Omapulo a dja kovaleshi
Olyelye “omukainhu” oo a popiwa muJesaja 60:1, NWT-E, nongahelipi a “fikama” a ‘yandje ouyelele’?
Jesaja 60:1, KB-13 okwa ti: “[Omukainhu, NWT-E] fikama, [yandja ouyelele, NWT-E], osheshi ouyelele woye tau uya noshinge shOmwene tashi ku tendele.” Oshikalimo otashi ulike kutya “omukainhu” okwa li Sion, ile Jerusalem, oshilandopangelo shaJuda pefimbo opo. a (Jes. 60:14; 62:1, 2) Oshilando osha fikama po moshiwana ashishe shaIsrael. Eendjovo daJesaja oda pendula omapulo avali: Lotete, onaini nongahelipi Jerusalem a “fikama” nokuyandja ouyelele pafaneko? Etivali, ongahelipi eendjovo daJesaja tadi wanifwa po monghedi i didilikwedi pefimbo letu?
Onaini nongahelipi Jerusalem a “fikama” nokuyandja ouyelele wopamhepo pafaneko? Jerusalem nosho yo otembeli yasho oya li monghalo ii, ofimbo Ovajuda va li moukwatwa waBabilon oule womido 70. Konima eshi Babilon a li a findwa kOvamedia nOvapresia, Ovaisrael ovo va li hava di moitukulwa ya yoolokafana mepangelo laBabilon, ova li va shuna keduumbo lavo noku ka tungulula elongelokalunga lashili. (Esra 1:1-4) Pehovelo lo 537 K.O.P., oshixupe shidiinini osho sha dja momapata aeshe 12 nasho osha li sha ninga ngaho. (Jes. 60:4) Osha li sha hovela okuyandja omayambo kuJehova, opo va dane oivilo nokutungulula otembeli. (Esra 3:1-4, 7-11; 6:16-22) Natango, oshinge shaJehova osha li sha hovela okuvilima muJerusalem, osho tashi ulike kuKalunga eshi a li a mangulula ovanhu. Nokungaho, osha li sha yandja ouyelele wopamhepo pafaneko koiwana oyo ya li ihe shii Jehova.
Ashike, exunganeko laJesaja kala li la wanifwa po pauyadi pefimbo opo. Ovaisrael vahapu ova li va twikila okuhadulika kuKalunga. (Neh. 13:27; Mal. 1:6-8; 2:13, 14; Mat. 15:7-9) Nolwanima, kava li va tambula ko Messias, Jesus Kristus. (Mat. 27:1, 2) Mo 70 O.P., Jerusalem nosho yo otembeli yasho oya li ya hanaunwa po oshikando oshitivali.
Jehova okwa li a xunganeka kutya osho otashi ka ningwa. (Dan. 9:24-27) Oshoshili kutya, kasha li elalakano laye Jerusalem shokombada yedu shi wanife po filufilu exunganeko olo li li muJesaja etukulwa 60.
Mbela eendjovo daJesaja otadi wanifwa po monghedi i didilikwedi pefimbo letu? Heeno, ashike otadi ulike komukainhu wopafaneko, oo e li “Jerusalem shopombada.” Omuyapostoli Paulus okwa shanga kombinga yaye a ti: ‘Oku li meme yetu.’ (Gal. 4:26) Jerusalem shopombada oshi li oshitukulwa shehangano laKalunga shomeulu, osho sha fikama po moishitwa yopamhepo idiinini. Ovana vaye ova kwatela mo Jesus nosho yo Ovakriste ovavaekwa 144 000, ovo ve na eteelelo loku ka kala meulu, ngaashi Paulus. Ovakriste ovavaekwa ove li “oshiwana shiyapuki,” “Israel yaKalunga.” — 1 Pet. 2:9; Gal. 6:16.
Ongahelipi Jerusalem shopombada sha ‘fikama nokuyandja ouyelele’? Okwe shi ninga okupitila movana vaye ovavaekwa vokombada yedu. Yelekanifa oimoniwa yavo naasho sha xunganekwa muJesaja etukulwa 60.
