Diladila konghalo ei: David ota shingi otuwa momudingonoko omo ehe shi nande onale. Omadidiliko oo eli mepandavanda nosho yo omitungilo otadi ulike kutya ke li opo a li e na okukala. Lwanima okwa ka mona kutya okwa puka, tashi dulika a ya nondjila ya puka.

Ngeno oove wa li David, mbela ngeno oto ka ninga po shike?

Ou na omahoololo mahapu oo to dulu okuninga:

1. Oto dulu okupula ekwafo.

2. Oto dulu okulongifa okaalita ile o-GPS

3. Oto dulu okutwikila okushinga nelineekelo kutya oto ka mona ondjila oyo wa pumbwa.

Ehoololo la-C itali ka pondola.

Ehoololo la-B oliwa li dule lotete. Okaalita ile GPS otai ke ku kwafela noku ku wilika molweendo loye alishe.

Ombiibeli otai dulu oku ku kwafela monghedi ya faafana.

Ombiibeli embo olo li li apeshe otali dulu:

• oku ku wilika u pite momaupyakadi onghalamwenyo

• oku ku kwafela u lishiive nawa nokukala omunhu e li xwepo

• noku ku ulikila nghee to dulu okukala u na onghalamwenyo ya denga mbada

Shimha okaana ka shiiva okupopya, ohaka pula omapulo ngaashi:

• Omolwashike evalelwa limbulau?

• Eenyofi oda dja peni?

Lwanima ohatu hovele okupula omapulo e na sha noinima oyo ye tu dingilila, ngaashi:

• Omolwashike hatu ningilwa oinima ii?

• Omolwashike ovanhu hava fi?

Ongahelipi ngeenge omanyamukulo omapulo oo oku li mOmbiibeli?

Ovanhu vahapu ohava ti kutya Ombiibeli oi na omahepu neengano, oyonghuluyonale ile oidjuu neenghono okuudiwa ko. Ndele mbela ope na ngoo osho sha puka shi na sha nOmbiibeli ile pamwe oshosho ashike ovanhu hava udu kombinga yayo?

Pashihopaenenwa, ovanhu ohava diladila kutya Kalunga oye ta pangele ounyuni. Osho otashi shiiva ngahelipi? Ounyuni ou owa naipala neenghono, omu yadi oinima iyahameka nokumona oixuna, omikifi nefyo, oluhepo noiponga. Mbela Kalunga omunahole oye ngoo shili omweetifi woinima aishe oyo?

Mbela ino hala okumona omanyamukulo? Osho Ombiibeli tai hongo kombinga yaao ta pangele ounyuni otashi dulika shi ku kumwife.

Didilika kutya ouyelele ou u li mokambo aka owa kanghamena kOmbiibeli. Eendombwedi daJehova oda itavela kutya Ombiibeli oya nwefwa mo kodjo i shii okulineekelwa. Molwaashi oya ‘yandjwa keenghono domhepo yaKalunga, oi shii okulonga, okukumaida nokupukulula.’ (2 Timoteus 3:16, 17) Ohatu ku ladipike u konakone embo olo likulu ndele oli na ouyelele tau longo kunena.