Ngaashi la yelifwa mOmbibeli, eitavelo “olo elineekelo la pama okulineekela osho tashi teelelwa,” u na oumbangi wa yela kutya otashi ka ningwa shili. (Ovaheberi 11:1) Omunhu oo e na eitavelo muKalunga oha yandje elitulemo kokuwanifwa kwomaudaneko aKalunga, e na elineekelo kutya otaa ka wanifwa shili.

Okwa li ha ningi omatokolo oo taa ulike kutya okwa itavela momaudaneko aKalunga. (Genesis 22:15-18) Okwa li ta dulu okukala nonghalamwenyo youdjeko mouhamba womuEgipti, ndele ka li a ninga ngaho, ponhele yaasho, “okwe lihoololela, a hepekwe pamwe noshiwana shaKalunga nokwa dina ouwa [wopakafimbo] womoulunde.” (Ovaheberi 11:25) Mbela okwa li a ninga etokolo meendelelo nopehe na okudiladila, nolwanima te ke lipa oushimha? Hasho nandenande, Ombibeli oya ti kutya Moses okwa “kala a fa e wete ou e he wetike.” (Ovaheberi 11:27) Molwaashi okwa li a ninga etokolo la kanghamena keitavelo, ka li e lipa oushimha nandenande.

Moses okwa li a kwafela vamwe va kale neitavelo la pama muKalunga. Pashihopaenenwa, diladila kutya oshike sha li sha ningwa po eshi Ovaisrael va li ve wete va kondekelwa pokati kEfuta Litilyana ketangakwaita laFarao. Molwaashi ova li va tila osho sha li pokuholoka po, ova li va pula ekwafo kuJehova naMoses. Mbela Moses okwa li e linyenga ngahelipi?

Moses otashi dulika ka li e shii kutya Kalunga okwa li e li pokutukula pokati omeva Efuta Litilyana, osho sha li tashi shi ningi tashi shiiva opo Ovaisrael vaye onhapo ovatondi vavo. Ashike okwa li e na elineekelo kutya Kalunga ota ka ninga po sha opo a amene oshiwana shaYe. Moses okwa li a hala Ovaisrael vakwao navo va kale ve na elineekelo la faafana. Ombibeli oya ti: “Moses okwa nyamukula ovanhu, ndee ta ti: Inamu tila nande! Kaleni mu neyombamo mu tale exupifo li fike peni Omwene te li mu ningile nena.” (Exodus 14:13) Mbela Moses okwa li ngoo a pondola mokupameka eitavelo lOvaisrael vakwao? Heeno, molwaashi Ombibeli oya popya shi na sha nOvaisrael aveshe ya ti: ‘Meitavelo va tokola efuta litiliyana va fa va enda poukukutu.’ (Ovaheberi 11:29) Moses haye ashike a mona ouwa meitavelo laye, ndele naaveshe ovo tave lihongo okukala ve lineekela muJehova otava mono mo yo ouwa.

Ohatu dulu okuhopaenena Moses mokukala hatu ningi omatokolo oo taa ulike kutya otwe lineekela momaudaneko aKalunga. Pashihopaenewa, Kalunga okwa udaneka kutya ota ka fila oshisho eemhumbwe detu dopalutu ngeenge otwa kala twa pitifa komesho oku mu longela monghalamwenyo yetu. (Mateus 6:33) Oshoshili kutya oshi li eshongo okuhenuka okulalakane oinima yopamaliko molwaashi ovanhu vahapu kunena oyo tava lalakanene. Ndele otu na elineekelo kutya ngeenge otwa ningi ngaashi hatu dulu opo tu nangwafapaleke onghalamwenyo yetu nokuyandja elitulemo kokulongela Jehova, ote ke tu pa ashishe osho twa pumbwa. Okwe tu shilipaleka a ti: “Ame ihandi ku efa noitandi ku fii po nande.” — Ovaheberi 13:5.

Nafye ohatu kendabala yo okukwafela vamwe va kale ve na eitavelo la pama. Pashihopaenenwa, ovadali ovanaendunge ohava kwafele ovana vavo va kale ve na eitavelo muKalunga. Ova pumbwa okuhonga ovana vavo okudja kounona kutya oku na Kalunga oo he tu hongo kutya shilipi sha yuka naasho sha puka. Kakele kaasho, ounona ova pumbwa yo okukala va tomhwa kutya okulandula omifikamhango daJehova oko onghedi yokukalamwenyo ya denga mbada. (Jesaja 48:17, 18) Ovadali ohava pe ovana vavo oshali i na ondilo moku va kwafela va kale ve na eitavelo kutya Kalunga “oko e li, naava tave mu kongo, ote va pe ondjabi.” — Ovaheberi 11:6.