Hihi Ngai nĩ Akuonaga?
ŨŨMBI ŨTŨRUTAGA ŨNDŨ ŨRĨKŨ?
Ithaa rĩa mbere kuuma mwana oima nda ya nyina rĩkoragwo rĩrĩ ihinda rĩa bata mũno harĩ mwana na nyina. Nĩkĩ? Tondũ atumia arĩa makuhanagĩrĩria na twana twao twaciarũo o ũguo ihinda-inĩ rĩu rĩa bata mũno nĩ makoragwo na itemi inene harĩ ciana ciao gũkũra wega. *
Nĩ kĩĩ gĩteithagia mũtumia kũrũmbũiya kaana gake na wendo? Kũringana na ũrĩa Profesa Jeannette Crenshaw ataarĩirie thĩinĩ wa The Journal of Perinatal, homoni (hormone) ĩtagwo oxytocin “nĩ ĩhotithagia mũtumia gũcanjamũka thutha wa kũgĩa kaana rĩrĩa arakahutia, agakarora, na agakongithia.” Homoni ĩngĩ ĩrĩa ĩrutagwo ihinda-inĩ rĩu “ĩteithagia mũtumia kũrũmbũiya kaana gake” na ĩgatũma makuhanĩrĩrie mũno nako. Ũndũ ũcio nĩ wa bata nĩkĩ?
Jehova Ngai, Mũũmbi witũ ũrĩ wendo, nĩwe wathondekire ũndũ ũcio ũtũmaga mũtumia na mwana makuhanĩrĩrie. * Mũthamaki Daudi oonanirie atĩ Ngai nĩwe wamũrutire ‘thĩinĩ wa nda’ na agĩtũma eigue arĩ na ũgitĩri anyitĩtwo nĩ nyina. Aahoire ũũ: “No harĩ wee ndaikirio kuuma o ndaciarũo; kuuma o rĩrĩa ndarĩ nda ya maitũ ũtũire ũrĩ o Mũrungu [Ngai] wakwa.”—Thaburi 22:9, 10.
TA WĨCIRIE: Angĩkorũo Ngai oombire ũndũ mũrikĩru ũguo gũtigĩrĩra atĩ mũtumia nĩ arĩrũmbũyagia kaana gake na wendo na agakahingĩria mabataro mako-rĩ, na githĩ ũguo ti kuonania atĩ o na ithuĩ Ngai nĩ atũrũmbũyagia tondũ tũrĩ “ciana cia Ngai”?—Atũmwo 17:29.
BIBILIA ĨTŨRUTAGA ATĨA IGŨRŨ RĨGIĨ ŨRĨA NGAI ATŨRŨMBŨYAGIA?
Jesu Kristo, o we ũĩ Mũũmbi witũ wega makĩria gũkĩra mũndũ ũngĩ o wothe, aarutanire ũũ: “Githĩ tũnyoni twĩrĩ tũtiendagio gathendi kamwe ga thogora mũnini? Ĩndĩ gũtirĩ o na kamwe ga tuo kangĩgwa thĩ na Ithe wanyu age kũmenya. No nginya njuĩrĩ cia mĩtwe yanyu ciothe nĩ itarĩtwo. Kwoguo-rĩ, mũtigetigĩre; inyuĩ mũrĩ a bata gũkĩra tũnyoni tũingĩ.”—Mathayo 10:29-31.
Aingĩ aitũ tũtitindanagĩra na kanyoni o gothe tuona, na o na kamwe ga tuo kangĩgwa thĩ no twage kũmenya. Ĩndĩ Ithe witũ wa igũrũ ndarĩ o na kamwe gatuo atonaga! Na nyoni, o na irĩ nyingĩ, gũtirĩ hĩndĩ ingĩkorũo irĩ cia bata harĩ we gũkĩra mũndũ. Ũndũ ũcio ũratũruta ũũ: Ndwagĩrĩirũo ‘gwĩtigĩra’ atĩ Ngai ndakuonaga. Ngũrani na ũguo, nĩ akũrũmbũyagia biũ!
Ngai nĩ arũmbũyagia maũndũ maitũ na nĩ atũroraga na njĩra ya wendo
Maandĩko matũmagĩrĩria atĩ
-
“Maitho ma Jehova monaga kũndũ guothe, magacũthagĩrĩria andũ arĩa oru o na arĩa ega.”—THIMO 15:3.
-
“Maitho ma Jehova merekeire na kũrĩ arĩa athingu, na matũ make magategerũo kĩrĩro kĩao.”—THABURI 34:15.
-
“Niĩ no njanjamũke ngĩkenagĩra ũtugi waku, nĩ gũkorũo gũthĩnĩka gwakwa, wee nĩũkuonete; kũmenya nĩũmenyete ũrĩa ngoro yakwa yonete mĩnyamaro.”—THABURI 31:7.
