She likolelela komakonakono amwe oo a ningwa, okwa monika kutya eepelesenda 80 dovanyasha moAmerica ohadi ilikana, ndele etata ashike lomudo ,hadi ilikana efiku keshe. Vamwe otashi dulika ve lipule kutya: ‘Mbela eilikano oloku ku mbilipaleka ashike, ile ola kwatela mo shihapu?’

•  Eilikano oshike?

•  Kalunga oha pwilikine ngoo kuo?

•  Ondi na okwiilikana kombinga yashike?

•  Osho oomakula voye tava ti

Eilikano oli li onghedi yolela omo hatu popi nOmushiti woinima aishe. Diladila ashike kutya osho osha hala okutya ngahelipi! Jehova oku dule ovanhu aveshe meenghedi adishe, ashike “ke li kokule nakeshe umwe womufye.” (Oilonga 17:27) Ombiibeli oi na eshivo litunhula tali ti: “Eheneni popepi naKalunga, opo nee ota ka ehena popepi nanye.” — Jakob 4:8.

Ongahelipi to dulu okweehena popepi naKalunga?

• Onghedi imwe omokupopya naKalunga okupitila meilikano.

• Onghedi ikwao omokulesha Ombiibeli, omo Kalunga ha “popi” nafye.

Ngeenge otwa kala hatu kwatafana naKalungas meenghedi da tya ngaho, mokwiilikana nokukonakona Ombiibeli, ohatu ka pameka ekwatafano letu naye.

Jeremy okwa ti: “Oshi li oufembanghenda munenenene okupopya nOmukombadambada meshito alishe.”

Miranda okwa ti: “Ngeenge handi lombwele Jehova omaliudo ange omoule ohashi ehenifa nge popepi elela naye.”

Otashi dulika shi kale shidjuu okwiitavela kutya Kalunga oha pwilikine komailikano oye, nonande owa itavela muye ile oho mu ilikana. Ashike Ombiibeli oya popya kutya Jehova oku li “Omuudi womailikano.” (Epsalme 65:2) Otai ku shivi nokuli u ‘mu shiivifile oisho yoye aishe.’ Omolwashike mbela? ‘Omolwaashi oku na ko nasha nafye.’ — 1 Petrus 5:7.

Diladila kwaashi: Mbela oho kongo ngoo efimbo lokupopya nookaume koye kopofingo pandjikilile? Owa pumbwa okuninga sha faafana naKalunga. Kala ho popi naye pandjikilile okupitila meilikano nokulongifa edina laye, Jehova. (Epsalme 86:5-7; 88:9) Ombiibeli otai ku shivi u kale ho ‘ilikana uhe na edimbuko.’ — 1 Ovatessaloniki 5:17.

Moises okwa ti: “Eilikano oli li eenghundafana pokati kange naTate womeulu, oo handi mu mbubulile omutima wange aushe.”

Karen okwa ti: “Ohandi popi naJehova oinima yomoule, ngaashi ashike handi popi nameme ile nakaume kange kopofingo elela.”

Ombiibeli oya ti: “Oisho yeni aishe i shiivifileni Kalunga momailikano, nokwiindila mwa mana mo nokupandula.” — Ovafilippi 4:6.

Mbela osho osha hala kutya otu na okupopya kombinga yomaupyakadi etu ngeenge hatu ilikana? Heeno! Ombiibeli oya ti: “Omutengi woye u undulila kOmwene, Ye ote ku kalele noshisho.” — Epsalme 55:22.

Oshoshili kutya ngeenge to popi naKalunga meilikano, oshiwa okupopya kombinga yoinima ihapu, ndele hamaupyakadi oye ashike. Omukainhu omunyasha wedina Chantelle okwa ti: “Oukaume weni itau ka kala wa kola ngeenge oho pula ashike Jehova e ku kwafele. Ondi wete kutya olupandu olo la pumbwa okukala ponomola yotete, nomusholondodo woinima oyo ndi na okupandula ou na okukala mule.”

Diladila kwaashi: Oinima ilipi monghalamwenyo yoye to dulu okupandula? Mbela ito dulu okudiladila oinima itatu oyo to dulu okupandula Jehova nena?

Anita okwa ti: “Oto dulu okupandula Jehova okupitila meilikano omolwoshinima shiwa, nonande osha nafangwa, ngaashi ongala iwa.”

Brian okwa ti: “Oto dulu okupandula Jehova mokudilonga koshinima shiwa meshito osho she ku kumwifa, ile kovelishe yonhumba mOmbiibeli oyo ye ku kuma.”