Kwa ngoma (kũrĩa thĩinĩ wa thiomi cia mbere cia Bibilia nĩ “Sheol” na“Hades”) nĩ mbĩrĩra, no ti kũndũ gwa kũherithĩria andũ na mwaki. Nĩa mathiaga kwa ngoma? Andũ ega na oru. (Ayubu 14:13; Thaburi 9:17) Bibilia yugaga atĩ mbĩrĩra ĩyo ya andũ othe nĩ “mũciĩ . . . wathĩrĩirũo arĩa othe me muoyo.”—Ayubu 30:23.

 O na Jesu akua nĩ aathire kwa ngoma. O na kũrĩ ũguo, “ndaigana kũrekererio orĩre kwa-ngoma” tondũ Ngai nĩ aamũriũkirie.—Atũmwo 2:31, 32, The Bible in Gikũyũ.

Kwa ngoma gũgũtũũra tene na tene?

 Arĩa othe mathiĩte kwa ngoma nĩ makoima kuo rĩrĩa Jesu akaamariũkia kũgerera hinya wa Ngai. (Johana 5:28, 29; Atũmwo 24:15) Ũrathi ũrĩa ũrĩ Kũguũrĩrio 20:13 ugaga ũũ ũhoro-inĩ wĩgiĩ kũriũka mahinda mokĩte: “Gĩkuũ o na kwa-ngoma ikĩruta akuũ arĩa maarĩ kũrĩ cio.” (The Bible in Gikũyũ) Kwa ngoma gũtigacoka gũkorũo kuo rĩngĩ andũ othe moima kuo; gũtirĩ mũndũ ũgacoka gũthiĩ kuo rĩngĩ tondũ “gĩkuũ gĩtigacoka gũkorũo kuo rĩngĩ.”—Kũguũrĩrio 21:3, 4; 20:14.

 O na kũrĩ ũguo, ti mũndũ wothe ũthiaga kwa ngoma akua. Bibilia yonanagia atĩ andũ amwe nĩ matororokagia mũno waganu-inĩ ũũ atĩ matiendaga kũgarũrũka. (Ahibirania 10:26, 27) Andũ ta acio makua, matithiaga kwa ngoma, ĩndĩ mathiaga Jehanumu, ũguo nĩ kuuga kwanangwo tene na tene. (Mathayo 5:29, 30) Kwa ngerekano, Jesu nĩ onanirie atĩ atongoria amwe a ndini arĩa maarĩ hinga hĩndĩ yake mangĩathire Jehanumu.—Mathayo 23:27-33.