Ntangu bitumba kumaka ngolo na Donetsk na insi Ukraine, mpangi-bakala Mykola Bojedomov vandaka kukwenda mbala na mbala na mbanza Kramatorsk sambu na kusadisa bampangi mingi na kutina bisika yina bitumba vandaka ngolo.

Diambu ya mawa kele nde na Kitanu 8 avril 2022, Mykola fwaka ntangu bo losaka bombe na kisika yina bantu ke bakaka train na Kramatorsk na insi Donetsk.

Katula mpangi Mykola yina vandaka ti bamvula 58, mpangi-nkento mosi vandaka mpi na kati ya bantu kuluta 50 yina fwaka. Diaka, mpangi-bakala mosi vandaka na kati ya bantu kuluta 100 yina lwalaka. Bampangi yina fwaka ve na bombe yina tubaka nde bo waka makelele ya ngolo ya bombe mbala zole mpi na nima bima ya fioti-fioti mingi panzanaka na mupepe mpi pumbukaka na bandambu yonso.

Nina, nkento ya mpangi Mykola zingaka ti yandi bamvula 32 na makwela. Yandi ke tuba nde: “Bakala na mono vandaka kutula konso ntangu mambote ya bantu ya nkaka na kisika ya ntete. Yandi vandaka kuzola mingi kusadisa bampangi yina kele minunu mpi bayina ke belaka. Kansi konso mbala yina yandi vandaka kuvutuka na Kramatorsk, luzingu na yandi vandaka kukuma na kigonsa ya mingi. Yo vandaka kumonana nde yo vandaka nzietelo na yandi ya nsuka.”

Mpangi-nkento Nina ti bakala na yandi Mykola, bo zole bakaka mbotika na 1997. Mpangi-bakala Mykola vandaka nkuluntu yina sadilaka Yehowa na ntima ya mvimba bamvula mingi. Bampangi ke kwisaka kuvanda na lweka ya mpangi Nina sambu na kumonisila yandi zola mpi kusadisa yandi. Mpangi Nina ke tuba nde: “Mambu ya kikesa yina bo ke songaka mono ke sadisaka mono mingi na ntangu yai ya mpasi.”

Mpangi Nina ke tuba nde baverse ya Biblia ke pesaka yandi mpi kikesa, mingi-mingi Yezaya 40:28-31. Yandi ke tuba nde: “Yehowa ke sadisaka mono na kubaka diaka ngolo. Mono ke mona zola ya mingi kibeni yina Yehowa me kuma kumonisila mono. Ntete, mono vandaka kutanga na mikanda mutindu Yehowa vandaka kumonisila bampangi ya nkaka zola ya mutindu yai. Kansi sesepi yai, mono me mona mono mosi mpila yandi me monisila mono yo mpi.”

Beto ke samba sambu na mpangi Nina mpi bantu yonso yina bampangi na bo me fwa sambu na bitumba. Beto ke tula ntima nde Yehowa ta landa kusadisa bo.—Nkunga 20:2.