Gũtikagĩa na Icanjama Rĩngĩ!

ŨNGĨIGUA atĩa mũndũ angĩkwĩra, “Ica ikuhĩ gũtigacoka kũgĩa na icanjama?” Wahota kũmũcokeria ũũ: “Wee nĩ kũrota ũrarota. Icanjama nĩ maũndũ ma ndũire.” Kana wahota kuuga ũũ: ‘Arandua mwana atĩa?’

O na gũtuĩka icanjama cia ndũire no cioneke ta irĩ cia gũtũũra-rĩ, kũrĩ na itũmi cia gũtũma tũkorũo na mwĩhoko atĩ kũna nĩ igaathira. Ĩndĩ itikaninwo nĩ kĩyo kĩa andũ. Andũ matitaũkagĩrũo wega nĩ kĩrĩa gĩtũmaga maũndũ ma ndũire mekĩke, ũrĩa mekĩkaga, na nĩ maremagwo nĩ kũmagirĩrĩria na kũmagarũra. Mũthamaki Suleimani wa Isiraeli ya tene, ũrĩa woĩkaine nĩ ũndũ wa ũũgĩ na ũgerereri wa maũndũ, aandĩkire ũũ: “Mũndũ ndangĩhota kwĩonera wĩra ũrĩa ũrutagwo gũkũ thĩ kwaraga riũa: nĩ ũndũ o na angĩĩnogia akĩũcaria atĩa kana atĩa, ndakawona; ĩĩ, tiitherũ o na mũndũ mũũgĩ angĩenda kũũmenya, ndangĩhota kũwona.”—Kohelethu 8:17.

Angĩkorũo andũ matingĩhota kũgirĩrĩria icanjama cia ndũire-rĩ, nũ ũngĩkĩhota? Bibilia yonanagia atĩ Mũũmbi witũ nĩwe ũkaarehe ũgarũrũku ũcio. Nĩwe wathondekire mĩtaratara ya indo cia ndũire cia thĩ, ta mũthiũrũrũko wa maĩ. (Kohelethu 1:7) Ningĩ ngũrani nene na andũ, Ngai akoragwo na hinya ũtarĩ gĩthimi. Akĩonania ũũma wa ũndũ ũcio, mũnabii Jeremia oigire ũũ: “Atĩrĩrĩ, Mwathani Jehova, wee nĩwe wombire igũrũ na thĩ na ũndũ wa hinya waku mũnene, o na ũndũ wa gũtambũrũkia guoko gwaku; wee-rĩ, ndũrĩ ũndũ ũngĩkũgĩtĩra hinya.” (Jeremia 32:17) Tondũ Ngai nĩwe wombire thĩ na indo iria ciothe irĩ thĩinĩ wayo, hatarĩ nganja nĩ oĩ wega gũtabania maũndũ nĩguo andũ matũũre thĩinĩ wayo marĩ na thayũ na ũgitĩri.—Thaburi 37:11; 115:16.

No rĩrĩ, Ngai akaarehe atĩa ũgarũrũku ũrĩa ũrabatarania? Nĩ ũkũririkana atĩ gĩcunjĩ gĩa kerĩ gĩa icunjĩ ici nĩ kĩgwetete atĩ maũndũ maingĩ ma kũmakania marĩa marekĩka thĩinĩ wa thĩ mahinda-inĩ maya nĩ “kĩmenyithia” gĩa “ithirĩro rĩa mahinda maya.” Jesu oigire ũũ: “Mwona maũndũ macio magĩkinya, menyai atĩ ũthamaki wa Ngai wĩ hakuhĩ.” (Mathayo 24:3; Luka 21:31) Ũthamaki wa Ngai, ũrĩa arĩ guo thirikari ya Ngai ya igũrũ, nĩ ũkaarehe mogarũrũku manene thĩinĩ wa thĩ, ũtoorie nginya mahinya ma ndũire. O na gũtuĩka Jehova Ngai we mwene arĩ na hinya wa gwĩka ũguo-rĩ, aheete Mũriũ wake wĩra ũcio. Akĩaria ũhoro wa mũriũ ũcio, mũnabii Danieli oigire ũũ: “Nake agĩkĩheo wathani, na riri, o na ũthamaki, Nĩ getha andũ a nduka ciothe, na a ndũrĩrĩ ciothe, na a mĩario yothe, mamũtungatagĩre.”—Danieli 7:14.

Jesu Kristo Mũriũ wa Ngai, nĩ aheetwo hinya ũrĩa wagĩrĩire harĩ kũrehe ũgarũrũku ũrĩa wothe ũrabatarania gũtua thĩ gĩikaro kĩega. Rĩrĩa Jesu aarĩ gũkũ thĩ, mĩaka ngiri igĩrĩ mĩhĩtũku, nĩ onanirie na njĩra nini ũhoti wake wa gwatha mahinya ma ndũire. Hingo ĩmwe marĩ na arutwo ake thĩinĩ wa meri Iria-inĩ rĩa Galili, nĩ ‘kwagĩire kĩhuhũkanio kĩnene kĩa rũhuho, namo makũmbĩ ma maĩ magĩtonya  marikabu thĩinĩ, ĩgĩkĩenda kũiyũra maĩ.’ Arutwo ake makĩiyũrũo nĩ guoya. Nĩ ũndũ wa gũcaĩra mĩoyo yao, magĩĩta Jesu. Hihi eekire atĩa? “Agĩkaania rũhuho, na akĩĩra iria atĩrĩ, Kira, ũhorere. Naruo rũhuho rũgĩtuĩka, gũkĩhorera o kũhorera.” Arutwo ake makĩgega makĩũrania atĩrĩ: “Kaĩ mũndũ ũyũ akĩrĩ ũ, kuona atĩ o na rũhuho na iria nĩimũiguaga?”—Mariko 4:37-41.

