Tũhũthagĩra mĩhothi gũteithĩrĩria maũndũ marĩa twĩkaga megiĩ ndini itũ na gũteithĩrĩria andũ. Muoroto witũ mũnene wa gwĩka maũndũ macio nĩ gũteithĩrĩria andũ gũtuĩka arutwo a Jesu Kristo.—Mathayo 28:19, 20.

 Mĩhothi itũ ndĩhũthĩkaga gũtongia mũndũ o wothe. Tũtirĩhaga arĩa matungataga marĩ athuri ciũngano-inĩ citũ, na Aira a Jehova matirĩhagwo nĩ ũndũ wa kũhunjia nyũmba kwa nyũmba. Arĩa othe matungataga thĩinĩ wa wabici citũ cia rũhonge na wabici ĩrĩa nene ya thĩ yothe, o hamwe na arĩa makoragwo thĩinĩ wa Kĩama Kĩrĩa Gĩtongoragia kĩa Aira a Jehova, gũtirĩ o na ũmwe ũrĩhagwo.

•   Wĩra wa Gũcaba: O mwaka nĩ tũtaũraga, tũgacaba, na tũkaheana Bibilia milioni nyingĩ o hamwe na mabuku maragĩrĩria Bibilia hatarĩ marĩhi. Ningĩ nĩ tũhũthagĩra website itũ ya jw.org na programu ya JW Library gũkinyĩria andũ mabuku hatarĩ marĩhi na tũticigathagĩrĩria nĩguo tũthondeke mbeca.

•   Gwaka na kũmenyerera mĩako itũ: Twakaga na tũkamenyerera nyũmba citũ cia ũthathaiya thĩinĩ wa thĩ yothe nĩguo tũkorũo na handũ hega ha gũcemania hamwe na gũthathaiya Ngai. Ningĩ nĩ twakaga na tũkamenyerera wabici cia honge na wabici cia ũtaũri. Andũ aingĩ nĩ merutagĩra kũruta wĩra ũyũ matekũrĩhwo, kwoguo tũtihũthagĩra mbeca nyingĩ.

•   Kũrũgamĩrĩra Wĩra Witũ: Wĩra ũrĩa ũrutagwo wabici-inĩ nene ya Aira a Jehova, wabici cia honge, wabici cia ũtaũri, o hamwe na wĩra ũrĩa ũrutagwo nĩ ahunjia arĩa matũmagwo magaceerere ciũngano, ũtwarithagio na mbere nĩ mĩhothi ya kwĩyendera.

•   Kũhunjia: Aira a Jehova matirĩhagwo nĩ ũndũ wa kũhunjia ũhoro ũrĩa mwega kana kũruta andũ arĩa angĩ “kiugo kĩa Ngai.” (2 Akorintho 2:17) O na kũrĩ ũguo, o ta ũrĩa kwarĩ harĩ Akristiano a tene, ahunjia amwe arĩa mathuurĩtwo na makamenyerio nĩ mahũthagĩra mahinda maingĩ harĩ wĩra wa kũhunjia, nĩ ũndũ ũcio nĩ maheagwo tũbeca tũnini twa kũrĩhĩra nyũmba na mabataro mao ma o mũhaka.—Afilipi 4:16, 17; 1 Timotheo 5:17, 18.

•   Kũrutana: Ngarama ya igomano citũ ĩrũgamagĩrĩrũo nĩ mĩhothi ya kwĩyendera. Ningĩ nĩ tũrutaga indo cia gũthikĩrĩria na video iria ciaragĩrĩria Bibilia. Makĩria ma ũguo, nĩ gũkoragwo na irathi cia kũmenyeria athuri a kĩũngano na ahunjia a mahinda mothe nĩguo mahote kũruta wĩra wao wega.

•   Gũteithĩrĩria Hĩndĩ ya Icanjama: Nĩ tũheanaga irio, maĩ, na nyũmba kũrĩ andũ arĩa kwao kwagĩa na ithingithia, mĩiyũro kana maũndũ mangĩ ta macio. Tũtiteithagia tu “arĩa twĩtainwo nao thĩinĩ wa wĩtĩkio,” no nĩ nginya arĩa matarĩ Aira a Jehova.—Agalatia 6:10.