Nu ta resebe, guarda i uza bus informason pesoal sô pa asuntus ki bu pidi i nu ta guarda-s duránti ténpu ki el mestedu pa kunpri kel obijetivu ki pô-u ta da-nu kes informason ô pa otus obijetivu legal ki pode aplika na bu situason. Na kes situason li, si dipôs bu krê tra kalker informason pesoal ki nu pidiba bo, talvês bu pode ka konsigi entra na alguns párti di site ô kes aplikativu ki sta ligadu ku el ki Watchtower Bible and Tract Society of New York, Inc. ta oferese ô nu pode ka konsigi responde bu pididu.

Kes informason ki nu ta dadu na un pididu ô na un pitison ta sta disponível pa kes algen ki ta prosesa bus informason i tanbê pa kes spesialista ki ta da apoiu tékiniku i ki ta faze manutenson di sistéma. Nu ka ta da ningen bus informason pesoal, má na alguns kazu nu pode faze kel-la, sima: (1) si nu meste-l pa faze un trabadju ki bu pidi i nu splika-u klaru kuzê ki sta involvidu, (2) si nu ta atxa ma kes informason pode uzadu dretu pa kunpri kalker lei ô régra ki lei ta iziji, (3) pa responde pididu di un autoridadi ki ta aplika lei, ô tanbê (4) pa diskubri i ivita korupson i prublémas tékiniku ô di suguransa. Óras ki bu ta uza kel site li i tudu kes aplikativu ki sta ligadu ku el, bu sta ta seta pa nu pasa bus informason pesoal sô na kes situason ki dja nu pâpia di el li. Na ninhun situason nu ka ta bende, troka pa algun kuza ô luga kalker informason pesoal ki bu manda.

Kuazi tudu informason di kel site li pode ser uzadu sen bu rejista ô sen manda-nu bus informason. Má, ten alguns informason ki pa algen odja-s, el meste rejista, manda algun pididu ô prenxe algun formuláriu, ô algun kongregason di Tistimunhas di Jeová ten ki manda ses informason através di site jw.org. Bus informason ta prosesadu si bu konkorda. Na alguns kazu, mésmu ki bu fla ma bu ka ta konkorda más, talvês simé nu ta ten bazi legal pa kontinua ta prosesa bus informason, désdi ki ruspetadu kel ki lei ta iziji.

Informason pesoal ki bu poi na site, ta uzadu sô pa kunpri obijetivus ki bu diklara kantu ki bu poi bus informason. Kes obijetivu pode ser:

Kóntas. Óras ki bu ta kria un kónta, kel email ki bu ta da-nu ta uzadu pa nu pâpia ku bo sobri bu kónta. Pur izénplu, si bu skese nómi di utilizador ô bu palavra-pasi, bu pode pidi ajuda pa bu entra na bu kónta. Bu ta dadu ajuda através di un mensajen ki ta mandadu pa kel email ki bu da-nu kantu bu abri bu kónta.

Pitisons. Si bu sta kualifikadu di akordu ku krénsas i régras di Tistimunhas di Jeová, bu pode uza kel site li pa kria bu kónta i manda algun pitison, ô tanbê bu kongregason pode uza kel site li pa manda bu pitison. Kada pitison ta mostra pa kuzê ki el ta sirbi, sima pa faze más trabadju di nos relijion, pidi un lugar pa fika ô oferese un lugar pa resebe otus algen óras ki ten kongrésu, asenbleia i pa otus kuza. Bus informason pesoal ki nu resebe pode inklui kes informason pesoal ki bu da-nu, ki ansions di bu kongregason da-nu ô ki enkaregadu di bu grupu di kongregason da-nu. Kes informason pesoal ki ta ben na un pitison ta inklui kes ki bu ta manda i otus informason ki ansions di bu kongregason ô un enkaregadu di grupu pode manda. Kes informason ki mandadu ta uzadu sô pa prosesa i analiza bu pitison, pa otus asuntu na skritóriu. Párti di kel prosésu ta inklui poi bus informason na bu kónta. Si mestedu, bus informason pode mandadu pa otus filial, pa sédi mundial di Tistimunhas di Jeová ô pa otus organizason sima kel-li na otus país, ki Tistimunhas di Jeová ta trabadja ku es. Na tudu kes kazu li, pitisons ta analizadu un di kada bês i es ka ta djobedu di manera automátiku.

