Ovapangeli nosho yo omahangano omounyuni inaa dula okweetela ovanhu ombili. Kunena, omakuyunguto okwa hapupala neenghono shi dulife nale, okudja pefimbo lOita Itivali yOunyuni. Ovanhu omabiliyona avali lwaapo, oshitine shovanhu mounyuni aushe, ove li moitukulwa oyo ya kumwa komakuyunguto.

 Omolwashike ovanhu itava dulu okweeta ombili? Ombiibeli otai ti ngahelipi?

1.  1. Ovanhu ohava ulike omaukwatya oo tae va imbi va pange ombili. Ombiibeli oya xunganeka kutya pefimbo letu “Ovanhu otava ka kala ve lihole vo vene, ovanalwisho voimaliwa, ovalitangi, ovalinenepeki, . . . vehe fi ovadiinini, . . . vehe na elongelokumwe, . . . vehe na elipangelo, ovakwanyanya, . . . ve na omitwe dikukutu, ve na ounhwa.” — 2 Timoteus 3:2-4.

2.  2. Ovanhu, pauhandimwe nosho yo pamuhanga, itava dulu okuxulifa po omaupyakadi avo nopehe na ekwafo lOmushiti wavo, Jehova a Kalunga. Ombiibeli oye shi yelifa kutya ‘ondjila yomunhu ihai kala mepangelo laye mwene, nhumbi ta yukifa eenghatu daye.’ — Jeremia 10:23.

3.  3. Ounyuni ou li koshi yenwefemo lomupangeli omunaenghono nomukwanyanya, Satana Ondiaboli, oo ‘ta hongaula ounyuni aushe.’ (Ehololo 12:9) Ofimbo ‘ounyuni aushe u li mepangelo lomunawii,’ ope na alushe okukala oita nomakuyunguto. — 1 Johannes 5:19.

 Ombiibeli otai tu shilipaleke kutya ombili itai etifwa keenghendabala dovanhu, ashike otai di kuKalunga.

•   “Osheshi omadiladilo ange nde e mu diladilila ondi a shii, Omwene osho ta ti, omadiladilo ombili, hao omupya. Ame ohandi mu pe efimbo lokomesho pamwe neteelelo liwa.” — Jeremia 29:11.

 Ongahelipi Kalunga ta ka wanifa po eudaneko olo? “Kalunga oo ha yandje ombili ota ka nyanyaula Satana.” (Ovaroma 16:20) Kalunga ota ka longifa epangelo lomeulu, olo tali ifanwa mOmbiibeli kutya olo “Ouhamba waKalunga,” olo li ete ombili mounyuni aushe. (Lukas 4:43) Eshi Jesus Kristus, Ohamba yOuhamba oo, ta ka pangela, ovanhu otava ka hongwa nghee ve na okukalafana nombili. — Jesaja 9:6, 7.

•   Opo u lihonge shihapu, lesha oshitukulwa “What Will God’s Kingdom Accomplish?”