Aca. Bibilia yonanagia wega atĩ Ngai oombire andũ, na “mĩthemba” ĩtiganĩte ya nyamũ, na mĩmera. a (Kĩambĩrĩria 1:12, 21, 25, 27; Kũguũrĩrio 4:11) Yonanagia atĩ andũ othe mooimire kũrĩ aciari aitũ a mbere, Adamu na Hawa. (Kĩambĩrĩria 3:20; 4:1) Bibilia ndĩonanagia atĩ Ngai oombire indo imwe, indo icio igĩcoka ikĩgarũrũka igĩtuĩka indo cia mĩthemba ĩngĩ ĩtiganĩte. O na kũrĩ ũguo, Bibilia ndĩreganaga na ũrĩa athomi a sayansi moigaga atĩ o kĩndũ nĩ kĩrĩ mĩthemba yakĩo ĩtiganĩte.

•  Andũ amwe metĩkĩtie atĩa?

•  Hihi Bibilia nĩ yonanagia atĩ indo nĩ kũgarũrũka ciagarũrũkire?

•  Hihi ũhoti wa mĩmera na nyamũ wa gũcenjia kũringana na rĩera nĩ kuonania atĩ indo nĩ igarũrũkaga?

 Andũ arĩa metĩkĩtie atĩ Ngai oombire indo imwe igĩcoka ikĩgarũrũka, makoragwo na mawoni ngũrani megiĩ ũndũ ũcio. Kũringana na ibuku rĩa Encyclopædia Britannica, andũ amwe metĩkĩtie atĩ “ũhoti wa nyamũ na mĩmera kũgaacĩra kũrĩa kũrĩ na rĩera rĩrĩa rĩciagĩrĩire nĩ njĩra ĩrĩa Ngai ahũthagĩra gũtongoria ũũmbi gũkũ thĩ.”

 Ningĩ wĩtĩkio ũcio nĩ ũhutĩtie maũndũ maya:

•   Kĩndũ gĩothe kĩrĩ muoyo ũmũthĩ kĩoimanire na indo ciarĩ kuo tene mũno.

•   Kĩndũ kĩa mũthemba ũmwe no kĩgarũrũke gĩtuĩke kĩa mũthemba ũngĩ ngũrani biũ.

•   Ngai nĩwe ũtũmaga maũndũ macio mothe mekĩke.

 Andũ arĩa metĩkĩtie ũrutani ũcio moigaga atĩ ũhoro wa ũũmbi ũrĩa ũrĩ thĩinĩ wa Bibilia ibuku-inĩ rĩa Kĩambĩrĩria ti wa kwĩhokeka biũ. O na kũrĩ ũguo, Jesu nĩ aagwetire ũhoro ũcio ũrĩ ibuku-inĩ rĩa Kĩambĩrĩria, na akĩonania atĩ nĩ ũndũ wekĩkĩte. (Kĩambĩrĩria 1:26, 27; 2:18-24; Mathayo 19:4-6) Bibilia yonanagia atĩ Jesu atanoka gũkũ thĩ aatũũraga igũrũ hamwe na Ngai, na nĩ aateithĩrĩirie Ngai kũũmba “indo ciothe” iria ikoragwo kuo. (Johana 1:3) Kwoguo, wĩtĩkio wa atĩ Ngai oombire indo imwe igĩcoka ikĩgarũrũka igĩtuĩka indo ingĩ ngũrani ndũtwaranaga na ũrutani wa Bibilia.

 Bibilia ndiugaga kĩndũ kĩa rũruka rũmwe kĩngĩkorũo na indo ngũrani cigana. Ningĩ ndiugaga atĩ nyamũ na mĩmera ya mĩthemba ĩtiganĩte iria Ngai oombire itingĩcenjia kũringana na ũrĩa irathiĩ igĩciaranaga na kũringana na kũrĩa irĩ. O na gũtuĩka andũ amwe monaga ũndũ ũcio ta arĩ kĩndũ kĩragarũrũka, ũrĩa kũrĩ nĩ atĩ, gũtirĩ kĩndũ kĩngĩ kĩerũ kĩgĩaga kuo.