جاستاردىڭ ساۋالدارى
سپورت تۋرالى نە ٴبىلۋىم كەرەك؟
سپورت ادامعا پايدا اكەلۋى نە زيان تيگىزۋى مۇمكىن. بۇل نە وينايتىنىڭا، قالاي وينايتىنىڭا جانە قانشا وينايتىنىڭا بايلانىستى.
قانداي پايداسى بار؟
سپورتتىق ويىندار ويناۋ دەنساۋلىققا پايدالى. كيەلى كىتاپتا دەنەنى جاتتىقتىرۋدىڭ پايداسى بار ەكەنى ايتىلادى (تىموتەگە 1-حات 4:8). رايان ەسىمدى جىگىت بىلاي دەيدى: «سپورتتىڭ ارقاسىندا ٵرقاشان بەلسەندى بولىپ جۇرە الاسىڭ. بۇل ۇيدە وتىرىپ، بەينەويىندار ويناعاننان الدەقايدا جاقسى».
سپورتتىق ويىندار وزگەلەرمەن يىق تىرەسە ارەكەت ەتۋگە جانە تارتىپكە ۇيرەتەدى. كيەلى كىتاپتا ماڭىزدى ٴبىر ويدى ٴتۇسىندىرۋ ٷشىن سپورت ٴتۇرى مىسال رەتىندە قولدانىلعان. وندا بىلاي دەلىنگەن: «جارىسقا تۇسكەن جۇيرىكتەردىڭ ٴبارى جۇگىرگەنمەن، بىرەۋى عانا جۇلدەگە يە بولاتىنىن بىلمەيسىڭدەر مە؟» سوسىن: «ٵربىر جارىسكەر بارلىق جاعىنان ۇستامدىلىق تانىتادى»،— دەلىنگەن (قورىنتتىقتارعا 1-حات 9:24، 25). ٴبىز بۇدان نەگە ۇيرەنەمىز؟ سپورتتىق ويىننىڭ ەرەجەلەرى بويىنشا ويناۋ ٷشىن ٴتارتىپتى ۇستانۋ جانە باسقا ويىنشىلارمەن ٴبىر ادامداي ارەكەت ەتۋ قاجەت. ابيگەيل ەسىمدى بويجەتكەن دە سولاي ويلايدى. ول بىلاي دەيدى: «سپورتپەن شۇعىلدانعاننىڭ ارقاسىندا مەن وزگەلەرمەن بىرلەسە ارەكەت ەتۋدى جانە جاقسى پىكىر الىسۋدى ۇيرەندىم».
سپورت ويىندارى دوستار تابۋعا كومەكتەسەدى. ادەتتە سپورتتىق ويىنداردى بىرنەشە ادام بىرگە وينايدى. «ويىنداردىڭ بارلىعى دەرلىك باقتالاستىقتى تالاپ ەتەدى،— دەيدى دجوردان دەگەن جىگىت.— ٴبىراق ەگەر ونى جاي كوڭىل كوتەرۋ ٴتۇرى دەپ قاراستىرساڭ، ول ادامدارمەن دوستاسۋعا زور سەپتىگىن تيگىزەدى».
قانداي زيانى بار؟
نە وينايسىڭ؟ جازبالاردا بىلاي دەلىنگەن: «ەحوبا ٵدىلدى دە، زۇلىمدى دا تەكسەرەدى، جاۋىزدىقتى سۇيەتىندەردى ول جەك كورەدى» (ٴزابۇر 11:5).
سپورتتىڭ كەيبىر تۇرلەرى وتە قاتىگەز. لورەن ەسىمدى بويجەتكەن بىلاي دەيدى: «بوكسشىلاردىڭ ماقساتى — قارسىلاسىن ۇرىپ-سوعۋ. ال ٴبىز ماسىحشىلەر بولعاندىقتان توبەلەستەن اۋلاق جۇرەمىز عوي. وندا نەگە ٴبىز وزگە ادامداردىڭ تاياق جەپ جاتقانىن تاماشالاپ وتىرۋىمىز كەرەك؟»
ويلانىپ كور: قاتىگەز ويىنداردى ويناسام نە ولاردى كورسەم، قاتىگەز بولىپ كەتپەيمىن دەپ اقتالىپ جۇرگەن جوقسىڭ با؟ ەگەر سولاي بولسا، ٴزابۇر 11:5 تە ەحوبانىڭ تەك اينالىساتىنداردى ەمەس، «جاۋىزدىقتى سۇيەتىندەردى» جەك كورەتىنى ايتىلعانىن ۇمىتپا.
