Oukoshoki owa fimana kokapuka keshe kutya nee ota ka tuka, ta ka londo ile ta ka fimbula. Pashihopaenenwa, ngeenge ouvinga ova kaka ohava imbi omhuka i fimbule, i linyenge ya manguluka, nosho yo okukwatafana nadikwao. Alexander Hackmann,omukonakoni woinamwenyo, okwa ti: “Osha pumba okuhanga okapuka ka kaka. Ove shii okuliwapaleka ngeenge va enda mekako.”

Diladila kwaashi: Hackmann novalongi pamwe ova konakona noukeka nghee eemhuka doludi lo-Camponotus rufifemur hadi wapaleke ouvinga vado. Ova didilika kutya eemhuka ohadi tonyo omaulu ado noku a indakanifa ndele tadi fininikile po ouvinga vado opo va pushulwe. Oulududi ovo ve li komaulu ohava kwafele okupushula ko ekako lihapu. Ekako linini olo la fyaala ko oha li pushulwa ko kouxwiki vanininini.

Tala nghee omhuka hai wapaleke ouvinga vayo

Hackmann novalongi pamwe naye ova fika pexulifodiladilo kutya onghedi oyo hai longifwa keemhuka okuwapaleka ouvinga vayo otai dulu okulongifwa meefeema. Pashihopaenenwa, otai dulu okulongifwa okuwapaleka oitukulwa ya finana yomashina pefimbo loilonga oyo tashi dulika i ete oupyakadi.

Ove oto ti ngahelipi? Mbela onghedi omo omhuka hai wapaleke ouvinga vayo oye uya po ashike ngahenya? Ile mbela oinima oya shitwa?