Ata Biblia ke tubilaka ve mambu yonso ya me tala makwela sambu na Yezu, yo ke monisaka pwelele nde Yezu balaka ve. a Beto tadila mambu yai:

1.   Biblia ke tubilaka mbala mingi bampangi ya Yezu. Diaka, yo ke tubilaka bankento yina vandaka kutambula ti yandi sambu na kulonga bantu mpi bayina vandaka ti yandi na ntwala nde yandi fwa. Kansi ata kisika mosi ve Biblia ke tubaka nde yandi vandaka ti nkento. (Matayo 12:46, 47; Marko 3:31, 32; 15:40; Luka 8:2, 3, 19, 20; Yoane 19:25) Sambu Biblia ke tubaka ve ata kima sambu na diambu yai, yo ke pwelele nde Yezu balaka ve.

2.   Yezu songaka balongoki na yandi mambu yai sambu na bantu yina ke buyaka kubala sambu bo kudipesa mingi na kisalu ya Nzambi: “Bika muntu yina lenda ndima diambu yai [kukonda kukwela] kundima yo.” (Matayo 19:10-12) Yandi mosi pesaka mbandu sambu na Bakristu yina ke buya kubala sambu na kusala mingi na kisalu ya Nzambi.—Yoane 13:15; 1 Bakorinto 7:32-38.

3.   Kaka na ntwala nde Yezu kufwa, yandi yidikaka mambu sambu mama na yandi kubikala na lutaninu mpi bo landa kusadisa yandi. (Yoane 19:25-27) Kana Yezu vandaka ti nkento mpi bana, yandi zolaka kuyidika mpi mambu sambu bo bikala na lutaninu mpi bo sadisa bo na nima.

4.   Biblia ke tubaka nde Yezu kele mbandu sambu na babakala kansi yo ke tubilaka ve mutindu Yezu vandaka kusadila nkento mosi buna mambu. Kansi Biblia ke tuba nde: “Babakala, beno landa kuzola bankento na beno, mutindu Kristu mpi zolaka dibundu mpi pesaka luzingu na yandi sambu na yo.” (Baefezo 5: 25) Kana Yezu balaka ntangu yandi vandaka awa ntoto, yandi zolaka kuvanda mbandu ya kukuka mpi verse yai zolaka kumonisa mbandu na yandi na yina me tala kuvanda bakala ya mbote.

 Ee, Yezu vandaka ti bampangi sambanu. Bampangi na yandi yango bo yai: Yakobo, Yozefi, Simoni, Yudasi mpi bampangi na yandi zole ya bankento. (Matayo 13:54-56; Marko 6:3) Bampangi yai ya Yezu vandaka mpenza bana ya Maria mama ya Yezu yina yandi butaka ti bakala na yandi Yozefi. (Matayo 1: 25) Mutindu Biblia ke bingaka Yezu nde: “mwana ya ntete” ya Maria ke monisa nde Maria vandaka ti bana ya nkaka.—Luka 2:7.

 Bantu mingi ke tubaka mambu ya mutindu na mutindu sambu na “bampangi” ya Yezu, sambu na kundimisa bantu nde Maria bikalaka mwense luzingu yandi ya mvimba. Mu mbandu, bantu ya nkaka ke tubaka nde bampangi ya Yezu vandaka bana yina Yozefi butaka ti nkento mosi ya yandi balaka na ntwala nde yandi bala Maria. Kansi Biblia ke tubaka nde Yezu vandaka ti nswa ya kubaka kimfumu yina Nzambi silaka na Davidi. (2 Samuele 7:12, 13; Luka 1:32) Kana Yozefi vandaka ti mwana ya nkaka ya vandaka mbuta ya Yezu, mwana yina ya mbuta muntu zolaka kuvanda ti nswa ya kubaka kimfumu ya Yozefi.

 Keti ngogo bampangi ya Yezu ke tadila balongoki na yandi to bampangi na yandi ya dibundu? Ngindu yai ke wakana ve ti mambu yina Biblia ke tubaka. Nkutu Biblia ke tubaka nde: “Ya kieleka, bampangi na yandi vandaka kutula ve lukwikilu na yandi.” (Yoane 7:5) Biblia ke monisaka pwelele nde Yezu vandaka ti balongoki mpi bampangi.—Yoane 2:12.

 Diaka, bantu ya nkaka ke yindulaka nde bampangi ya Yezu vandaka bisoni na yandi. Ya kieleka Masonuku ya Kigreki (Nouveau Testament) ke sadilaka bangogo mingi sambu na kutubila “bampangi,” “bantu ya dibuta” mpi “kisoni.” (Luka 21:16; Bakolosai 4:10) Bantu mingi ya mayele ya ke longukaka mambu ya Biblia ke ndimaka nde bampangi ya Yezu, vandaka mpenza bampangi na yandi ya masonga. Mu mbandu, mukanda mosi (The Expositor’s Bible Commentary) ke tuba nde: “Bo me sadila ngogo ‘bampangi’ . . . sambu na kutubila bana ya Maria ti Yozefi, disongidila bampangi ya Yezu.” b