Baluyalu mingi na nsi-ntoto lombaka nde bantu kuvanda diaka ve pene-pene mpi bo buyisaka bantu na kuvukana kisika mosi. Bambangi ya Yehowa bakaka lukanu ya kuzitisa bamfumu ya leta kansi mpi ya kulanda kusambila Yehowa kukonda kutula luzingu na bo to ya bantu ya nkaka na kigonsa. Sambu na kusala yo, mabundu ya Bambangi ya Yehowa ke sadila ba-aplikasio, mu mbandu Zoom, sambu na kusala balukutakanu.

 Sambu mabundu kusala balukutakanu mbala na mbala na nzila ya video, Nto-Kimvuka ndimaka nde bo sadila makabu sambu na kusumbila mabundu bakonti ya aplikasio Zoom. Yo me monana kibeni nde, lukanu yina me vanda lusadisu mosi ya nene sambu na mabundu ya nkaka yina vandaka ve ti mbongo ya kusumba konti yai sambu na kusala balukutakanu na nzila ya video. Kusumba konti yango ke lomba kuvanda ti mbongo badolare 15-20 to nkutu mingi. Mabundu yai vandaka kusadila ba-aplikasio yina vandaka kupesa nzila kaka na bantu fioti mpamba na kuvukana na video na nzila ya Internet mpi bo vandaka ve na lutaninu ntangu bo vandaka kuvukana. Kansi ntangu yai mabundu yonso ya ke sadilaka bakonti ya Zoom yina organizasio sumbaka lenda tanina kukonda mpasi bakonti na bo mpi kupesa bantu mingi kibeni nzila ya kulanda balukutakanu na nzila ya video. Bubu yai, mabundu kuluta 65 000 na bansi kuluta 170 ke sadila bakonti yai.

 Dibundu ya Kairagi, na Manado, na Nordi ya Sulawesi, na insi Indonésie, yambulaka kusadila aplikasio yina bo vandaka kusadila mpi kumaka kusadila konti ya aplikasio Zoom yina organizasio sumbaka. Mpangi Hadi Santoso ke tuba nde: “Ata bampangi-babakala mpi bampangi-bankento yina me zaba ve mbote mutindu ya kusadila ba-apareyi lenda landa ntangu yai balukutakanu, mingi-mingi sambu video ke zengana-zengana diaka ve mpi yo ke lomba diaka ve nde bo kukota-kota mbala mingi ntangu lukutakanu ke salama.”

 Lester Jijón, Jr. kele nkuluntu na dibundu ya Guayacanes Oeste na mbanza Guayaquil, na insi Équateur. Yandi ke tuba nde: “Bampangi-babakala mpi bampangi-bankento mingi kele ve ti mbongo mingi, yo zolaka kuvanda kibeni mpasi nde mabundu ya nkaka kusumba aplikasio Zoom sambu dibundu ya mvimba kulanda balukutakanu. Kansi ntangu yai, organizasio me sadisa beto na kuzwa konti sambu na Zoom mpi yo ke pesa bantu mingi nzila ya kuvukana sambu na balukutakanu mpi ya kumonana. Beto lenda bingisa mpi bantu ya nkaka na kulanda balukutakanu kukonda kufuta mbongo, kukonda kuwa boma nde kana bantu me kota mingi, Internet lenda zengana.”

 Johnson Mwanza kele nkuluntu na Dibundu ya Ngwerere Nord na mbanza Lusaka na insi Zambie. Yandi ke tuba nde: “Bampangi-babakala mpi bampangi-bankento mingi ke tuba mbala na mbala nde, ‘lukanu yina organizasio bakaka ya kusumba aplikasio Zoom ke sadisa beto na kudiwa pene-pene ya bampangi na beto ya babakala ti ya bankento mpi na kumona nde Yehowa ke zolaka beto mpi ke tudilaka beto dikebi.’”

 Organizasio me sumba bakonti yai na mbongo yina bo bumbaka sambu na kusala kisalu ya kusadisa bantu yina me bwila mambu ya mpasi. Mbongo yai ke katukaka na makabu ya luzolo ya mbote yina bantu ke tulaka sambu na kisalu yina ke salama na ntoto ya mvimba. Bantu mingi ke tulaka makabu yai na nzila ya donate.isa4310.com. Matondo mingi sambu na makabu yina beno ke pesa na luzolo yonso. Makabu yai ke sadisa mpi na kupesa maboko na nsi-ntoto ya mvimba na kisalu ya kusadisa bantu yina me bwila mpasi.—2 Bakorinto 8:14.