Bonso na bansi mingi, Australie kele ti minunu mingi. Minunu mingi ke zingaka na banzo yina bo ke sansaka minunu, kuna minganga ke sansaka bo mpi ke lungisaka bampusa na bo na mawete yonso.

Ya kieleka, minunu mingi yina ke zingaka na nzo ya minunu ke vandaka na mfunu kaka ve ya lusansu ya mbote kansi bo ke vandaka mpi ti mfunu ya mambu mingi. Mbala mingi bo ke lembaka, ke kudimonaka bo mosi to me konda lusadisu. Bambangi ya Yehowa ke pesaka minunu kivuvu mpi lusadisu ntangu bo ke kwendaka kutala bo konso mposo na banzo ya minunu na Portland, na mbanza Victoria, na insi Australie.

Bambangi ya Yehowa ya bwala yina ke kutanaka ti minunu mpi ke solulaka ti bo masolo ya Biblia, mu mbandu, mambu ya mfunu ya metala luzingu ya Yezu. Jason ke tuba nde: “Beto ke tangilaka minunu Biblia mpi ke tadilaka masolo na yo ti bo.” Sambu minunu mingi ke belaka ngolo, Bambangi ya Yehowa ke pesaka bo kivuvu mpi kikesa ntangu bo ke songaka bo lusilu ya Nzambi ya kumanisa maladi mpi lufwa.

Tony ke tuba nde: “Beto yantikaka ntete kusolula ti bo minuta 30, kansi minunu yango zolaka nde beto solula mingi ti bo. “Ntangu yai beto ke salaka kiteso ya ngunga mosi. Kilumbu ya nkaka, mununu mosi tubaka nde beto sala bangunga zole!” Sambu minunu mingi kele bifwa meso, kele ti ngolo ve mpi ke kukaka ve kusimba bima na maboko, Bambangi ya Yehowa ke sadisaka bo mpi ke siamisaka na kupesa bamvutu ntangu bo ke longuka kana mpila kele.

Ntangu bo ke longukaka, Bambangi ya Yehowa kumosi ti minunu ke yimbaka bankunga ya Kimfumu sambu na kukumisa Nzambi, nkutu bo vandaka kusepela mingi na kuyimba. Mununu mosi zina na yandi John, * tubaka nde: “Beto ke sepelaka kibeni ti bankunga yina beno ke nataka. Yo ke sadisaka beto na kuzaba Nzambi mpi kuzitisa yandi.” Mununu mosi ya kifwa meso zina na yandi Judith, me kangaka na ntu bankunga yina yandi ke zolaka mingi!

Bambangi ya Yehowa ke tulaka dikebi na sante ya konso mununu. Brian, bakala mosi yina ke sadisaka minunu ke tuba nde kana minunu ke bela, Bambangi ya Yehowa ke kwendaka kutala bo na bashambre na bo. “Beto ke solulaka ti bo sambu na kuzaba mutindu bo ke kudiwa. Bantangu ya nkaka beto ke vutukilaka bo kilumbu ya nkaka sambu na kuzaba kana bo me kuma mbote.”

Minunu mingi ke sepelaka na viziti yai. Peter, yina ke solulaka ti minunu konso mposo ke tuba nde: “Mono ta yambula ve kukwenda kuna.” “Kana bo me kuma kitatu, Judith ke songaka muntu yina ke yidikaka yandi nde, kana nge me zola! yidika mono sambu Bambangi ya Yehowa ke zola kukwisa. Mono ke zola ve kuvanda na retare!”

Minunu ke sepelaka mingi ti mambu yina bo ke longukaka mpi bo kemonaka nde bo kele pene-pene ti nzambi. Na nima ya kutadila malongi ya Yezu, Robert tubaka nde: “Mono vandaka kubakisa ve ata fioti verse yai. Ntangu yai mono me bakisa!” Davidi me monaka mfunu ya kisambu, mpi yandi ke tuba nde: “Yo me sadisaka mono na kuvanda ti kinduku ya mbote ti Nzambi yandi me kumaka muntu ya kieleka sambu na mono.”

Minunu ke vandaka ti mpusa ya ngolo ya kulonguka mambu yina Biblia ke longaka sambu na bilumbu ke kwisa. “Lynette, yina kele mununu songaka Bambangi ya Yehowa nde: Mersi mutindu beno me sadila Biblia sambu na kupesa beto kikesa.” Mununu ya nkaka tubaka nde: “Nzambi me tinda beno na beto!”

Margaret sepelaka mingi na baviziti yina, ntangu yai yandi ke vukanaka mbala na mbala na balukutakanu ya Bambangi ya Yehowa ya bwala yina na Nzo ya Kimfumu. Yo ke lombaka kibeni bikesa sambu na yandi na kukwenda na balukutakanu sambu yandi ke belaka mingi. Yandi songaka Bambangi ya Yehowa nde: “Beno me pesa beto bima yonso yina beto vandaka na yo mfunu sambu na kuzinga.”

Bantu yonso yina ke zingaka ti minunu sepelaka mingi na viziti ya Bambangi ya Yehowa. Anna, Mbangi ya Yehowa ya bwala yina ke tuba nde: “Bantu yonso yina ke zingaka ti minunu siamisaka minunu na kuvukana na masolo ya Bambangi ya Yehowa, sambu bo monaka nde na nima ya kusolula ti Bambangi ya Yehowa minunu vandaka na kiese mingi.” Brian, yina beto tubilaka na luyantiku ke yika nde: “Bantu yina ke zingaka ti minunu me kumaka kibeni banduku mpi ke solulaka mbote. Bo ke sadisanaka.”

Minunu ke vandaka na kiese ya kusolula ti bantu yina ke zolaka bo. Mwana mosi yina mama na yandi kele mununu songaka Bambangi ya Yehowa nde: “Beno me sadila mama na mono diambu mosi ya mbote.”