Momukokomoko womido 30 da ka lupuka, ovanhu vahapu ova li ve udite kutya ekwatafano pokati koilongo i lili noku lili ola li la pamenena notali xwepopala. Ashike etaleko olo ola lunduluka omolwoiningwanima oyo ya dja nokuningwa.

•   O-Reuters, oya kundaneka mo 6 Januali 2024 kutya: “Ovanhu ova tila kutya oita oyo tai luwa mo-Gaza otai ka kuma yo noilongo ikwao oyo i li popepi nasho, eshi va mona Israel tava lwifafana naHezbollah peengaba daLebanon.”

•   Oshikundaneki sho-The New York Times shomo 7 Januali 2024 osha ti: “Eengudu odo di kwetelwe komesho kuIran otadi ponokele oitukulwa i lili noku lili, na Iran okwa hovela natango okunduluka oilwifo yolute. Shikwao vali, Russia naChina otave mu yambidida. Onghee osho osha tilifa oilongo yokouninginino.”

•   O-UN News oya kundaneka mo 11 Januali 2024, ya ti: “Russia onghee ngo ta twikile okuponokela nokuhanauna neenghono moUkraine.”

•   O-The Japan Times yomo 9 Januali 2024, oya ti: “Eliko laChina tali i pombada netangakwaita laye tali nghonopala, Taiwan a hovela oku lifikamena po nosho yo okuhaudafana pokati kaChina naAmerica, otai ulike kutya ota pa dulu okuholoka oita noupu.”

 Mbela Ombiibeli oya popya sha shi na sha nokutengauka kweenghalo oko tu wete mounyuni kunena? Mbela osho otashi dulika shi etife Oita yOunyuni?

 Ombiibeli inai xunganeka oita yokondadalunde oyo tu wete tai luwa kunena. Kakele kaasho, oya popya shi na sha noita oyo tai ka luwa keshe pamwe, oyo tu wete kunena notai ‘nyono po ombili kombada yedu.’ — Ehololo 6:4.

 Embo laDaniel ola xunganeka kutya “mefimbo laxuuninwa,” oilongo inaenghono mounyuni, oyo tai kondjifafana, otai ka ‘fikamenafana,’ ile i kondjele eenghonopangelo. Osho osha kwatela mo okupameka omatangakwaita ayo nosho yo okulongifa ‘emona’ lihapu, ile eedjo dayo. — Daniel 11:40, 42, 43.

 Ombiibeli oya popya kutya onghalo mounyuni oi na okunaipala, opo nee tai ka xwepopala. Jesus okwa xunganeka kutya “otaku ke uya oudjuu munene oo inau kala ko nale okudja pehovelo lounyuni.” (Mateus 24:21) “Oudjuu munene” otau twala fiyo opoita yaArmagedon, oyo ya popiwa i li “oita mefiku linene laKalunga Omunaenghono adishe.” — Ehololo 16:14, 16.

 Ashike oita yaArmagedon otai ka etela ovanhu exupifo, ndele haku va hanauna po. Poita oyo, Kalunga ota ka hanauna po omapangelo opanhu, oo a etifa po oita inyanyalifi kombada yedu. Opo u mone nghee oita yaArmagedon tai ka etifa po ombili tai kalele kombada yedu, lesha oitukulwa tai shikula:

•   “Oita yaArmagedon oshike?”

•   “Harmagedon oku li onghundana iwa”