Kuuma hĩndĩ ĩyo, Jesu nĩ atũgĩrĩtio gĩikaro-inĩ kĩa roho na akaheo ũhoti na wathani mũnene. Arĩ Mũthamaki wa Ũthamaki wa Ngai, arĩ na wĩra o hamwe na ũhoti wa kũrehe ũgarũrũku ũrĩa wothe ũrabatarania nĩguo andũ makorũo na ũtũũro ũrĩ na thayũ na ũgitĩri thĩinĩ wa thĩ.

Ĩndĩ, o ta ũrĩa tuona, maingĩ ma mathĩna na icanjama moimanaga na andũ, makarehwo kana magathũka makĩria nĩ ũndũ wa mwĩyendo na ũkoroku wa andũ. Nĩ atĩa Ũthamaki ũgeeka arĩa mathingataga njĩra ta icio na makarega kũgarũrũka? Bibilia yugaga atĩ Mwathani Jesu agooka “oimĩte Igũrũ, me hamwe na araika ake arĩa me na ũhoti, mokĩte me na mwaki ũkũrĩrĩmbũka. Nake nĩakerĩhĩria kũrĩ andũ arĩa matoĩ Ngai, o na arĩa mataathĩkaga nĩ Ũhoro-ũrĩa-Mwega wa Mwathani witũ Jesu.” Ĩni, nĩ ‘akaaniina arĩa monũhaga thĩ.’—2 Athesalonike 1:7, 8; Kũguũrĩrio 11:18.

Thutha ũcio, Jesu Kristo, “Mũthamaki wa athamaki,” nĩ akoonania ũhoti wake wothe igũrũ rĩa indo ciothe thĩinĩ wa thĩ. (Kũguũrĩrio 19:16) Agaatigĩrĩra atĩ gũtirĩ hingo ĩngĩ raiya a Ũthamaki magaacoka kũnyamarĩka. Akaahũthĩra hinya wake gũtongoria maũndũ ma ndũire nĩ getha andũ magunĩkage nĩ rĩera na imera. Moimĩrĩro magaakorũo marĩ kũhinga kwa maũndũ marĩa Jehova Ngai eerĩire andũ ake hĩndĩ ya agu na agu: “Nĩngamuuragĩria mbura imera ciayo ciakinya, nayo thĩ nĩĩrĩciaraga irio ciayo na ciongererekage, o nayo mĩtĩ ya mĩgũnda yanyu ĩciarage maciaro mayo.” (Maũndũ ma Alawii 26:4) Andũ magaaka nyũmba matarĩ na guoya wa kũũrũo nĩcio nĩ ũndũ wa icanjama: ‘Nĩ magaaka nyũmba, na macitũũre, na mahande mĩgũnda ya mĩthabibũ, o na marĩage maciaro mayo.’—Isaia 65:21.

Wagĩrĩirũo nĩ Gwĩka Atĩa?

O ta andũ angĩ aingĩ, hatarĩ nganja, nĩ ũragucĩrĩrio nĩ ũrutani wa atĩ kũrĩ hĩndĩ thĩinĩ wa thĩ gũtagaakorũo na icanjama rĩngĩ. Ĩndĩ-rĩ, wagĩrĩirũo nĩ gwĩka atĩa nĩguo ũgaakorũo kuo? Tondũ “arĩa matoĩ Ngai,” na ‘arĩa mataathĩkagĩra ũhoro mwega’ matigaatũũra thĩinĩ wa thĩ ĩrĩa ĩroka ĩtagaakorũo na icanjama-rĩ, no mũhaka mũndũ erute rĩu ũhoro wĩgiĩ Ngai na anyitage mbaru wathani wake thĩinĩ wa thĩ. Ngai endaga tũmũmenye na twathĩkagĩre ũhoro mwega wa Ũthamaki ũrĩa ũgathamakwo nĩ Mũriũ wake.

Njĩra ĩrĩa njega biũ ya kwĩruta gwĩka ũguo nĩ kũgerera wĩruti mũbarĩrĩre wa Bibilia. Ĩkoragwo na motaaro megiĩ ũrĩa mũndũ angĩka nĩguo agaatũũra thĩinĩ wa thĩ ĩrĩ na ũgitĩri rungu rwa wathani wa Ũthamaki. Ũria Aira a Jehova magũteithie kwĩruta ũrĩa Bibilia yugaga. Nĩ meharĩirie gũkũruta maũndũ macio. Ma nĩ atĩ, werutanĩria kũmenya Ngai na wathĩkagĩre ũhoro ũrĩa mwega, nĩ ũrĩonaga Thimo 1:33 ĩkĩhinga harĩ wee: “Mũndũ o wothe ũrĩnjiguaga arĩikaraga o na mwĩgangaro, atũũre o ahoreire gũtarĩ ũndũ mũũru wa gũtũma aigue guoya.”