“NDAIGUAGA ITENDETWO NĨ JEHOVA”
Hihi ũtũũro witũ no ũcenjie tũngĩmenya atĩ Ngai nĩ arũmbũyagia maũndũ maitũ na atĩ nĩ atũroraga na njĩra ya wendo? Ĩĩ no ũcenjie, ta ũrĩa Hannah, * kuuma Ngeretha ataarĩirie:
“Maita maingĩ mũno ndaiguaga itendetwo nĩ Jehova na ngaigua mahoya makwa mategũcokio. Ndeeciragia nĩ kwaga ndaagaga wĩtĩkio. Ndaiguaga ta arĩ kũherithio ndĩraherithio kana ta ndiganĩirio tondũ ndirĩ wa bata. Ndonaga Ngai atekũnũmbũiya.”
O na kũrĩ ũguo, Hannah rĩu ndakoragwo na nganja kana Jehova nĩ amwendete na kana nĩ amũrũmbũyagia. Nĩ ũndũ ũrĩkũ watũmire acenjie ũrĩa aaiguaga? Ataaragĩria ũũ, “ũgarũrũku ũcio wekĩkire kahora kahora. Nĩ ndirikanaga mĩario ĩmwe ya Bibilia yarutirũo mĩaka mĩingĩ mĩthiru ĩgiĩ igongona rĩa ũkũũri rĩa Jesu na ĩkĩhutia mũno, ĩkĩndeithia kũgĩa na ũũma atĩ Jehova nĩ anyendete. Na rĩrĩa mahoya makwa macokio, kaingĩ ndĩĩkoraga ngĩrĩra, ndona atĩ Jehova nĩ anyendete. Ningĩ kwĩruta Bibilia na gũthiĩ mĩcemanio ya Gĩkristiano nĩ kũndutĩte maũndũ maingĩ megiĩ Jehova, ngumo ciake, na ũrĩa aiguaga gũtwerekera. Rĩu nĩ nyonaga wega atĩ Jehova nĩ atũrũmbũyagia na atĩ nĩ atwendete ithuothe na nĩ arĩ wendi wa kũrora o ũmwe witũ.”
Maũndũ macio Hannah ooigire nĩ ma gũtwĩkĩra ngoro. No rĩrĩ, ũngĩkorũo na ma atĩa atĩ Ngai nĩ ataũkagĩrũo na akaririkana ũrĩa ũiguaga? Gĩcunjĩ kĩrĩa kĩrũmĩrĩire nĩ gĩkwarĩrĩria kĩũria kĩu.
^ Atumia amwe arĩa makoragwo na thĩna wa gũthuthĩka ngoro thutha wa kũgĩa mwana (postpartum depression) no maremwo gũkorũo makuhanĩrĩirie na mwana wao. No rĩrĩ, matiagĩrĩirũo gwĩcokereria mahĩtia. Kũringana na rũhonge rwa Institute of Mental Health thĩinĩ wa Amerika (US), thĩna ũcio wa gũthuthĩka ngoro thutha wa kũgĩa mwana, “no kũhoteke ũrehagwo nĩ maũndũ matiganĩte megiĩ mwĩrĩ na ũrĩa mũndũ araigua . . . no ndumanaga na ũndũ mũtumia ekĩte kana akaga gwĩka.” Nĩguo wone ũhoro makĩria wĩgiĩ ũndũ ũcio, rora gĩcunjĩ kĩrĩ na kĩongo “Kuelewa Mshuko wa Moyo Baada ya Kujifungua” thĩinĩ wa Amkeni! ya Juni 8, 2003.
^ Jehova nĩrĩo rĩĩtwa rĩa Ngai ta ũrĩa rĩguũrĩtio thĩinĩ wa Bibilia.—Thaburi 83:18.
^ Marĩĩtwa mamwe thĩinĩ wa icunjĩ ici irũmanĩrĩire nĩ macenjetio.
Icunjĩ Ingĩ Hihi Ũngĩenda Gũthoma
MŨRANGĨRI
Hihi Ngai Nĩ Ataũkagĩrũo Nĩwe?
Njĩra ya mwanya ĩrĩa Ngai atũĩ nayo na ũrĩa oĩ mũũmbĩre witũ nĩ itũmaga tũkorũo na ma atĩ nĩ ataũkagĩrũo nĩ maũndũ mothe matwĩgiĩ.
MŨRANGĨRI
Kĩheo kĩa Ngai Kĩrĩa Kĩnene—Nĩ kĩa Goro Mũno Nĩkĩ?
Nĩ maũndũ marĩkũ matũmaga kĩheo gĩkorũo kĩrĩ kĩa bata kũrĩ iria ingĩ? Gwĩcũrania maũndũ macio no gũtũteithie kuonania ngatho citũ makĩria nĩ ũndũ wa igongona rĩa Jesu.
