Mambi kuyantikaka na ntoto ntangu Satana kutubaka luvunu ya ntete. Satana kuvandaka wanzyo mosi ya kukuka ntangu Nzambi kugangaka yandi, kansi “yandi kangamaka ve ngolo na kieleka.” (Yoane 8:44) Yandi yedisaka mpusa ya kubaka lusambu yina bantu fwete pesa kaka na Nzambi. Satana kukusaka Eva, nkento ya ntete, mpi kundimisaka yandi na kulemfukila yandi na kisika ya kulemfukila Nzambi. Adami, kulandaka Eva mpi kukolamaka na Nzambi. Lukanu yina Adami kubakaka nataka mpasi mpi lufwa.—Tanga Kuyantika 3:1-6, 17-19.

Ntangu Satana pusaka Eva na kukolama na Nzambi, yandi yantikisaka mbendumuka na luyalu ya Nzambi, to kutelaminaka Muntu ya Kuluta Kuzanguka. Bantu mingi melandaka Satana na mutindu bo kebuyaka Nzambi na kuvanda Mfumu na bo. Yo yina, Satana mekumaka “mfumu ya nsi-ntoto.”—Tanga Yoane 14:30; 1 Yoane 5:19.

Bima yonso yina Nzambi salaka vandaka ya kukuka. Bantu mpi bawanzyo yina Nzambi gangaka, kuvandaka ti makuki ya kukuka ya kulemfuka na bansiku ya Nzambi. (Kulonga 32:4, 5) Nzambi kugangaka beto ti kimpwanza ya kupona kusala mambu ya mbote to ya mbi. Kimpwanza yina kepesaka beto dibaku ya kumonisa zola na beto sambu na Nzambi.—Tanga Yakobo 1:13-15; 1 Yoane 5:3.

Tuka ntangu yina mbendumuka kubasikaka na Edeni, Yehowa mepesaka nzila nde bantu kukolama na luyalu na yandi. Sambu na nki? Sambu na kumonisa nde bikesa yina bo kesalaka sambu na kuyala kukonda yandi, tanatila ve bantu mambote. (Longi 7:29; 8:9) Na nima ya bamvula 6 000 ya disolo ya luzingu ya bantu, mbutu ya mbendumuka yina memonanaka. Luyalu ya bantu menungaka  ve na kumanisa mvita, nku, kukonda lunungu, mpi maladi.—Tanga Yeremia 10:23; Baroma 9:17.

Na kuswaswana ti luyalu ya bantu, luyalu ya Nzambi tanatila bantu yina kendimaka yo balusakumunu. (Yezaya 48:17, 18) Kubika fyoti, Yehowa tafwa baluyalu yonso ya bantu. Kaka bantu yina mendimaka nde Nzambi kuyala bo tazinga na ntoto.—Yezaya 11:9. —Tanga Daniele 2:44.

Satana kutubaka nde, bantu kesadilaka Nzambi kaka sambu na bikuma ya bwimi. Keti nge tazola kubedisa luvunu yina? Nge lenda sala yo! Ntima-nda ya Nzambi kepesaka beto yonso dibaku ya kumonisa kana beto kendima luyalu ya Nzambi to ya bantu. Beto kemonisaka nsola yina beto kesalaka, na mutindu yina beto ketwadisaka luzingu na beto.—Tanga Yobi 1:8-12; Bingana 27:11.

Beto lenda pona nde Nzambi kuvanda Mfumu na beto, kana beto kesosa lusambu ya kyeleka mpi kesadila malongi na yo yina kekatukaka na Biblia, Ndinga na yandi. (Yoane 4:23) Beto kebuyaka Satana na kuvanda mfumu na beto ntangu beto kekudikotisaka ve na mambu ya politiki mpi na bitumba, mutindu Yezu salaka.—Tanga Yoane 17:14.

Satana kesadilaka ngolo na yandi sambu na kusyamisa bantu na kusala bisalu ya mansoni mpi ya mbi. Ntangu beto kebuyaka mambu ya mutindu yai, banduku na beto yankaka mpi bampangi ya dibuta lenda seka beto to kumenga beto. (1 Piere 4:3, 4) Yo yina, beto fwete sala nsola. Keti beto tavukana ti bantu yina kezolaka Nzambi? Keti beto talemfuka na bansiku na yandi ya mayele mpi ya zola? Kana beto sala mpidina, beto tamonisa nde Satana kukusaka ntangu yandi tubaka nde, ata muntu mosi ve talemfuka na mambu yina Nzambi ketubaka kana yandi kenyokwama.—Tanga 1 Bakorinto 6:9, 10; 15:33.

Zola ya Nzambi sambu na bantu kendimisa nde mambi mpi bampasi tamana. Bantu yina kemonisaka nde bo kekwikilaka na mambu yai tazinga mvula na mvula na ntoto.—Tanga Yoane 3:16.