Biblia ke tendulaka pwelele nde Armagedoni kele bitumba yina ta salama na ntoto ya mvimba, kansi ve na kitini mosi mpamba ya ntoto mpi na bitumba yango baluyalu yonso ya bantu ta vukana sambu na kunwanisa Nzambi.

•   “Mambu ya me pemama na bademo . . . ke kwenda na bantotila ya ntoto ya mvimba, sambu na kuvukisa bo sambu na bitumba ya kilumbu ya nene ya Nzambi Nkwa-Ngolo Yonso. . . . Bo vukisaka bo na kisika yina bo ke bingaka na Kiebreo nde Armagedoni.”—Kusonga 16:14, 16.

 Ngogo “Armagedoni” me katuka na ngogo ya Kiebreo Har Meghid·dohnʹ, ya ke tendula “Ngumba ya Megido.” Megido vandaka mbanza mosi buna na teritware ya Izraele ya ntama. Yo yina, bantu ya nkaka ke yindulaka nde Armagedoni ta salama na Izraele. Kansi yo vanda nziunga ya Megido to kisika ya nkaka na Moyen-Orient ta fwana ve sambu “bantotila ya ntoto ya mvimba” mpi basoda na bo kuvukana sambu na bitumba yina.

 Bo me sonikaka mukanda ya Kusonga “na bidimbu” to mambu ya bo sonikaka na kati kele mambu ya kifwani. (Kusonga 1:1) Kana Biblia ke tubila Armagedoni, yo ke tubilaka ve kisika mosi buna ya bantu lenda mona na meso, kansi yo ke tubilaka ntangu yina bansi yonso na ntoto ya mvimba ta vukana sambu na kutelamina Nzambi. Yo ta vanda mbala na bo ya nsuka.—Kusonga 19:11-16, 19-21.