Jehova Kalunga okwa hala ovanhu aveshe ve lihonge kombinga yaye nosho yo Ouhamba waye womeulu, kashi na nee mbudi kutya ove li meenghalo da fa peni. (1 Timoteus 2:3, 4) Omolwetomheno olo, Eendombwedi daJehova oda nyanyangida Eembiibeli noishangomwa oyo hai longifwa pekonakonombiibeli, opo i longifwe kovanhu aveshe, mwa kwatelwa eembolo. Ehangano letu ola nyanyangida oishangomwa omayovi molupe louvidio momalaka okuudika, a noi li molaka okuudika e dulife 100. Ohatu nduluka nokunyanyangida ngahelipi oishangomwa oyo? Otwa ninga omalunduluko elipi momukokomoko womido?

 Oishangomwa yelaka lokuudika ohai tolokwa keespana dovatoloki mounyuni aushe. Oshilyo keshe kospana ohashi konakona noukeka oshishangomwa osho va pumbwa okutoloka. Opo nee tava kundafana onghedi ya denga mbada omo tava dulu okuyandja ouyelele oo melaka lokuudika. Ngeenge va mane okulikunda, ohava kwata oshishangomwa osho okavidio. Paife ngaha, otu na eespana 60 odo hadi toloka oishangomwa oyo hai longifwa pandjikilile pekonakonombiibeli momalaka okuudika, nosho yo eespana 40 odo hadi shi ningi omalufe.

 Pefimbo lonale, osha li hashi pula oshimaliwa shihapu okunduluka ouvidio vomalaka okuudika. Oukamera vokukwata ouvidio nosho yo oilongifo imwe oya li i na ondilo unene shi dulife paife. Shikwao vali, ouvidio ova li hava kwatelwa mostudio, oyo twa li tu na okutunga fye vene, nomafimbo amwe otwa li tu na okuwapekulula etungo olo twa li tu na nale. Osha li hashi pula eedola daNamibia 465 000, opo ku landwe oinima aishe oyo ya pumbiwa kospana imwe yelaka lokuudika.

 Opo ehangano li longife nawa omayambidido, ola longa noudiinini, opo li konge po eenghedi dimwe di li xwepo nokupupaleka onghedi yokutoloka. Onghee ola longifa oilongifo oyo hai longifwa mopaife, oyo hai longo nawa noi na ombilixa. Ponhele ospana i longife ostudio, ohai longifa elapi litwima omafo, ile i painde ekuma noluvala olo, opo i dule okukwatela ouvidio meembelewa davo. Ngeenge pa pumbiwa ovauudiki vahapu velaka lokuudika, ovamwatate novamwameme otava dulu okulikwatela okavidio koshitukulwa shavo shoshishangomwa meembelewa davo, ile komaumbo avo; inava pumbwa vali okuuya kostudio.

 Otwa nduluka po yo ee-software tu kwafele ovauudiki noilonga yavo. Noshidjemo, ospana otai dulu okukwata okavidio koshishangomwa melaka lokuudika moule wefimbo lixupi, shi dulife nale. Ovamwatate ova pandula omolweenghendabala adishe odo. Omumwatate Alexander okwa ti: “Ouvidio velaka lokuudika ohava pitifwa pandjikilile paife, shi dulife nale. Onde shi hafela neenghono. Ohandi tale ouvidio ovo efiku keshe.”

 Mopaife, ohashi pula ashike eedola daNamibia 77 000, opo ospana yelaka lokuudika i mone oilongifo yayo. Noshidjemo, ohatu dulu okunyanyangida ouvidio momalaka mahapu okuudika.

 Ngeenge ospana ya mane okukwata oshishangomwa melaka lokuudika, ouvidio ove na okutuminwa keshe umwe oo e va pumbwa. Monakudiwa, otwa li hatu nyanyangida oukasete nou-DVD, ashike osho osha li shi na ondilo, hashi pula efimbo noilonga ihapu. Opo nee ova li hava tuminwa kokambani imwe va ka ningwe eekopi. Hauxuuninwa, oukasete nou-DVD ova li hava tuminwa komaongalo. Momudo 2013 ashike, otwa longifa oimaliwa i dulife peedola daNamibia 31 000 mokunyanyangida ou-DVD.