Pájina O Meu Perfil: Dipôs ki bu kria un kónta, sekretáriu di bu kongregason pode dexa-u entra na pájina di bu perfil. Si bu krê poi más informason sobri bo na bu pájina di perfil na hub.isa4310.com, bu ta perguntadu si bu ta konkorda pa es uza kel informason ki bu poi, kazu es skodje-u pa otus diziginason i tanbê pa es kontata-u. Si bu sta apoia un prujétu i bu poi más informason na bu perfil, talvês kel algen ki é responsável pa kel prujétu ki bu sta apoia, pode odja kes informason ki bu poi ki sta ligadu ku kel prujétu. Pa bus informason prosesadu, talvês si meste, es ta mandadu pa otus filial di Tistimunhas di Jeová, pa sédi mundial di Tistimunhas di Jeová, ô pa otus organizason sima kes-li ki ta kolabora ku Tistimunhas di Jeová na txeu país.

Trenamentu: Si bu sta kualifikadu pa apoia prujétus, ki ta inklui prujétus di konstruson, un algen ki ta organiza kes trenamentu pode konvida-u pa bu resebe trenu. Bu pode seta ô nega konviti, ô kansela-l antis di kel trenu kumesa. Si bu seta un konviti, kes instrutor ta toma nóta di kantu bês ki bu sisti, di kes obijetivu ki bu alkansa i tanbê es pode faze otus komentáriu. Kes algen ki sta organiza i kes instrutor pode torna djobe kes informason ki bu poi na pájina di perfil na hub.isa4310.com. Pa bus informason prosesadu, tanbê es pode mandadu pa otus filial di Tistimunhas di Jeová, pa sédi mundial di Tistimunhas di Jeová, ô pa otus organizason sima kes-li ki ta kolabora ku Tistimunhas di Jeová na txeu país.

Kontribuisons. Si bu faze un kontribuison pa internet, nu ta fika ku bu nómi i bu kontatu. Pa kontribuisons ki ta fazedu ku karton di kréditu, nu ta uza sistéma di pagamentu pa internet autorizadu, ki ta uza sistémas di suguransa i régras di privasidadi di midjór kualidadi. Nu pode resebe informasons sima nunbru di karton di kréditu ô di kónta na banku ki ta mestedu pa prosesa bu kontribuison i nu ta manda kes informason pa kes sirvisu ki ta faze prosesamentu. Nu ta uza Régras di suguransa di informasons pa indústria di kartons di pagamentu (“PCI DSS”) pa prosesa bu kontribuison ku suguransa. Ken ki ta resebe kontribuison ta fika ku kes informason sobri kel kontribuison kel ténpu ki el meste i tanbê di akordu ku kel ki leis ta manda. Kel-li ta inklui informasons sima, data ki mandadu kontribuison, kantu ki mandadu i modi ki mandadu. Kel-la ta djuda-nu kunpri régras di kontabilidadi i responde kalker pergunta ki pode parse duránti kel ténpu. Nu ka ta txoma-u pa pidi más kontribuison.

Pididus di más informason ô pididus pa studu di Bíblia. Tanbê bu pode pidi más informason ô un studu di Bíblia di grasa através di nos site. Nu ta uza bus informason pesoal sô pa trata asuntus ki ten aver ku bu pididu. Si mestedu, bus informason pode mandadu pa otus filial ô pa otus organizason ki Tistimunhas di Jeová ta trabadja ku es, pa responde bu pididu.

Otus asuntu. Bu pode poi bus informason pesoal (sima bu nómi, morada i nunbru di tilifóni) pa otus asuntu alén di kria un kónta, prenxe un pitison ô faze un kontribuison. Na kada situason ta splikadu na kuzê ki ta bai uzadu bus informason pesoal. Nu ka ta ba uza bus informason pa otus asuntu ki bu ka pidi.

