“Bo vandaka kusadila bantu mambu ya mbote mpi bo vandaka kusadila bambwa na mono mambu ya mbote. Kilumbu mosi, mpangi Elaine yina telemaka na lweka ya shario ya mikanda pesaka bambwa na mono babiskwi. Na nima, konso ntangu yina mono vandaka kutambusa bambwa na mono, kana beto me kuma pene-pene ya shario yina ya mikanda, bo vandaka kuzola kukwenda na Bambangi ya Yehowa sambu bo pesa bo babiskwi.

“Bangonda mingi lutaka, bambwa vandaka kusepela ti babiskwi na bo mpi mono vandaka kusepela ti masolo ya nkufi yina beto vandaka kusolula ti Bambangi ya Yehowa. Kansi mono vandaka kuzola ve kusolula ti bo mingi. Mono vandaka ti bamvula 70 ti ndambu mpi mono vandaka kuzaba ve mbote mambu yina Bambangi ya Yehowa ke kwikilaka. Mabundu mingi ya Kikristu vandaka kusala mambu yina vandaka kusepedisa mono ve. Yo yina, mono monaka nde yo kele mbote na kulonguka Biblia mono mosi.

“Na ntangu yina, mono monaka Bambangi ya Yehowa ya nkaka na bisika ya nkaka na mbanza me telema na lweka ya bashario na bo ya mikanda. Bo mpi vandaka kusolula mbote ti bantu. Bo vandaka kusadila Biblia sambu na kupesa bamvutu na bangiufula na mono mpi yo salaka nde mono kuma kutudila bo ntima mingi.

“Kilumbu mosi Elaine yulaka mono nde: ‘Keti nge ke ndimaka nde bambisi kele dikabu ya Nzambi?’ Mono vutulaka nde: ‘Ee, mono ke ndimaka yo.’ Yo yina Elaine tangilaka mono Yezaya 11:6-9. Banda kilumbu yina, mono kumaka kuzola kulonguka mambu ya Biblia kansi mono vandaka kaka kuzola ve kubaka mikanda ya Bambangi ya Yehowa.

“Na bilumbu yina landaka, mono sepelaka mingi kibeni ti masolo ya nkufi yina beto solulaka ti Elaine mpi bakala na yandi Brent. Bo songaka mono na kutanga mukanda ya Matayo tii na Bisalu sambu na kubakisa mambu yina muntu fwete sala sambu na kulanda mbandu ya Kristu. Mono salaka yo. Bilumbu fioti na nima, mono ndimaka nde Brent ti Elaine kulonguka Biblia ti mono. Yo vandaka na kati-kati ya 2016.

“Mono vandaka kusepela mingi kibeni kulonguka Biblia konso mposo mpi kukwenda na balukutakanu na Nzo ya Kimfumu. Mono vandaka na kiese mingi ya kulonguka mambu yina Biblia ke tubaka kibeni. Mvula mosi na nima, mono bakaka mbotika. Bubu yai, mono kele ti bamvula 79 mpi mono ke pesa Yehowa mersi mingi sambu mono me zwaka dibundu ya kieleka. Yehowa me sadisaka mono na kukota na dibuta ya bansadi na yandi ya ntoto ya mvimba.”