Kieleka ya Me Tala Nzambi mpi Yezu
Ata bantu ke sambilaka banzambi mingi, Nzambi ya kieleka kele kaka mosi. (Yoane 17:3) Yandi kele “Muntu Yina Me Luta Yonso,” Ngangi ya bima yonso mpi Nto ya luzingu. Beto fwete sambila kaka yandi.—Daniele 7:18; Kusonga 4:11.
Nzambi Kele Nani?
Zina ya Nzambi kele na masonuku ya kisina BAMBALA KITESO YA 7 000
YEHOWA kele zina ya Nzambi
MFUMU, NZAMBI, TATA—Mwa batitre ya Yehowa
Zina ya Nzambi Kele Nani? Nzambi yandi mosi ke tuba nde: “Mono kele Yehowa. Yo yina zina na mono.” (Yezaya 42:8) Zina ya Nzambi kele bambala kiteso 7 000 na Biblia. Kansi, Babiblia mingi me katulaka zina ya Nzambi mpi me yingisaka yo na titre bonso “Mfumu.” Nzambi ke zola nde nge kuma nduku na yandi, yo yina yandi ke lomba nge na ‘kubinga zina na yandi.’—Nkunga 105:1.
Batitre ya Yehowa. Biblia ke bingaka Yehowa na batitre bonso, “Nzambi,” “Nkwa-Ngolo Yonso,” “Ngangi,” “Tata” mpi “Mfumu.” Bisambu mingi yina kele na Biblia ke bingaka Yehowa na titre ya luzitu mpi na zina na yandi mosi, Yehowa.—Daniele 9:4.
Mutindu Nzambi Kele. Nzambi kele mpeve. (Yoane 4:24) Biblia ke tuba nde: “Ata muntu mosi ve me monaka Nzambi.” (Yoane 1:18) Biblia ke tubilaka mutindu yandi ke kudiwaka. Bantu lenda pesa yandi mpasi to bo lenda ‘pesa yandi kiese.’—Bingana 11:20; Nkunga 78:40, 41.
Bikalulu ya Kuyituka ya Nzambi. Nzambi ke pona-ponaka ve, yandi ke talaka bantu ya makanda yonso mpi ya bisika yonso. (Bisalu 10:34, 35) Yandi “ke wilaka bantu mawa mpi ke fwilaka bo nkenda, yandi ke waka makasi nswalu ve mpi kele ya kufuluka na zola ya kwikama mpi kieleka.” (Kubasika 34:6, 7) Kansi, Nzambi kele ti bikalulu iya yina ke bendaka kibeni dikebi.
Ngolo. Banda ntama yandi kele “Nzambi Nkwa-Ngolo Yonso,” yandi kele ti ngolo yina ke sukaka ve ya kulungisa konso lusilu yina yandi ke silaka.—Kuyantika 17:1.
Mayele. Nzambi me luta bantu yonso na mayele. Yo yina, Biblia ke tuba nde yandi ‘mpamba kele mayele.’—Baroma 16:27.
Lunungu. Nzambi ke salaka ntangu yonso mambu ya mbote. Bisalu na yandi kele “ya kukuka,” mpi yandi “ke kondaka ve lunungu.”—Kulonga 32:4.
Zola. Biblia ke tuba nde “Nzambi kele zola.” (1 Yoane 4:8) Ata muntu mosi ve ke monisaka zola bonso Nzambi sambu Nzambi kele mbandu ya kuluta mbote ya kumonisa zola. Zola na yandi ya nene ke pusaka yandi na kusala konso kima yina mpi beto ke bakilaka yo mambote na mitindu mingi.
Nzambi Ke Salaka Kinduku ti Bantu. Nzambi kele tata na beto ya zola. (Matayo 6:9) Kana beto ke kwikila na yandi, beto lenda kuma banduku na yandi. (Nkunga 25:14) Kansi, Nzambi ke lomba nge na kukwenda pene-pene na yandi na nzila ya kisambu mpi na ‘kulosa basusi na nge yonso na yandi sambu yandi ke kudibanzaka sambu na nge.’—1 Piere 5:7; Yakobo 4:8.
Inki Luswaswanu Kele na Kati ya Nzambi ti Kristu?