قالاي وينايسىڭ؟ جازبالاردا بىلاي دەلىنگەن: «كۇنشىل نە اتاققۇمار بولماي، قايتا، كىشىپەيىلدىلىكپەن باسقالاردى وزدەرىڭنەن جوعارى قويىڭدار» (فىلىپىلىكتەرگە 2:3).
ەكى قارسىلاس توپ وينايتىن ويىندا قانداي دا ٴبىر شامادا باقتالاستىق بولادى. الايدا ەگەر ٴبىز تەك ۇتۋدى كوزدەسەك، ويىن ەش قۋانىش اكەلمەيدى. «ادامنىڭ باقتالاستىققا سالىنىپ كەتۋى وپ-وڭاي،— دەيدى برايان ەسىمدى جاسوسپىرىم.— ويىندى نەعۇرلىم جاقسى ويناساڭ، ساعان سوعۇرلىم كىشىپەيىل بولۋ قاجەت».
ويلانىپ كور: كريس ەسىمدى جىگىت بىلاي دەيدى: «ٴبىز اپتا سايىن فۋتبول وينايمىز. اراسىندا جاراقاتتار الىپ جاتامىز». ەندەشە، ويلانىپ كورشى: «قالاي ويناعان كەزدە ويىنشىلار كوپ جاراقات الادى؟ جاراقات الۋ قاۋپىن قالاي ازايتۋعا بولادى؟»
قانشا وينايمىن؟ جازبالاردا «نەنىڭ ماڭىزدىراق ەكەنىنە كوز جەتكىزىپ الۋىمىز» كەرەكتىگى ايتىلادى (فىلىپىلىكتەرگە 1:10).
ساعان قانداي ىستەردىڭ ماڭىزدىراق ەكەنىن شەشىپ الۋ كەرەك. رۋحاني ىستەردى ٴبىرىنشى ورىنعا قويعانىڭ ٴجون. ويىنداردىڭ كوبىسىن ويناۋعا نە تاماشالاۋعا بىرنەشە ساعات كەتەدى. داريا دەگەن جاس ايەل بىلاي دەيدى: «انام ەكەۋمىز تەلەديداردان ويىنداردى تاماشالاۋعا قانشا ۋاقىت جۇمسايتىنىما بايلانىستى ٴجيى سوزگە كەلىپ قالاتىنبىز، ويتكەنى ول بۇل ۋاقىتتى پايدالى ىستەرگە جۇمساۋعا بولادى دەپ ويلايتىن».
ويلانىپ كور: اتا-اناڭ نەنىڭ ماڭىزدىراق ەكەنىنە قاتىستى كەڭەس بەرگەندە، ايتقاندارىن تىڭدايسىڭ با؟ ترينا ەسىمدى بويجەتكەن بىلاي دەيدى: «بىزدەر، بالالار، ماڭىزدى مىندەتتەرىمىزدى ۇمىتىپ، سپورت ويىندارىن كورىپ وتىرعاندا، انامىز بۇل ويىنشىلاردى تاماشالاساق تا، تاماشالاماساق تا، ولار ٶز جالاقىلارىن الاتىنىن ايتاتىن. سوسىن ول بىزدەن: «ال سەندەرگە بىرەۋ جالاقى تولەپ وتىر ما؟»— دەپ سۇرايتىن. ونىڭ ايتقىسى كەلگەنى: ويىنشىلاردىڭ جۇمىسى بار. ال ٴبىز ەگەر ساباقتى دۇرىس وقىماساق جانە باسقا دا مىندەتتەرىمىزدى تياناقتى اتقارۋدى ۇيرەنبەسەك، بولاشاقتا كۇنىمىزدى كورە المايمىز. باسقا سوزبەن ايتقاندا، انامىز سپورتتىق ويىنداردى كورۋ نە ويناۋ ومىرىمىزدە ەڭ ماڭىزدى نارسە بولماۋ كەرەكتىگىن ايتاتىن».