DISOLO YINA KELE NA LUTITI YA ZULU | BAMBANGI YA YEHOWA KELE BANANI?
Bambangi ya Yehowa Kele Banani?
“Mike kele Mbangi ya Yehowa mpi mono me zabaka yandi banda ntama. Kansi, mono ke bakisaka ve dibundu na bo. Yehowa kele nani? Sambu na nki Bambangi ya Yehowa ke salaka ve bankinsi? Keti Mike me kotaka na dibundu ya kieleka?”
—Becky na Californie, na États-Unis.
“Ntangu bantu ya ke zingaka pene-pene na mono yantikaka kulonguka Biblia ti Bambangi ya Yehowa, mono kudiyulaka nde: ‘Zina yai, Bambangi ya Yehowa, ke tendula nki? Zina yango katukaka na wapi?’”
—Zenon, na Ontario, na Canada.
“Sambu mono ti nkento na mono vandaka kukwenda diaka ve na nzo-nzambi, beto vandaka kuyindula nde Bambangi ya Yehowa kwisaka kutala beto sambu na kumonisa mbi na beto. Beto vandaka kuyindula nde kana mabundu ya nene kele ve ti mambu ya beto ke sosa, keti kadibundu ya Bambangi ya Yehowa lenda vanda ti yo?”
—Kent, na Washington, na États-Unis.
“Na kutuba ya mbote, mono vandaka kuzaba ve Bambangi ya Yehowa mpi mambu ya bo ke kwikilaka.”
—Cecilie, na Esbjerg, na Danemark.
Ntembe kele ve nde nge ke monaka Bambangi ya Yehowa ke samuna nzo na nzo, ke samuna na bisika ya bantu mingi, ke kabula mikanda yina ke tendulaka Biblia mpi ke longuka Biblia ya ofele ti bantu. Ziku, Mbangi ya Yehowa mosi muntu pesaka nge zulunalu yai. Kansi, nge lenda kudiyula nde Bambangi ya Yehowa kele mpenza banani? Yo lenda vanda nde nge ke tadilaka Bambangi ya Yehowa mutindu mosi ti bantu yai ya beto me tubila awa na zulu.
Kana nge kele ti bangiufula bonso ya bantu yai ya beto me tubila na zulu, na wapi nge lenda baka bamvutu? Inki mutindu nge lenda zaba kibeni mambu yina Bambangi ya Yehowa ke kwikilaka? Inki kisika Bambangi ya Yehowa ke bakaka mbongo sambu na kusala kisalu ya kusamuna mpi sambu na kutunga bisika na bo ya lusambu? Mpi sambu na nki bo ke longaka bantu na banzo mpi na bisika ya bantu mingi?
Cecilie, muntu ya beto me tubila na luyantiku, ke tuba diaka nde: “Mono tangaka mambu mingi ya me tala Bambangi ya Yehowa na Internet. Mono waka mpi mambu yina bantu ke tubaka sambu na bo mpi bangindu ya mbi yina bantu ke vandaka ti yo sambu na bo. Yo yina, mono kumaka mpi ti bangindu ya mbi sambu na Bambangi ya Yehowa.” Na nima, Cecilie solulaka ti Bambangi ya Yehowa mpi yandi bakaka bamvutu ya mbote na bangiufula na yandi.
Keti nge ke zola kubaka bamvutu ya mbote na bangiufula ya nge ke kudiyulaka sambu na Bambangi ya Yehowa? Beto ke lomba nge na kusolula ti Bambangi ya Yehowa, bantu ya ke basisaka zulunalu yai. (Bingana 14:15) Masolo ya ke landa ta sadisa nge na kuzaba Bambangi ya Yehowa, mambu ya bo ke kwikilaka mpi kisalu ya bo ke salaka.
