Kalunga ke na onhondo nokwa hala okunangeka noupuna ovanhu aveshe.

Kalunga okwa udanekela Abraham kutya “omapata aeshe kombada yedu otaa nangekwa noupuna mwoove.” — Genesis 12:3.

Oshilihongomwa oshilipi? Kalunga oku tu hole neenghono nokwa hala okunangeka noupuna omapata aeshe, ile tu tye ovanhu aveshe, kutya nee ovalumenhu, ovakainhu nosho yo ounona, ovo hava dulika kuye.

Kalunga omunefilonghenda noha nangeke noupuna ovo tava ningi eenghendabala va mu shiive.

Omunaenghono adishe okwa li a pa Moses eenghono opo a dule okulonga oikumwifalonga. Ashike nande ongaho, Moses okwa li a ilikana a ti: “Shiivifile nge eendjila doye, opo ndi shiive oku ku shiiva, opo ndi shiive okufilwa onghenda momesho oye.” (Exodus 33:13) Kalunga okwa li a hokwa eindilo laMoses nokwa li e mu nangeka noupuna nounongo, eudeko li na sha neendjila daye nosho yo omaukwatya aye. Pashihopaenenwa, Moses okwa li e lihonga kutya Omushiti ‘oKalunga omunefilonghenda naKalunga omunanghenda.’ — Exodus 34:6, 7.

Oshilihongomwa oshilipi? Kalunga okwa hala okunangeka noupuna ovalumenhu, ovakainhu nosho yo ounona ngeenge ova ningi eenghendabala ve mu shiive. Omishangwa daye Diyapuki oda ulika nghee hatu dulu oku mu longela nanghee a halelela oku tu nangeka noupuna.

Ohatu dulu okuhafela omanangeko noupuna aKalunga fiyo alushe ngeenge otwe lihongo kombinga yaJesus, osho a ninga naasho a honga.

Ohatu dulu okulihonga shihapu mEendjovo daKalunga kombinga yonghalamwenyo nosho yo omahongo aJesus. Kalunga okwa pa Jesus eenghono opo a dule okulonga oikumwifalonga, ngaashi okutwikulula ovapofi, okufitulula ovafitamatwi nosho yo okuvelula oilema. Okwa li yo a nyumuna ovafi. Jesus okwa li a ulika nghee Kalunga ta ka nangeka noupuna ovanhu monakwiiwa. Okwa yelifa nghee keshe umwe womufye ta dulu oku ka hafela omanangeko noupuna oo, a ti : “Opo ovanhu va ka mone omwenyo waalushe, ove na okushiiva kutya oove auke Kalunga kashili naau wa tuma, Jesus Kristus.” — Johannes 17:3.

Jesus okwa li omunefilonghenda, omunalukeno noku na onghenda. Ovalumenhu, ovakainhu, ovanyasha nosho yo ovanamido ova li va mbobolokela kuye eshi e va shiva, a ti: ‘Lihonga kwaame, osheshi ame ondi na omwenyo muwa, nomomutima onde lininipika, opo nee otamu ke limonena etulumuko.’ (Mateus 11:29) Mepingafano navamwe ovo va li hava ungaunga nai novakainhu, Jesus okwa li ha ungaunga navo nonghenda nosho yo nefimaneko.

Oshilihongomwa oshilipi? Jesus okwa ulika kutya oku hole ovanhu, nokwe tu tulila oshihopaenenwa sha denga mbada shanghee hatu dulu okuungaunga navamwe.

Omishangwa Diyapuki otadi tu hongo kutya “fye otu na Kalunga umwe aeke” nosho yo kutya Jesus Kristus okwa li omutumwa waKalunga omulininipiki. (1 Ovakorinto 8:6) Jesus okwa yelifa nawa kutya ye oku dulike kuKalunga noYe e mu tuma e uye kombada yedu. — Johannes 11:41, 42; 14:28. *