kamajasuullungalu nakuusertarpunga. Paanermi ajugaaniarlunga sakkoq sunaluunniit atortarpara. Oqaluffimmi ilinniakkakka iluaqutiginngilakka. Taamani oqartarpunga: “Naalakkap akiniut pigaa – uangalu sakkoraanga!” 1960-ikkut naalerneranni ilinniarnertuunngorniarlunga De Sorte Panterenit, eqimattanit politikkilerisunit innuttaasut pisinnaatitaaffiinut tunngatillugu ingasattajaarniartartunit, sunnerneqarpunga. Ilinniartut innuttaasut pisinnaatitaaffiinik sorsuutiginnittut kattuffiannut ilaasortanngorpunga. Arlaleriarluta akerliussutsimik takutitsivugut, tamatumalu kingunerisaanik atuarfipput matuneqartarpoq.
Akerliussutsimik takutitsinerit naammaginnginnakkit allanik nagguilinnik unataaqataasalerpunga. Assersuutigalugu ilaanneeriarluta ikinngutikkalu qanga USA-mi inussiat Afrikamiut naalliutsinneqartarnerat pillugu filmit isiginnaartarpavut. Naapertuilluanngitsuliornerit taakku kamassaatigeriarlugit inuusuttut qaqortumik amillit filmertarfimmiittut saassuttarpavut. Taava qaqortumik amillit najugaqarfiinukartarpugut allanik unatagassarsiorluta.
Inuusuttuullunga qatanngutikka ilagalugit nakuusertarlungalu pinerluttarpunga. Politiillu saqitsaattarpugut. Nukkama ilaata inupiluit tusaamanerlugaasut ilaasortaaffigisai ilaasortaaffigilerpakka. Inuunera ajorsiartuinnarpoq.
BIIBILI INUUNINNIK QANOQ ALLANNGUISSUTIGIGIGA:
Ikinngutima ilaata angajoqqaavi Jehovamik Nalunaajaasuupput. Ilagiit ataatsimiinnerannut qaaqqummannga akuersivunga. Nalunaajaasut allaanerunerat ingerlaannaq takusinnaavara. Tamarmik Biibileqarlutillu ataatsimiinnermi Biibili atortarpaat. Allaat inuusuttut ataatsimiinnermi oqalugiartarput. Guutip Jehovamik ateqarnera paasillugu atiatalu atorneqarnera tusaallugu ajasoorutigaara. Tussiaat 83:19) Assigiinngitsunik inuiaassusillit ilagiinnut ilaasortaagaluartut naggueqatigiit avissaartuutinnginnerat ersarippoq.
(Aallaqqaammut Nalunaajaasunik Biibilimik atuaqqissaaqateqarusunngilanga, ataatsimiinnerinulli najuunneq nuannarisarpara. Taamaallunga Nalunaajaasut ataatsimiinnerannut najuutsillunga ikinngutikka nipilersortunik tusarnaariarput. Tassani inuusuttoq jakkiminik amermik tunniusserusunngitsoq persuttarlugu toquppaat. Aqaguani toqutsinertik oqarataarutigaat. Allaat eqqartuussaagamik pinerluttuliornertik illaruaatigaat. Amerlanerit inuuneq naallugu parnaarussaapput. Soorunami unnuk taanna ilagisimannginnakkit qujamasungaarpunga. Inuuninnik allannguiniarlunga Biibilimillu atuaqqissaartalerniarlunga aalajangerpunga.
Naggueqatigiit aalajangersimasut pillugit isummiussereertarneq atugarereerlugu Nalunaajaasut akornanni takusara ajasoorutigaara. Assersuutigalugu Nalunaajaasoq qaqortumik amilik nunamut allamut aallalerami qitornani ilaqutariinnut qernertumik amilinnut paaritippai. Aamma ilaqutariit qaqortumik amillit inuusuttoq qernertumik amilik angerlarsimaffeeruttoq inisimasoraat. Qulariunnaarpara Jehovap Nalunaajaasuisa Johannesip iivangkiiliuani 13:35-mi Jiisusip oqaasii uku maleruaraat: “Asaqatigiikkussi tamatumuuna tamarmik paasissavaat ajoqersugarigissi.” Qatanngutigiissuit ilumoortut nassaarisimallugit paasivara.