 Eembolo ohadi pandula omafiloshisho oo. Ashike kasha li shipu okulongifa ouvidio oo, unene tuu eshi omuvalu woukasete, ile ou-DVD wa li tau londo pombada. Peemhito dimwe, osha li tashi pula ou-DVD vahapu okukwata ashike embo limwe. Omumwatate wokoBrazil wedina Gilnei, okwa ti: “Ngeenge twa li twa hala okulesha omushangwa, otwa li tu na okukonga okakaseta oko ke li mondjila, opo nee hatu kongo omushangwa. Osha li shidjuu neenghono.” Omumwameme wedina Rafayane, oo a li ha longifa ou-DVD velaka lokuudika, okwa ti: “Osha li hashi lolola nge okuninga ekonakonombiibeli lopaumwene. Otwa li hatu longifa efimbo lihapu hatu kongo omishangwa, ile eendjo dimwe.” Nongeenge ovamwatate novamwameme ve li moilonga yokuudifa, luhapu ova li hava i nou-DVD nosho yo oukasete ovo va li hava danene ko-TV yomunhu oo e na ohokwe. Ovamwatate vamwe ova li nokuli hava i nee-DVD davo dopaumwene. Inapa pita efimbo, opa kala pe na ee-DVD di na ee-screen, novamwatate vahapu ova li va hovela oku di longifa. Bobby, oo ha di moUnited States, okwa ti: “Konima ngeenge wa lesha omushangwa, ndele owa li wa hala okuleshela omuneumbo omushangwa umwe vali, owa li u na okulundululila ko-DVD imwe. Osho osha li hashi pula efimbo, nohashi tu ngabeke okulongifa Ombiibeli meenghundafana detu.”

 Mo 2013, ehangano laJehova ola li la pitifa o-JW Library yElaka lOkuudika, oko ovamwatate novamwameme tava dulu okutapa nokudana ouvidio velaka lokuudika keengodi, ile kou-tablet wavo. Tete oya li ya pitifwa mElaka lOkuudika lOshiamerica. Opo nee mo 2017, oya li ya pepalekwa, opo i dule okukala i na omalaka okuudika aeshe. Ovamwatate novamwameme mounyuni aushe ova li va tunhukwa. Juscelino, omumwatate wokoBrazil, okwa ti: “Kanda li handi shi itavele! Onda kala handi lipula nanghee Olutuwiliki le tu ulikila ohole, tu li eembolo, nanghee la hala tu ninge exumokomesho moshili, ngaashi ashike ovanhu ovo hava popi. Onda li nda hafa neenghono, no-app oyo oya twa nge omukumo ndi kale handi konakona Ombiibeli pandjikilile.”

 Kunena, ohatu nyanyangida ouvidio momalaka okuudika noku va tula kee-website detu nosho yo ko-JW Library yElaka lOkuudika. Oshidjemo, oishangomwa yelaka lokuudika otai dulu okutolokwa, tai kwatwa okavidio nokutulwa ko moule womafiku manini, ponhele yokuteelela konima yeemwedi, ile nokuli eedula. Omalaka mahapu okuudika ohaa pitifile oshita oishangomwa nomalaka makwao ovanhu ovo hava popi.

 Didilika omatyekosha amwe ovamwatate novamwameme vetu eembolo. Omumwameme wedina Klízia okwa ti: “Ehangano lilipi mbela li na ko nasha neembolo nola ninga eenghendabala, opo li tu pe eendja dopamhepo monghedi ipu? Kape na sha mounyuni osho tashi dulu okuyelekwa naasho ehangano laJehova hali tu ningile.” Vladimir okwa ti: “Ouvidio ovo ohava ulike nge kutya Jehova oku na ko nasha neembolo, ngaashi ashike e na ko nasha naavo hava udu ko.”

 Ouvidio vetu vomalaka okuudika luhapu ohava ti: “Oshishangomwa eshi osha nyanyangidwa, opo shi longifwe moilonga yokuhonga ovanhu Ombiibeli mounyuni aushe, oyo hai yambididwa nomayambidido opashimaliwa ehalo liwa.” Ohatu mu pandula neenghono eshi hamu yandje omayambidido, oo vahapu hamu yandje okupitila ko-donate.isa4310.com. Omayambidido oo ohae tu kwafele tu nyanyangide Eembiibeli nosho yo oishangomwa oyo hai longifwa pekonakonombiibeli, opo i longifwe kovanhu aveshe, mwa kwatelwa ovo hava longifa elaka lokuudika.