Na pájina Como o JW Library usa suas informações bu ta atxa un splikason di modi ki ta uzadu bus informason na JW Library.

Sima sta splikadu na kel pájina li, aplikativu JW Library ta diskarega informasons di site jw.org. Kel site li ta konsigi identifika inderésu IP di ken ki sta uza-l óras ki aplikativu ta diskarega informasons di site. Kes informason ki nu ta resebe através di site é pa bu pode ten kes sirvisu di es aplikativu, pa midjora kes sirvisu ki el ta oferese i pa bu uza-l di manera más suguru. Pa ser izatu, nu ta uza kes informason pa dexa-u entra na aplikativu i uza-l, kontrola modi ki aplikativu ta funsiona i pô-l ta funsiona más dretu, djobe i ivita kes prugrama ki ten vírus, i kontrola kes prubléma di suguransa.

Nos organizason relijiozu ta funsiona na mundu interu através di entidadis ki kriadu na txeu país. Alguns di kes sirvidor ki ta guarda nos site i kes aplikativu ki sta ligadu ku nos site, ta fika na Mérka. Nu pode manda bus informason pa fóra di país ki bu ta mora, pa otus país ki lei di proteson di informasons é diferenti di país undi bu ta mora. Óras ki nu prosesa i manda bus informason pesoal, nu ta toma kuidadu pa nu proteje bus informason. Nu ta spera ma tudu organizason ki ta uzadu pa apoia óbras di Tistimunhas di Jeová ta sigi kes mésmu régra di proteson di informasons pesoal.

Óras ki bu ta vizita nos site i bu ta pâpia ku nos através di internet, kel-li krê fla ma bu ta konkorda ma bus informason pode bai pa otus país. Na txeu kazu, tanbê nu ta uza alguns akordu pa faze kes transferénsia, sima kes régra ki ta uzadu na kes tipu di kontratu li.

Óras ki nu ta prosesa bus informason pesoal, nu ta toma txeu kuidadu pa nu mante bus informason atualizadu i suguru, ki akordu ku kel obijetivu ki bu manda-nu el. Bu pode ten alguns direitu, di akordu ku país ki bu ta vive i lei di proteson di informasons pesoal, sima kes-li:

• Bu pode pidi informasons sobri modi ki bus informason sta ta ser uzadu di akordu ku lei di país ki bu ta vive.

• Bu pode pidi pa ten asésu, pa blokia ô pa paga bus informason pesoal. Tanbê, bu pode koriji-s si es sta inkonplétu ô si es ka sta dretu.

• Si ten nisisidadi, bu pode inpidi-nu di uza bus informason i pidi-nu pa nu ka uza bus informason más.

Si na país ki bu ta mora, ten lei di proteson di informason i bu krê odja, koriji ô paga bus informason, bu pode atxa informasons di kontatu na pájina di Kontatus pa proteson di informasons.

Dipôs di bu da-nu bus informason i nu resebe próvas klaru di ken ki bo é i informasons ki nu meste pa nu identifika-u, kontrolador di informasons pode seta ô nau bu pididu pa el dexa-u ten asesu, koriji ô paga bus informason. Tanbê nu ta sforsa pa ninhun interesi di nos organizason ka podu na prigu, sima direitu di nos liberdadi relijiozu. Tanbê nu ta dexa otus organizason ki nu ta trabadja ku es sabe si nu faze algun mudansa.

Favor, lenbra ma bus informason pode ka pagadu si ten algun lei ki ta fla pa ka paga ô pa otus motivu ki lei ta iziji. Pur izénplu, nos organizason ten interesi na mante bus informason kómu Tistimunha di Jeová. Paga bus informason ta viola krénsa i prátika relijiozu di es organizason. Si fazedu algun pididu pa paga informasons pesoal, ta lebadu en kónta, kalker lei ki ta fla ma kel informason mestedu pa pasa otu algen ô leis ki fla kantu ténpu ki informason ta guardadu. Tanbê bu pode faze un reklamason na kenha ki ta kontrola i proteje uzu di informasons pesoal na undi ki bu ta vive, pa manera ki es uza bus informason ki bu da-nu através di es site.