Biibilimik atuaqqissaartarnikkut eqqarsartaasera allanngortittariaqarlugu paasivara. Inuttut eqqissisimasuuginnarnanga taamatut inooriaaseqarnerup pitsaanerpaanera nassuerutigalugu isiginnittaasera allanngortittariaqarpara. (Romamiut 12:2) Anersaakkut siumukariartorpunga. 1974-imi januaarimi Jehovamut tunniulluinnarpunga kuisinnikkut.
Kuisereeraluarlunga kamajanera sulissutigisariaqarpara. Assersuutigalugu taamaalluta illumit illumut oqaluussitilluta biilinni radiomik tillittoq malersorpara. Angulerakku radio igippaa qimaaqqillunilu. Qanoq radio tigoqqissimagiga ilagisannut oqaluttuarigakku oqaluussisartoqatigiinni utoqqaanertap aperaanga: “Stephen, angusimasuugukku qanoq iliorsimassagaluarpit?” Apeqqut tamanna eqqarsalissutigalugulu eqqissisimasuunissannik sulissutiginninnissannut kajumississutigaara.
1974-imi oktobarimi qaammammut nalunaaquttap-akunneri 100-t inunnik Biibilimik ilinniartitsinermut atorniarlugit piffissaq tamaat kiffartulerpunga. Kingusinnerusukkut Jehovap Nalunaajaasuisa qullersaqarfianni Brooklynimi, New Yorkimiittumi, kajumissutsimik kiffartornermik immikkut pisinnaatitaaffeqalerpunga. 1978-imi anaanaga napparsimasoq paaqqutariniarlugu Los Angelesimut uterpunga. Ukiut marluk qaangiummata, Aarhonda, arnaq asasara katippara. Anaanama toqunissaata tungaanut paarinerani uannik tapersersuilluarpoq. Aarhondalu Napasuliap Alapernaarsuiffiup Biibilimik Ilinniarfiani Gileadimi ilinniareerluta Panamamut ajoqersuiartortitatut nuuppugut, ullorlu manna tikillugu suli Panamami ajoqersuiartortitaavugut.
Kuisinnerma kingorna pisut arlallit nakuusilissutigisinnaasakka nalaappakka. Inuit uannik kamassaarisut qimannissaat allatigulluunniit eqqissisimasuuniarnissara ilikkarnikuuara. Inuppassuit, aamma nuliama, pisuni taamaattuni eqqissisimasarnera pillugu nersualaartarpaannga. Allaat imminut tupigusutsittarpunga. Imaanngilaq uanga nammineq pissusinnik allannguisunga, kisianni Biibilip sunniineratigut allannguivunga. – Hebræerit 4:12.
QANOQ ILUAQUTIGIGIGA:
Biibili iluaqutigalugu inuunera siunertaqalerlunilu eqqissineq nuannarilerpara. Inuit unatartarunnaarlugit anersaakkut peqqisseqqullugit ikiortarpakka. Allaat ilinniarnertuunngorniarfimmi akerarinikuusara Biibilimik atuaqqissaaqatigisalerpara! Kuisereermat piffissap ilaani ineqatigiippugut. Suli qanimut ikinngutigiippugut. Ulloq manna tikillugu nuliaralu inuit 80-init amerlanerusut Biibilimik atuaqqissaaqatiginerisigut Jehovamik Nalunaajaasunngornissaannut ikiorpavut.
Jehovamut qujamasungaarpunga inuunera siunertaqalersillugulu qatanngutigiissuarnut pilluartunut ilaalersissimammanga.