Ovakriste ovavaekwa ova li ve na ‘okufikama’ molwaashi ova li momilaulu dopamhepo dopafaneko, eshi oushunimonima wa li keshe pamwe, konima eshi Ovayapostoli va fya. (Mat. 13:37-43) Ova kala moukwatwa waBabilon Shinene, ouhamba wounyuni womalongelokalunga oipupulu. Ovavaekwa ova kala moukwatwa fiyo ‘opomafiku axuuninwa ounyuni ou,’ oo a hovela mo 1914. (Mat. 13:39, 40) Konima yaasho, mo 1919, ova li va mangululwa nova li va yandja ouyelele, oku shi popya pafaneko, mokukufa ombinga moilonga yokuudifa onghundana iwa yOuhamba. b Oule womido, ovanhu va dja moiwana aishe, ova li va mona ouyelele oo, mwa kwatelwa oixupe yaIsrael yaKalunga, oyo i li kombada yedu, oyo i li “eehamba,” oyo ya popiwa muJesaja 60:3. — Eh. 5:9, 10.
Monakwiiwa, Ovakriste ovavaekwa otava ka yandja ouyelele wa dja kuJehova monghedi i didilikwedi. Ngahelipi mbela? Ngeenge va mane oweenda wavo kombada yedu, otava ka ninga oshitukulwa ‘shaJerusalem shipe,’ ile ovahombolwa vaKristus 144 000, ve li eehamba nosho yo ovapristeri. — Eh. 14:1; 21:1, 2, 24; 22:3-5.
Jerusalem shipe otashi dana onghandangala ya fimana mokuwanifa po Jesaja 60:1. (Yelekanifa Jesaja 60:1, 3, 5, 11, 19, 20 nEhololo 21:2, 9-11, 22-26.) Ngaashi ashike Jerusalem shokombada yedu sha li ondingandinga yepangelo muIsrael shonale, Jerusalem Shipe naKristus otava ka ninga epangelo lipe. Ongahelipi Jerusalem shipe tashi “di meulu kuKalunga”? Omokukatuka eenghatu odo tadi ka kuma ovo ve li kombada yedu. Ovanhu ovo va dja moiwana aishe hava tila Kalunga, ‘ouyelele washo otau ka minikila eendjila’ davo. Itava ka nyona vali nokufya. (Eh. 21:3, 4, 24) Noshidjemo, ‘oinima aishe otai ka ningwa ipe,’ ngaashi sha xunganekwa kuJesaja nokovaprofeti vakwao. (Oil. 3:21 3:21) Oshinima sha tya ngaho osha hovela eshi Kristus a ninga Ohamba, notashi ka xula pexulilo lOmido Eyovi dokupangela kwaye.
a O-New World Translation, muJesaja 60:1, oya longifa “omukainhu” ponhele “yaSion,” ile “Jerusalem,” molwaashi oshityalonga shOshiheberi “fikama” nosho yo “yandja ouyelele” otashi ulike komukainhu. Oshitya “omukainhu” otashi kwafele ovapopi vOshiingilisha va mone kutya omukainhu oo ota popiwa e li pafaneko.
b Okutungululwa kwelongelokalunga lashili, oko kwa li kwa ningwa mo 1919, okwa popiwa yo muHeskiel nosho yo mEhololo 11:7-12. Heskiel okwa xunganeka kutya Ovakriste aveshe ovavaekwa otava ka kosholwa konima eshi va kala moukwatwa oule wefimbo. Exunganeko olo li li mEhololo otali ulike kokudalululwa pafaneko kwongudu inini yovamwatate ovavaekwa, ovo va li tava kwatele komesho oule wefimbo linini, molwaashi ova li tava ka tulwa modolongo shihe li pauyuki. Mo 1919, ova li va nangekwa po ve li “omupiya omudiinini nomunaendunge.” — Mat. 24:45; tala embo Pure Worship of Jehovah—Restored At Last!, ep. 118.
