“Mono mekaka kutanga Biblia, kansi mono bikisaka kutanga yo sambu yo ke vandaka nda!”—Briana, bamvula 15.

 Keti nge mpi ke kudiwaka mutindu yina? Disolo yai lenda sadisa nge!

•  Sambu na nki nge fwete tanga Biblia?

•  Inki mutindu nge lenda tanga Biblia?

•  Mambu yina baleke ya nkaka ke tuba

 Ngindu ya kutanga Biblia ke sepedisaka nge ve? Kana yo ke mpidina, beto ke bakisa nge. Mbala ya nkaka nge ke yindulaka nde Biblia kele mukanda mosi ya nene ya kele ti balutiti kuluta 1000 mpi ya kele ti bisono ya fioti-fioti mpi yo ke vandaka ve ti bifwanisu, nge lenda fwanisa yo ve ti Televizio mpi bavideo na internet!

 Kansi yindula diambu yai: Kana nge me zwa kesi mosi ya ntama ya kele ti bimvwama na kati, nge ta kangula yo sambu na kuzaba bima ya kele na kati, mpidina ve?

 Biblia kele bonso kesi yina ya kele ti bimvwama. Yo lenda sadisa nge na kukuma mayele mingi sambu na:

•   Kubaka balukanu ya mbote

•   Kuwakana mbote ti bibuti na nge

•   Kuzwa banduku ya mbote

•   Kununga basusi

 Sambu na nki Biblia kele kaka mfunu tii bubu yai ata yo kele mukanda mosi ya ntama? Sambu “masonuku yonso kele ya kupemama na Nzambi.” (2 Timoteo 3:16) Yo ke tendula nde bandongisila yina kele na Biblia me katuka na Nzambi mpi yandi ke pesaka bandongisila ya kuluta mbote.

 Mutindu ya Ntete: Tanga Biblia banda na luyantiku tii na nsuka. Yo ta sadisa nge na kuzaba nsangu ya kele na Biblia. Nge lenda tanga Biblia na mitindu mingi. Tadila mitindu yai zole:

•    Nge lenda tanga mikanda 66 ya Biblia na ndonga yina bo me tulaka yo, banda na mukanda ya Kuyantika tii na mukanda ya Kusonga.

•    Nge lenda tanga Biblia na kulanda ndonga ya mambu mutindu yo vandaka kusalama.

 Mambu ya Nge Lenda Sala: Bangindu ya ngika A7 ya kele na Biblia Mbalula ya Nsi-Ntoto ya Mpa ke monisa ndonga ya mambu ya nene ya luzingu ya Yezu na ntoto mutindu yo salamaka.

 Mutindu ya Zole: Pona disolo mosi ya ke tubila mambu ya mpasi ya nge ke kutana ti yo. Mu mbandu:

•   Keti nge ke sosa banduku ya mbote? Tanga disolo ya Yonatani ti Davidi. (1 Samuele, kapu 18-20) Na nima, sadila lutiti ya ke sadisa na kuyindula ya ke tuba nde “Mutindu ya Kuzwa Banduku ya Mbote” sambu na kulonguka malongi ya mfunu ya disolo yina.

•   Keti nge ke sala yonso sambu na kutina mimekamu? Tanga disolo ya Yozefi ya ke tubila mutindu yandi tinaka mimekamu. (Kuyantika, kapu 39) Na nima, sadila lutiti ya ke sadisa na kuyindula ya ke tuba nde “Mutindu ya Kutina Mimekamu . . . Yozefi—Kitini 1” mpi “Bo Kusilaka Yandi Makambu!” mpi Yozefi—Kitini 2” sambu na kulonguka malongi ya mfunu ya disolo yina.

•   Keti nge kele na mfunu ya kuzaba mutindu kisambu lenda sadisa nge? Tanga disolo ya Nehemia. (Nehemia, kapu 2) Na nima, sadila lutiti ya ke sadisa na kuyindula ya ke tuba nde “Nzambi pesaka Mvutu na Kisambu na Yandi” sambu na kulonguka malongi ya mfunu ya disolo yina.

 Mambu ya Nge Lenda Sala: Ntangu nge ke tanga Biblia, pona kisika mosi ya pima sambu nge tanga ti dikebi yonso.

 Mutindu ya Tatu: Pona disolo mosi to nkunga mosi ya kele na Biblia mpi tanga yo, na nima yindula mutindu nge lenda sadila yo. Na nima ya kutanga, kudiyula nde:

•    Sambu na nki Yehowa sonikisaka disolo yai na Biblia?

•    Inki yo ke longa mono sambu na bikalulu ya Yehowa to mutindu yandi ke salaka mambu?

•    Inki mutindu mono lenda sadila mambu yai na luzingu na mono?

 Mambu ya Nge Lenda Sala: Sonika dati yina nge ta banda kutanga Biblia konso kilumbu. Mpi sadila “Manaka ya Kutanga Biblia” ya kele na jw.org.