Yezu Kele Ve Nzambi. Muntu yina Nzambi gangaka yandi mosi kele Yezu. Yo yina, Biblia ke bingaka yandi Mwana ya Nzambi. (Yoane 1:14) Na nima ya kuganga Yezu, Yehowa sadilaka mwana na yandi ya ntete bonso “kapita ya kisalu” sambu na kusala bima yonso mpi bantu yonso.—Bingana 8:30, 31; Bakolosai 1:15, 16.
Yezu Kristu tubaka ve ata fioti nde yandi kele Nzambi. Kansi yandi tubaka nde: “Mono kele mumonisi ya me katuka na [Nzambi] mpi yandi Muntu tindaka mono.” (Yoane 7:29) Ntangu Yezu vandaka kusolula ti longoki na yandi mosi, yandi bingaka Yehowa “Tata na mono mpi Tata na beno” mpi “Nzambi na mono mpi Nzambi na beno.” (Yoane 20:17) Na nima ya lufwa ya Yezu, Yehowa futumunaka yandi na zulu mpi pesaka yandi kiyeka ya nene na diboko na yandi ya kitata.—Matayo 28:18; Bisalu 2:32, 33.
Yezu Kristu Lenda Sadisa Nge na Kukwenda Pene-pene ya Nzambi
Yezu kwisaka na ntoto sambu na kulonga beto mambu ya me tala Tata na yandi. Yehowa yandi mosi tubaka sambu na Yezu nde: “Yai Mwana na mono, ya mono ke zolaka mingi. Beno wila yandi.” (Marko 9:7) Yezu zabaka Nzambi mbote kuluta bantu yonso. Yandi tubaka nde: “Ata muntu mosi ve kuzaba kana Tata kele nani katula kaka Mwana mpi konso muntu yina Mwana ke zola kumonisa yandi Tata.”—Luka 10:22.
Yezu Kristu landaka mbandu ya bikalulu ya kukuka ya Nzambi. Yezu landaka mbandu ya bikalulu ya Tata na yandi, yo yina yandi tubaka nde: “Muntu yina me mona mono me mona mpi Tata.” (Yoane 14:9) Yezu landaka mbandu ya Nzambi na mambu yina yandi vandaka kutuba mpi kusala, yo salaka nde bantu kukwenda pene-pene ya Nzambi. Yandi tubaka nde: “Mono kele nzila mpi kieleka mpi luzingu. Ata muntu mosi ve ke kwisaka na Tata kana yandi kwisa ve na nzila na mono.” (Yoane 14:6) Yandi tubaka diaka nde: “Bansambidi ya kieleka ta sambila Tata na mpeve mpi na kieleka, sambu ya kieleka, Tata ke sosa bantu ya mutindu yai sambu bo sambila yandi.” (Yoane 4:23) Ya kieleka, Yehowa ke sosaka bantu yina ke zola kuzaba kieleka ya me tala yandi.
Nge Lenda Sepela Mpi Ti
NZOZULU YA NKENGI
Nzambi Kele Nani?
Kuzaba Nzambi kele kima ya ntete yina ta sadisa nge na kuyedisa kinduku na nge ti yandi. Inki mutindu nge lenda sala yo?
MALONGI YA MFUNU YA BIBLIA
Keti Nzambi Kele na Zina?
Nzambi kele ti batitre mingi, tanga mpi Nkwa-Ngolo Yonso, Ngangi, mpi Mfumu. Kansi, bo ke sadila zina ya Nzambi mbala kiteso ya 7 000 na Biblia.
BAMVUTU NA BANGIUFULA YA BIBLIA
Sambu na Nki Biblia Ke Bingaka Yezu Mwana ya Nzambi?
Kana Nzambi butaka ve Yezu mutindu bantu ke butaka bana, inki mutindu Yezu kele Mwana ya Nzambi?
BAMVUTU NA BANGIUFULA YA BIBLIA
Yehowa Kele Nani?
Keti yandi kele Nzambi kaka ya dikanda mosi buna, mu mbandu bantu ya Izraele?
NZOZULU YA NKENGI
Keti Beto Lenda Zaba Nzambi?
Na kutuba ya mbote, mambu ya Nzambi yina beto lenda bakisa ve lenda sadisa beto na kukwenda pene-pene na yandi.
